އުމްރާގެ އަޅުކަން އަދާކުރުމަށް ދިޔަ ދިވެއްސަކު ނިޔާވެއްޖެއެވެ.
އުމުރާގެ އަޅުކަން އަދާކުރަމުން ދަނިކޮށް ނިޔާވީ ނ. ހޮޅުދޫ، ސާދާގެ، ހާމިދު މުހައްމަދު (ހާމިދުބެ)އެވެ. ނިޔާވީ ރޭ ދަންވަރު 2:15ހާއިރު ކަމަށް މައުލޫމާތު ލިބެއެވެ.
ކޮވިޑްގެ ހާލަތުގައި ދިވެހިންނަށް އުމްރާގެ އަޅުކަން އަދާކުރެވޭނެ ޚާއްސަ އުސޫލެއް ސައުދީ އަރަބިއްޔާއިން ކަނޑައަޅާފައިވަނީ މި އަހަރުގެ ޖެނުއަރީ މަހުއެވެ. އިސްލާމިކް މިނިސްޓްރީން މިހާތަަނަށް ޖުމްލަ 37 ކުންފުންޏަކަށް އުމްރާއަށް މީހުން ގެންދިޔުމުގެ ހުއްދަ ދީފައިވެއެވެ.
ކޮވިޑަށް ޕޮޒިޓިވްވާ މީހުންގެ އަދަދު ކުއްލިއަކަށް މަތިވާން ފެށުމުން މައްކާގެ ހަރަމްފުޅުގައި ގައިދުރުކަން ބެހެއްޓުމުގެ ނިޒާމު ސައުދީ ސަރުކާރުން އަނެއްކާވެސްވަނީ ތައާރަފްކޮށްފައެވެ.
ސައުދީ ސަރުކާރުން ބުނެފައިވަނީ މައްކާގެ ހަރަމްފުޅުގައި ނަމާދުކުރާ މީހުންނާއި ޠަވާފުކުރާ މީހުންނާއި ސަޢުޔުކުރާ މީހުން ވެސް ހިމެނޭގޮތުން ގައިގޯޅިނުވެ ދުރުދުރުގައި މީހުންނަށް ތިބެވޭނޭ އުސޫލަށް ބުރާސްފަތި ދުވަހުން ފެށިގެން އަނެއްކާވެސް އަމަލުކުރަން ފަށާފައިވާ ކަމުގައެވެ. ހަރަމްފުޅުގެ އިތުރުން ވެސް މީސްތަކުން އެއްވާ އެހެން ތަންތަނުގައި ވެސް ގައިދުރުކަން ބެހެއްޓުމުގެ އުސޫލަށް އަމަލުކުރުމަށް ވަނީ އަންގާފައެވެ.
ކޮވިޑުގެ ނުރައްކަލާ ގުޅިގެން އެއްއަހަރުގެ ހައްޖު ވެސް ވަނީ ކެންސަލްކޮށްފައެވެ. އަދި އުމްރާއަށް އެކި ގައުމުތަކުން އެތެރެވާ މީހުންގެ އަދަދު ވެސް ބޮޑު ތަނުން ވަނީ މަދުކޮށްފައެވެ.
