އީ-ޓުކުރި ކޮމިއުނިޓީ އޮންލައިން ޝޮޕް ކުޅުދުއްފުށީގައި އިފްތިތާހުކޮށްފި
31 ޑިސެމްބަރު 2021 | ހުކުރު 02:18މި ޚިދުމަތް ވެގެންދާނީ ޕޮލިސީ ލެވެލްގައި ސަރުކާރުން ކުރަމުން އަންނަ މުހިންމު މަސައްކަތެއް ކަމުގައި މިނިސްޓަރު ވިދާޅުވި
އީ ޓުކުރި އޮންލައިން ޝޮޕް އިފްތިތާހުކުރުމުގެ ރަސްމިއްޔާތުގައި މިނިސްޓަރ ޝައުނާ ވާހަކަ ދައްކަވަނީ
ކުޅުދުއްފުށީ ސިޓީގައި މޯލްޑިވްސް ޕޯސްޓްގެ އީ-ޓުކުރި ކޮމިއުނިޓީ އޮންލައިން ޝޮޕް އިފްތިތާހުކޮށްފިއެވެ.
ބުރާސްފަތި ދުވަހު ކުޅުދުއްފުށީގައި އޮތް ރަސްމިއްޔާތެއްގައި މޯލްޑިވްސް ޕޯސްޓްގެ އީ-ޓުކުރި ކޮމިއުނިޓީ އޮންލައިން ޝޮޕް އިފްތިތާހްކުރުމުގެ ރަސްމިއްޔާތު ޝަރަފުވެރި ކޮށްދެއްވާފައިވަނީ މިނިސްޓަރ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ޝައުނާ ވިދާޅުވީ ލާމަރުކަޒީ ނިޒާމު އުފެދި އަށަގަންނަމުން އަންނަ އިރު މި ފަދަ އޮންލައިން ޝޮޕެއްގެ ޚިދުމަތް ކުޅުދުއްފުށީގައި ފެށިގެން ދިއުމަކީ ވަރަށް މުހިއްމު ކަމެއް ކަމަށެވެ. ރަށު ފެންވަރުގެ އުފެއްދުންތައް ރާއްޖޭގެ އެކި ސަރަހައްދުތަކަށް އޮންލައިންކޮށް ވިއްކުމަށް ބޭނުންވާ އުފެއްދުންތެރިންނަށް އަމާޒުކޮށް މޯލްޑިވްސް ޕޯސްޓުން މިފަދަ މުހިންމު ޚިދުމަތެއް މިފަދަ ދަނޑިވަލެއްގައި ރައްޔިތުންނާ ހަމައަށް ގެނެސްދިން ކަމަށްޓަކައި މޯލްޑިވްސް ޕޯސްޓަށް މިނިސްޓަރު ވަނީ ޝުކުރު ދަންނަވާފައެވެ.
އުފެއްދުންތެރިންގެ އުފެއްދުންތައް އިސްތިހާރު ކުރެވޭނެ ގޮތެއް ނުވަތަ މާކެޓް ކުރެވޭނެ ގޮތެއް ނެތިފަ ނޫނީ އަމިއްލަ ވެބްސައިޓެއް ނުހެދިފައި ތިބި އުފެއްދުންތެރިންނަށް ، އީ-ޓުކުރި ކޮމިއުނިޓީ އޮންލައިން ޝޮޕްގެ ސަބަބުން ނިމުމެއް އަންނާނެ ކަމަށް މިނިސްޓަރު ޝައުނާ ވިދާޅުވި އެވެ.
މިއީ މުދާ ވިއްކާ ފަރާތާއި ގަންނަ ފަރާތާ ދެމެދު އެޅޭ ޑައިރެކްޓް ލިންކެއް ގޮތުގައި ސިފަ ކުރައްވަމުން މިނިސްޓަރު ޝައުނާ ވިދާޅުވީ ލާމަރުކަޒީ ނިޒާމާއި ގެސްޓް ހައުސް ޓޫރިޒަމް ތައާރަފް ވެގެން އަންނަ އިރު މިއީ ވަރަށް މުހިންމު ޚިދުމަތެއް ކަމުގައެވެ. މިޕްލެޓް ފޯމުން ތަކެތި ޑެލިވަރީ ކުރުމުގެ ގާބިލްކަން ލިބިގެންދާކަން ފާހަގަކުރައްވައި މިނިސްޓަރު އިތުރަށް ވިދާޅުވީ ކާމިޔާބު މި ފަދަ ކޮންމެ ޕްލެޓް ފޯމެއްގައި ހިމެނޭ އަސާސީ ހުރިހާ ސިފަތައް މި ޕްލެޓްފޯމުގައި ވެސް ހިމެނޭ ކަމަށެވެ.
ދިވެހި އުފެއްދުންތައް އުފައްދާ ފަރާތްތައް އެއްދުވަހުން އަނެއް ދުވަހަށް އިތުރުވާކަމަށް ވެސް މިނިސްޓަރ ފާހަގަކުރެއްވިއެވެ. އެހެން ކަމުން އެ ވިޔަފާރިތައް ކުރިއަރުވައި، އަމިއްލަ ފައިމައްޗަށް ތެދުވެވޭފަދަ ފުރުސަތުތައް ހޯދައިދިނުމަކީ ރާއްޖޭގެ އިޤްތިޞާދީ ތަރައްޤީގެ މުހިންމު ސިޔާސަތެއް ކަމަށާއި، ޒަމާނީ ވަސީލަތްތަކާއި ޓެކްނޮލޮޖީގެ އެހީގައި ދެވެންހުރި ފުރުސަތުތައް އެފަދަ ފަރާތްތަކަށް ތަނަވަސްކޮށްދިނުމާއި އެޑިއުކޭޓް ކޮށްދިނުމަކީ ޕޮލިސީ ލެވެލްގައި ސަރުކާރުގެ ކަމާބެހޭ އިދާރާތަކުން ހުއްޓުމެއްނެތި ކުރަމުން އަންނަ މަސައްކަތެއް ކަމަށް ވިދާޅުވިއެވެ. އެގޮތުން މި ޚިދުމަތް ވެގެންދާނީ ޕޮލިސީ ލެވެލްގައި ސަރުކާރުން ކުރަމުން އަންނަ މުހިންމު މަސައްކަތެއް ކަމުގައި މިނިސްޓަރު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ޝައުނާ އިތުރަށް ވިދާޅުވީ ކުޅުދުއްފުއްޓަށް ދިމާވެފައިވާ ހައްލު ކުރަންޖެހޭ އެންމެ މުހިންމު އެއް މައްސަލައަކީ ކުނީގެ މައްސަލަ ކަމަށާއި މި ފެށޭ އަހަރުގެ ތެރޭގައި މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އެންމެ އިސްކަމެއްދީގެން ކުރާނެ އެންމެ މުހިންމު މަސައްކަތަކީ މި ސިޓީގެ ކުނީގެ މައްސަލަ ހައްލު ކުރުން ކަމުގައެވެ.
