ޕްރެޒިޑެންޓްސް ކަޕުގައި ޔުނައިޓެޑް ވިކްޓްރީ (ޔޫވީ) ބަލިކޮށް ގްރީން ސްޓްރީޓްސްއިން ތާވަލުގެ ދެވަނައަށް ޖެހިލައިފިއެވެ.

ގައުމީ ފުޓްބޯޅަ ދަނޑުގައި ބުދަ ދުވަހުގެރޭ ކުޅުނު މެޗުން ޔޫވީ އަތުން ގްރީން ސްޓްރީޓްސް މޮޅުވީ 2-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފު ފަށައިގެން ގްރީން ސްޓްރީޓްސްއިން ޔޫވީގެ ގޯލަށް ނުރައްކާކޮށް ގިނަ ހަމަލާތަކެއް ވަނީ ފޮނުވާލާފައެވެ. އެގޮތުން ފުރަތަމަ ހާފުގައި ގްރީން ސްޓްރީޓްސްގެ އަބްދުﷲ ޔާމީން (ޔާނު) އަރިމަތިން ލިބުނު ހިލޭ ޖެހުމަކުން ޔޫވީގެ ގޯލަށް ނުރައްކާކުރިއިރު، އޭނާ ފޮނުވާލި ހިލޭ ޖެހުމުގެ ހުރަހަކަށްވީ ޔޫވީގެ ކީޕަރު އަލީ ނާޖިހު (ނާޖީ) އެވެ. އޭގެ ފަހުން ޔޫވީގެ ކެޕްޓަން އަލީ ހައިޝަމް (ޗުމްޕު) ފޮނުވާލި ނުރައްކާތެރި ހަމަލާ ގްރީން ސްޓްރީޓްސްގެ ކީޕަރު އަޙްމަދު ރަމީޒް ވަނީ ދިފާއުކޮށްފައެވެ.

އެކަމަކު ފުރަތަމަ ހާފު ނިމުމުގެ ކުރިން ގްރީން ސްޓްރީޓްސްއިން ވަނީ ލަނޑު ޖަހާ ލީޑު ނަގައިފައެވެ. ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބުކޮށްދިނީ ރިލްވާން ވަހީދު (ރިލޭ) އެވެ. މިއީ ޔުވީގެ ޑިފެންޑަރެއްގެ އަތުގައި ބޯޅަ ޖެހުމުން ރެފްރީދިން ޕެނަލްޓީއެކެވެ.

ދެވަނަ ހާފު ފަށައިގެން ފަސް މިނެޓު ތެރޭގައި ގްރީންއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ހަސަން ނަޒީމް ގާސިމް (ޗޯޓު) އެވެ. މިއީ ޔާނުގެ އެހީތެރިކަމާއެކު ޗޯޓު ކާމިޔާބުކުރި ލަނޑެކެވެ.

އޭގެ ފަހުން ޔޫވީގެ ސަމާހު އަޙްމަދަށް ހުސްފުރުސަތެއް ލިބުނުއިރު، އޭރިޔާތެރޭގައި ހުރެ އޭނާ ފޮނުވާލި ހަމަލާ ދިޔައީ ހުރަސް ދަނޑިމަތިން ބޭރަށެވެ.

މި ނަތީޖާއާއެކު ގްރީން ސްޓްރީޓްސްއިން ތާވަލުގެ ދެވަނައަށް ޖެހިލީ ތިން މެޗުން ހަ ޕޮއިންޓް ހޯދައިގެންނެވެ. އެއް މެޗު މަދުން ކުޅެ ގްރީންއާ އެއްވަރަށް ޕޮއިންޓް ހޯދައިގެން މާޒިޔާ އޮތީ ތާވަލުގެ ތިންވަނައިގައެވެ. ގްރީންއަށް ދެވަނަ ލިބެނީ ލަނޑުގެ ތަފާތުންނެވެ. އެއްވަނައިގައި އޮތް ވެލެންސިއާއަށް ތިން މެޗުން ނުވަ ޕޮއިންޓް ވަނީ ލިބިފައެވެ.