ސިއްހީ މަސައްކަތްތެރިންނަށް ވަޒީފާގެ ކުރިއެރުން ލިބޭ އޮނިގަނޑެއް ނެތް މައްސަލައިގައި ކޯޓަށް

ސިއްހީ ދާއިރާގައި މަސައްކަތްކުރާ މީހުންނަށް، ގާނޫނުގައި ބުނާގޮތުގެ މަތިން ވަޒީފާގެ ކުރިއެރުން ލިބޭނެ އޮނިގަނޑެއް މިހާތަނަށް އައިއިރުވެސް އެކުލަވާލާފައިނުވާ މައްސަލައިގައި ހެލްތު މިނިސްޓްރީ އާއި ފިނޭންސް މިނިސްޓްރީ އަދި ސިވިލް ސަރވިސް ކޮމިޝަން(ސީއެސްސީ) އާ ދެކޮޅަށް ސިވިލް ކޯޓަށް މައްސަލައެއް ހުށަހަޅައިފިއެވެ.

މިމައްސަލަ ސިވިލް ކޯޓަށް ހުށަހަޅާފައިވަނީ ސިއްހީ ފަންނުވެރިންގެ ޖަމުޢިއްޔާ، މޯލްޑިވްސް ހެލްތް ޕްރޮފެޝަނަލް ޔޫނިއަން (އެޗްޕީޔޫ) އިސްވެ އޮވެއެވެ. ސިވިލް ކޯޓަށް މައްސަލަ ހުށަހެޅީ މާލެ ހިމެނޭ ގޮތަށް 14 އަތޮޅެއްގެ ސަރުކާރުގެ ހޮސްޕިޓަލްތަކާއި ހެލްތު ސެންޓަރުތަކުގައި މަސައްކަތްކުރާ އެކި ދާއިރާތަކުގެ މުވައްޒަފުންގެ ތެރެއިން 489 ސިވިލް ސަރވެންޓުންގެ ފަރާތުންނެވެ. މި މައްސަލަައިގައި ސިވިލް ސާވަންޓުންގެ ފަރާތުން ކޯޓުގައި ވަކާލާތު ކުރަނީ ހިލޭ ސާބަހަށް ގާނޫނީ ޚިދުމަތްތައް ފޯރުކޮށްދޭ ޕަބްލިކް އިންޓްރެސްޓް ލޯ ސެންޓަރު (ޕީއައިއެލްސީ) އިންނެވެ.

މައްސަލަ ހުށަހެޅުމަށްފަހު ބޭއްވި ނޫސްވެރިންގެ ބައްދަލުވުމުގައި ސިއްހީ ފަންނުވެރިންގެ ޖަމުޢިިއްޔާ އާއި ޕީއައިއެލްސީގެ ފަރާތުން ވަނީ މި މައްސަލައިގެ ތަފްސީލު ހިއްސާކޮށްފައެވެ. ނޫސްވެރިންގެ ބައްދަލުވުމުގައި ޕީއައިއެލްސީގެ ފަރާތުން ވަކީލާ މަރިޔަމް ޝުނާނާ ވިދާޅުވީ، މިއީ 2008 ވަނަ އަހަރުން ފެށިގެން މިއަދާ ހަަމައަށް އައިއިރުވެސް ސިއްހީ ދާއިރާގެ ފަންނީ މުވައްޒަފުންނަށް ވަޒީފާގެ ކުރިއެރުން ލިބޭނެ އޮނިގަނޑެއް ނެތްކަމުން ގާނޫނު އަސާސީން ލިބިދޭންޖެހޭ އަސާސީ ހައްގުތަކުން މަހުރޫމްވެފައިވާތީ ހުށަހަޅާފައިވާ މައްސަލައެއްކަމަށެވެ. ޝުނާނާ ވިދާޅުވީ ވަޒީފާގެ ކުރިއެރުން ލިބޭނެ ވަޒީފާގެ އޮނިގަނޑެއް ތައްޔާރުކޮށް އެފަދަ އޮނިގަނޑެއް ތަންފީޒުކުރުމަށް ދައުވާ ލިބޭ ދައުލަތުގެ އެންމެހާ އިދާރާތަކުގެ މައްޗަށް މިދައުވާގައި ދައުވާކޮށްފައިވާ ކަމަށެވެ.

ޝުނާނާ އިތުރަށް ވިދާޅުވީ ކޯޓަށް މައްސަލަ ހުށަހެޅީ އެތައް ފަހަރަކު މި މައްސަލަ ހައްލުކުރުމަށް 2008 ވަނަ އަހަރުން ފެށިގެން އެކި މަސައްކަތްތައް ކުރުމަށްފަހު ވެސް އެއްވެސް ނަތީޖާއެއް ނުލިބިގެންކަމަށެވެ.

ޝުނާނާ ވިދާޅުވީ ސިއްހީ ދާއިރާގައި މަސައްކަތްކުރާތާ 15 އަހަރުވީއިރު ވެސް އެހުރި މަގާމުގައި އެއްވެސް ކުރިއެރުމެއްނެތި މަސައްކަތްކުރާ ގިނަ ބަޔަކު އެބަތިބި ކަމަށެވެ. ނޫސްވެރިންގެ ބައްދަލުވުމުގައި އެމްއެޗްޕީޔޫގެ ޖެނެރަލް ސެކެޓްރީ ފާތިމަތު ޒިމްނާ ވިދާޅުވީ ޔޫނިއަން އުފެދިގެން މިއަދާ ހަމައަށް އައިއިރު ވެސް އޮތް އެންމެ ބޮޑު ކަންބޮޑުވުމަކީ އޮނިގަނޑެއް ނެތުންކަމަށެވެ. އެ މައްސަލައިގައި ދެ ފަހަރެއްގެ މަތިން ހެލްތު މިނިސްޓަރާ ބައްދަލުކޮށްފައިވާއިރު ސީއެސްސީއާ ވެސް ބައްދަލުކޮށްފައިވާކަމަށެވެ.

ކޯޓާ ހިސާބަށް މައްސަލަ ދިޔައީ މިހުރިހާ މަގަކުން ކުރި މަސައްކަތަށް އެއްވެސް އަލި މަގެއް ނުފެނުމުންކަމަށް ޒިމްނާ ވިދާޅުވިއެވެ.

މިކަމުގައި އެމްއެޗްޕީޔޫން ބުނީ ދައުލަތުގެ އެކި ފަރާތްތަކުން ބްލޭމް ގޭމް ކުޅެމުން އަންނަކަމަށެވެ. ހެލްތު މިނިސްޓްރީން އޮނިގަނޑު އެކުލަވާލައި ސީއެސްސީއަށް ފޮނުވާފައިވާކަމަށް ބުނާކަމަށާއި، ޕޭކޮމިޝަން ނުވަތަ ފިނޭންސް މިނިސްޓްރީން ކަންކަން ހަމަނުޖެހޭކަމަށް ބުނަމުންދާ ކަމަށެވެ. ޕޭކޮމިޝަނުން މިކަމުގައި ސިޔާސީ ތަރުތީބު ކުރުންތަކެއްގެ މަތިން މިކަން ކުރާ ކަމަށް ބުނާކަމަށާއި، އެއްވެސް މުވައްޒަފެއްގެ ދެމެދުގައި ތަފާތުކުރުން ގެންގުޅުމަކީ ބަލައިގަނެވޭނެ ކަމެއް ނޫންކަމަށެވެ.