އެމްޕީއެލްގެ ޕޯޓު ސޭފްޓީ ވީކްގެ ތެރެއިން ފުރަތަމަ ކުރިޔަށް ގެންދިޔަ “ސޭފްޓީ ކަލްޗަރ އެވެއަރނެސް ވޯރކްޝޮޕް” ނިންމައި، ބައިވެރިންނަށް ސެޓްފިކެޓް ހަވާލުކޮށްފިއެވެ.

ދެ ދުވަހުގެ މުއްދަތަށް ކުރިޔަށް ގެންދިޔަ މި ވޯރކްޝޮޕް 36 ބައިވެރިން ވަނީ ފުރިހަމަކޮށްފައެވެ. ހޯމަދުވަހު ހަވީރު ބޭއްވި ރަސްމިއްޔާތުގައި ސެޓްފިކެޓް ހަވާލުކޮށްދެއްވީ އެމްޕީއެލްގެ އެސިސްޓެންޓް ޖެނެރަލް މެނޭޖަރު މުހައްމަދު މަހުޖޫބުއެވެ.

ހަފްތާއެއްގެ މުއްދަތަށް ކުރިޔަށް ގެންދާ ސޭފްޓީވީކްގެ ފުރަތަމަ ވޯރކްޝޮޕް ނިމިފައިވާއިރު، ހުރިހާ ބައިވެރިންނަށް ވެސް ވަނީ ސޭފްޓީ ކަލްޗަރއާ ބެހޭގޮތުންނާއި ކްރައިމް ޕްރިވެންޝަނަށް އަލިއަޅުވާލައި މައުލޫމާތު ދީފައެވެ. އަދި ކެމިކަލް އަދި އައި.އެމް.ޑީ.ޖީއާ ބެހޭ ގޮތުން މައުލޫމާތު ދީފައިވާއިރު، މޫސުމާ ގުޅިގެން ދިމާވާ ކާރިސާތަކާ ބެހޭ މައުލޫމާތު ވެސް ވަނީ ދީފައެވެ.

ވޯރކްޝޮޕްގެ ބައިވެރިންނަށް މައުލޫމާތު ދީ އަހުލުވެރިކުރުމަށް ސެޝަންތައް ހިންގުމަށްޓަކައި، ފުލުހުންނާއި، އެމްއެންޑީއެފާއި މޫސުމާބެހޭ ގައުމީ އިދާރާގެ ބޭފުޅުން ވަނީ އެހީތެރިކަން ފޯރުކޮށްދެއްވާފައެވެ. އަދި ކުންފުނިތަކުގައި ސަލާމަތާއި ރައްކާތެރިކަމަށްޓަކައި އަޅާފައިވާ ފިޔަވަޅުތައް ބަލާލުމަށްޓަކައި އެންސިސް ފިޝަރީޒްއަށް ވޯކްޝޮޕްގެ ބައިވެރިން ވަނީ ގޮސްފައެވެ.

މީގެއިތުރުން، ސައިބަރ ސެކިއުރިޓީއާ ގުޅިގެން، މައުލޫމާތާއި، ޓީމް ބިލްޑިންގ އެކްޓިވިޓީސްތަކެއް ވަނީ ކުރިޔަށް ގެންގޮސްފައެވެ.

2019 ވަނަ އަހަރުން ފެށިގެން އެމްޕީއެލްއިން ސޭފްޓީ ވީކް ފާހަގަކުރަނީ މަސައްކަތުގެ މާހައުލުގައި އުޅޭ އިރު ސަލާމަތާއި ރައްކާތެރިކަމަށް ހުރިހާ އެންމެވެސް ހޭލުންތެރިކޮށް އިސްކަންދޭ ސަގާފަތެއް އާލާކުރުމަށެވެ.