ގޯލާންގައި ޔަހޫދީ ވަޒަންވެރިން ދެ ގުނައަށް އިތުރުކުރުމުގެ ޕްލޭނެއް ހާމަކޮށްފި

ގޯލާންގެ އުސްބިންތަކުގައި ޔަހޫދީން ވަޒަންވެރިވާ މިންވަރު ދެގުނައަށް އިތުރުކުރުމުގެ ޕްލޭނެއް އެބައޮތްކަމަށް އިސްރާއީލްގެ ބޮޑުވަޒީރު ނަފްތާލީ ބެނެޓް ވިދާޅުވެއްޖެއެވެ.

ބެނެޓް ވިދާޅުވީ މިއީ އެތައް މިލިއަން ޑޮލަރެއް ހިމެނޭގޮތަށް އެކުލަވާލާފައިވާ ޕްލޭނެއްކަމަށެވެ. ގޯލާންގެ އުސްބިންތަކަކީ މީގެ 50 އަހަރު ކުރިން އިސްރާއީލުން ހިފާފައިވާ ސީރިޔާގެ ބިންތަކެކެވެ. މިޕްލޭނާއެކު އެސަރަހައްދުގައި މިހާރަށްވުރެ ބޮޑަށް ޔަހޫދީންގެ ބާރު ގަދަވެގެންދާނެއެވެ.

ބެނެޓް ވިދާޅުވީ އައު އިންވެސްޓްމެންޓަކީ އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި ގޯލާންގެ އުސްބިންތަކަކީ އިސްރާއީލްގެ ބައެއްގެ ގޮތުގައި ބަލައިގަތުމާއެކު ފެށިފައިވާ އިންވެސްޓްމެންޓެއްކަމަށެވެ.

ގޯލާންގެ އުސްބިންތަކާއި ގުޅޭގޮތުން ބެނެޓްކުރިޔަށް ގެންދެވި ޚާއްސަ ކެބިނެޓް ބައްދަލުވުމުގައި ބެނެޓް ވިދާޅުވީ މިއީ ގޯލާންގެ އުސްބިންތަކުގައި މީހުން އާބާދުކުރަންވީ ވަގުތުކަމަށެވެ. ދިގު އިންތިޒާރަކަށްފަހު ގޯލާންގެ އުސްބިންތަކުގައި ޔަހޫދީން އާބާދުކުރާ މިންވަރު ދެގުނަ ކުރަންވީ ވަގުތު އައިސްފައިވާކަމަށާއި އަމާޒަކީ އެއީ ކަމަށް ބެނެޓް ވިދާޅުވިއެވެ.

އިސްރާއީލުން ގޯލާންގެ އުސްބިންތައް ހިފާފައިވަނީ 1967 ވަނަ އަހަރު ކުރިޔަށްދިޔަ މެދުއިރުމަތީ ހަނގުރާމައިގައެވެ. މިބިން އިސްރާއީލް ހިފާފައިވަނީ ބައިނަލްއަގުވާމީ ގާނޫނުތަކާ ޚިލާފަށް ކަމަށް ބައިނަލްއަގުވާމީ މުޖުތަމައުގެ ގިނަ ބަޔަކު ދެކެއެވެ.

ގޯލާންގެ އުސް ބިންތަކުގައި މިހާރު 25،000 އިސްރާއީލު މީހުން ވަނީ ވަޒަންވެރިވެފައެވެ. އެސަރަހައްދަކީ އިސްރާއީލްގެ ބައެއްގެ ގޮތުގައި ބަލައިގަތް ފުރަތަމަ ގައުމަކީ އެމެރިކާއެވެ.

ބެނެޓްގެ ޕްލޭން ހާމަކުރެއްވިނަމަވެސް މިޕްލޭނާ އެއްގޮތަށް ކަންކަން ކުރިޔަށްދާނީ 8 ޕާޓީ ހިމެނޭ ކޯލިޝަންގެ ކެބިނެޓްގެ ހުއްދަ މި ޕްލޭނަށް ލިބިގެންނެވެ.