ކޮމަންޑޫ ދާއިރާގެ ބައި އިލެކްޝަންގައި ވާދަނުކުރަން އެމްޓީޑީން ނިންމައިފި
ބައި އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު، ޑިސެމްބަރު 16ން ޑިސެމްބަރު 30ށް ވަނީ ހުޅުވާލާފައި
އެމްޓީޑީގެ ނޫސްވެރިންގެ ބައްދަލުވުމެއްގެ ތެރެއިން
މޯލްޑިވްސް ތަރޑް ވޭ ޑިމޮކްރަޓްސް(އެމްޓީޑީ)ން ކުރިޔަށް އޮތް ކޮމަންޑޫ ދާއިރާގެ ބައި އިލެކްޝަންގައި ބައިވެރިނުވުމަށް ނިންމައިފިއެވެ.
އެމްޓީޑީން ކޮމަންޑޫ ދާއިރާގެ އިންތިޚާބުގައި ވާދަކުރުމަށް ނިންމާފައިވާކަން އިއުލާންކޮށްފައިވަނީ ޑިސެމްބަރ މަހުގެ 25 ވަނަ ދުވަހުއެވެ. އެއަށްފަހު ހޯމަ ދުވަހު އެޕާޓީން ބުނީ, ހޯމަ ދުވަހު ބޭއްވި އެމްޓީޑީގެ ކައުންސިލް ބައްދަލުވުމުގައި މިވަގުތު އިންތިހާބެއްގައި ބައިވެރިވުމަށް ނުފެންނަ ކަމަށް ނިންމާފައިވާކަމަށެވެ. ކޮމަންޑޫ ދާއިރާގެ ބައި އިލެކްޝަނަށް ޕާޓީއިން ހުޅުވާލުމުން ކުރިމަތިލި ހުރިހާ ފަރާތްތަކަށް ޝުކުރު އަދާކުރުމަށް ވަނީ ބުނެފައެވެ. އެޕާޓީން ކޮމަންޑޫ ދާއިރާއަށް ވާދަނުކުރަން ނިންމި ސަބަބެއް ހާމަކޮށްފައެއްނުވެއެވެ.
ކޮމަންޑޫ ދާއިރާގެ ބައި އިލެކްޝަން މިބާއްވަނީ އެދާއިރާގައި ހުންނެވި މެމްބަރ ހުސައިން ވަހީދު ޑިސެމްބަރ މަހުގެ 14 ވަނަ ދުވަހު އަވަހާރަވުމާ ގުޅިގެންނެވެ. ރައްޔިތުންގެ މަޖިލީހުގެ އިންތިޚާބުގެ ގާނޫނުގެ 5 ވަނަ މާއްދާގެ (ށ)ގެ މަތިން، ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު، ޑިސެމްބަރު 16ވާ ބުރާސްފަތި ދުވަހުގެ ހެނދުނު 8:30ން ފެށިގެން ޑިސެމްބަރު 30ވާ ބުރާސްފަތި ދުވަހުގެ ހަވީރު 3:00އާ ހަމައަށް ވަނީ ހުޅުވާލާފައެވެ.
ކޮމަންޑޫ ދާއިރާގެ ބައި އިލެކްޝަން ޕްރައިމަރީގައި ވާދަކުރުމަށް ހުޅުވާލި ފުރުސަތުގައި އެމްޑީޕީގެ ފަރާތުން ނަން ހުށަހަޅާފައިވަނީ ށ. ފޯކައިދޫ މުހައްމަދު ރާޝިދެވެ. އޭނާއަކީ ފޯކައިދޫ ކައުންސިލްގެ ސެކްރެޓަރީ ޖެނެރަލްއެވެ. ޕްރައިމަރީއަށް އިތުރު މީހަކު ކުރިމަތި ނުލާތީ އެމްޑީޕީގެ ޕްރައިމަރީއެއް ނޯންނާނެއެވެ.
ކޮމަންޑޫ ދާއިރާގެ ޕީޕީއެމްގެ ޓިކެޓް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު މޫސާ ފަތުހީ އާދަމަށް އެ ޕާޓީން ވަނީ ދީފައެވެ. އިދިކޮޅު ޕީޕީއެމްގެ ޓިކެޓުގައި އެ ދާއިރާއަށް ވާދަކުރައްވާނެ ބޭފުޅަކު ހޯދުމަށް ޕްރައިމަރީ އަށް ހުޅުވާލުމުން އެކަމަށް އެދި ފޯމު ހުށަހެޅުއްވީ ފަތުހީ އެކަންޏެވެ. އެހެންކަމުން އޭނާ ވެސް ވަނީ ޕްރައިމަރީއަކާ ނުލައި ޓިކެޓު ޔަގީން ކޮށްފައެވެ.
މީގެއިތުރުން ކޮމަންޑޫ ދާއިރާގެ އެތެރޭގެ އިންތިޚާބުގައި ބައިވެރިވުމަށް ހުޅުވާލި ފުރުސަތުގައި އިތުރު މީހަކު ކުރިމަތިލާފައިނުވާތީ މޯލްޑިވްސް ނޭޝަނަލް ޕާޓީގެ(އެމްއެންޕީ) ޓިކެޓް ވެސް، ކޮމަންޑޫއަށް އުފަން އަބްދުލް ހަންނާން އިދުރީސް ވަނީ ޔަގީންކޮށްފައެވެ.
ކޮމަންޑޫ ދާއިރާގެ އިންތިޚާބުގެ ވޯޓު ނެގުމަށް ހަމަޖެހިފައިވަނީ އަންނަ އަހަރުގެ ފެބުރުވަރީ 5ވާ ހޮނިހިރު ދުވަހުގެ ހެނދުނު 8:00ން ހަވީރު 4:00އަށެވެ.
