ޖުމްހޫރީ މައިދާނުގެ ވިނަގަނޑު ހަލާކުވެދާނެ ފަދަ ކަމެއް ނުކުރުމަށް މާލޭ ސިޓީ ކައުންސިލުން ހޯމް މިނިސްޓްރީއަށް އަންގާފައިވަނިކޮށް އެއާ ޚިލާފަށް އަމަލުކުރުމުން އެކަން ސިޓީ ކައުންސިލުން ކުށްވެރިކޮށްފިއެވެ.
ސިޓީ ކައުންސިލުން ބުނީ ޖުމްހޫރީ މައިދާނަކީ މާލޭގެ މަލަމަތި ދައްކުވައިދޭ މުހިންމު ސަރަޙައްދެއް ނަމަވެސް ފާއިތުވި 3 އަހަރުގެ ތެރޭގައި ޖުމްހޫރީ މައިދާނުގައި އާބާތުރަފިލުވުމަށް އެއްވެސް މަސައްކަތެއް ކޮށްފައިނުވާކަމަށެވެ. އެހެންކަމުން މާލޭ ސިޓީ ކައުންސިލްގެ ފަރާތުން ވަރަށް ބޮޑު ހޭދައެއްކޮށްގެން ޖުމްހޫރީ މައިދާނުގެ އާބާތުރަ ފިލުވުމުގެ މަސައްކަތް ކުރެވެމުންދާކަމަށް ބުނެފައިވެއެވެ.
މި މަސައްކަތުގެ ތެރެއިން ނޮވެމްބަރު މަހުގެ 16 ވަނަ ދުވަހު އެ ކައުންސިލުން ވަނީ ޖުމްހޫރީ މައިދާނުގައި ވިނަ އިންދުމުގެ މަސައްކަތްފަށައި 1 މަސްތެރޭގައި މި މަސައްކަތް ނިންމާލާފައި ކަމަށް ބުނެފައިވެއެވެ. އަދި ވިނަގަނޑު ބެލެހެއްޓުމަށްޓަކައި ކުރަންޖެހޭ ކަންކަން ކުރުމަށް 3 ހަފްތާވަންދެން އެ ވިނަގަނޑުގެ ބޭނުންނުކުރުމަށާއި، ވިނަގަނޑު ހެދެން އަދި ވަގުތު ބޭނުންވާނެ ކަމަށް ހޯމްމިނިސްޓްރީއާ އެކު ކުރެވުނު މަޝްވަރާތަކުގައި ހިއްސާކޮށްފައިވާނެ ކަމަށް ވަނީ ބުނެފައެވެ.
އެހެންނަމަވެސް އެއްބައިވަންތަކަމުގެ ދުވަހުގެ ރަސްމީ ޖަލްސާ ބޭއްވުމަށްޓަކައި ޖުމްހޫރީ މައިދާނުގައި ޓެންޓް ފަދަ ތަކެތި ބެހެއްޓުމަށް، ވިނަގަނޑުގެ ބޭނުންކުރުމަށް ހޯމް މިނިސްޓްރީގެ ފަރާތުން ކައުންސިލްގެ ހުއްދައަށް އެދިފައިވާކަމަށް ބުނެފައިވެއެވެ. އަދި ވިނަގަނޑު ހަލާކުވާނެފަދަ އެއްވެސް ކަމެއް ނުކުރުމަށް އެދި ލިޔުމުން ވެސް ހޯމް މިނިސްޓަރީއަށް އަންގާފައިވާނެ ކަމަށް ސިޓީ ކައުންސިލުން ވަނީ ބުނެފައެވެ. ދެފަރާތުން ގުޅިގެން ކުރިއަށްގެންދިޔަ ބައްދަލުވުމުގައި އެގޮތަށް އެއްބަސްވެފައިވާކަމަށް ސިޓީ ކައުންސިލުން ބުނެފައިވެއެވެ.
ސިޓީ ކައުންސިލުން ހޯމް މިނިސްޓްރީއަށް ފޮނުވި ޖަވާބުގައި ވަރަށް ތަފްސީލްކޮށް ޖުމްހޫރީ މައިދާނުގައި ޖަލްސާ ބޭއްވުމަށް ހުއްދަދެވެން ނެތް ސަބަބު ބަޔާންކޮށްދީފައިވާނެ ކަމަށް ބުނެފައިވެއެވެ. ޖުމްހޫރީ މައިދާނުގެ ބަދަލުގައި އެ ޖަލްސާ ބޭއްވުމަށް އިސްލާމީ މަރުކަޒުގެ ބޭރުގައި މާބްލްޖަހާފައިވާ ސަރަޙައްދު ހަމަޖައްސައިދެއްވާނެ ކަމަށް ހޯމް މިނިސްޓްރީއަށް އަންގާފައިވާނެ ކަމަށް ސިޓީ ކައުންސިލުން ބުނެފައިވެއެވެ.
ޖުމްހޫރީ މައިދާނުގައި ޓެންޓް ފަދަ ތަކެތި ޖެހުން މަނާކޮށްފައިވަނީ ވިނަތައް ހެއްދުމަށްޓަކައި ވަރަށް ބޮޑެތި ޚަރަދުކޮށްފައިވުމާއި، ވިނަތަކަށް އެކަށީގެންވާގޮތަށް އަވި ނުލިބޭނެހެން ޓެންޓް ޖަހާފައި ބެހެއްޓުމަކީ ވިނަގަނޑު ހަލާކުވެގެން ދާނެފަދަކަމެއްކަމަށްވާތީ ކަމަށް ސިޓީ ކައުންސިލުން ބުނެފައިވެއެވެ. އެހެންނަމަވެސް ކައުންސިލުން އަންގާފައިވާގޮތާ ޚިލާފަށް ވިނަގަނޑަށް ގެއްލުންވާނެގޮތަށް ޓެންޓް ޖެހުމާއި އެހެނިހެން މަސައްކަތް ކޮށްފައިވާތީ އެކަން ސިޓީ ކައުންސިލުން ވަނީ ކުށްވެރިކޮށްފައެވެ.
