ދަ ގްރާންޑޭ އާއި ޔޫވީގެ ކުރިމަތިލުން އެއްވަރު

ޕްރެޒިޑެންޓްސް ކަޕުގައި ހޮނިހިރު ދުވަހުގެ ހަވީރު ދަ ގްރާންޑޭ ސްޕޯޓްސް ކުލަބާއި ޔުނައިޓެޑް ވިކްޓަރީ (ޔޫޫވީ) ބައްދަލުކުރި މެޗު އެއްވަރުވެގެން ނިމިއްޖެއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު ނިމުނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.

މި މެޗުގެ ފުރަތަމަ ހާފުގައި ދެ ޓީމަށްވެސް އެންމެ އެދެވޭ ކުޅުމެއް ދެއްކިފައި ނުވާއިރު، މި ހާފުގައި ދެ ޓީމަށްވެސް ލަނޑެއް ކާމިޔާބުކުރެވިފައެއް ނުވެއެވެ. އަދި މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ދަ ގްރާންޑޭއިންނެވެ.

މެޗުގެ 62 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އަޙްމަދު އަބްދުލް ސައްތާރެވެ. އޭގެ ފަހުން ނަތީޖާ އެއްވަރުކުރަން ޔޫވީން ގިނަ ހަމަލާތަކެއް އުފެއްދިއިރު، މެޗުގެ 74 ވަނަ މިނެޓުގައި އެ ޓީމުން ވަނީ ލަނޑެއް ޖަހައި، ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލީ ހައިސަމް (ޗުމްޕު) އެވެ.

މި މެޗުން ދަ ގްރާންޑޭ އާއި ޔޫވީ އެއްވަރުވިއިރު، މި މުބާރާތުގައި ކުޅުނު ފުރަތަމަ މެޗުތަކުން އެ ދެ ޓީމުވެސް ވަނީ ބަލިވެފައެވެ. އެގޮތުން މުބާރާތުގައި ކުޅުނު ފުރަތަމަ މެޗުން ދަ ގްރާންޑޭ ވަނީ ކުލަބު ގްރީން ސްޓްރީޓްސް އަތުން 5-0 ގެ ތަފާތު ބޮޑު ނަތީޖާއަކުން ބަލިވެފައެވެ. އަދި ޔޫވީވެސް ވަނީ ކުލަބު ވެލެންސިއާ އަތުން 5-0 ގެ ތަފާތު ބޮޑު ނަތީޖާއަކުން ބަލިވެފައެވެ.

މި މުބާރާތުގައި ހޮނިހިރު ދުވަހުގެރޭ ކުޅޭ މެޗުގައި ބައްދަލުކުރާނީ ވެލެންސިއާ އާއި ގްރީން ސްޓްރީޓްސްއެވެ.