މި އަހަރުގެ އެއްބައިވަންތަކަމުގެ ދުވަސް ފާހަގަ ކުރުމުގެ ގޮތުން ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ)އާއި މޯލްޑިވްސް ރެޑްކްރެސެންޓް އަދި ކުޅުދުއްފުށީ ސިޓީ ކައުންސިލް ގުޅިގެން ކުޅުދުއްފުށީގައި ބޭއްވި ކުރެހުމާއި ލިޔުމުގެ މުބާރާތުގެ ނަތީޖާ ފާޅުކޮށް އިނާމު ދީފިއެވެ.

މިކަމަށްޓަކައި ހުކުރު ދުވަހު ކުޅުދުއްފުށީ ކައުންސިލްގައި ބޭއްވި ހަފްލާގައި ވާހަކަދައްކަވަމުން މޭޔަރު މުހައްމަދު އާތިފް ވިދާޅުވީ، އެއްބައިވަންތަކަމުގެ ދުވަހެއް ފާހަގަކުރާއިރު އެންމެ މުހިންމުކަމަކީ އެއްބައިވަންތަކަމުން ހާސިލުކުރާ ކަންތައްތައް ކަމަށެވެ.

އެގޮތުން މޭޔަރު ވިދާޅުވީ ސުނާމީ ކާރިސާ ފަދަ ކާރިސާއެއް ދިމާވާ ހާލަތުގައި މުޅި މުޖުތަމައު އެންމެ އެކަށޭނަ ގޮތުގައި ތައްޔާރު ވެގެން ތިބެންޖެހޭކަމަށާއި، މުޖުތަމައު ވިލުންވެރި މުޖުތަމައަކާ ދިމާއަށް މިސްރާބު ބަދަލުކުރަން ޖެހޭކަމަށެވެ.

އެގޮތުން ސިޓީ ޑިޒާސްޓާ މެނޭޖްމެންޓް ޕްލޭން ހެދުމަށްޓަކާ އަންނަ އަހަރުގެ ޑިވެލޮޕްމެންޓް ޕްލޭންގައި ހިމެނި ބަޖެޓްކުރެވިފައިވާ ކަމަށާއި، އަދި އެކަމުގައި އެންޑީއެމްއޭއާއެކު މަޝްވަރާތައް ކުރެވެމުންދާކަމަށް މޭޔަރު ވިދާޅުވިއެވެ.

އުންމީދުކުރަނީ އަހަރުގެ ތެރޭގައި އެ ޕްލޭންވެސް ނިމިގެންދާނެކަމަށާއި، އަދި މިހާރު އޭގެ އިތުރުން މޭކިންގ ސިޓީ ރިޒިލިއަންސް ކެމްޕެއިންއާ ގުޅޭ ގޮތުން މަޝްވަރާ ކުރެވެމުންދާކަމަށް ވެސް މޭޔަރ ވިދާޅުވި އެވެ.

މިރަސްމިްޔާތުގައި ކުރެހުމުގެ މުބާރާތުގެ ގްރޫޕް އޭ އިން އެންމެ ރީތި 3 ކުރެހުން އަދި ގްރޫޕް ބީ އަދި ސީ އިން އެންމެ ރީތި 2 ހޮވައި އިނާމް ދީފައިވެއެވެ. އަދި ލިއުމުގެ މުބާރާތުން ކޮންމެ ގްރޫޕަކުންވެސް ހޮވާފައިވަނީ އެންމެ މޮޅު 2 ލިއުމެވެ.

ކުޅުދުއްފުށީގެ ކޮވިޑްގެ ޕޮޒިޓިވް ކޭސްތަކާއި ގުޅިގެން އެއްބައިވަންތަ ކަމުގެ ދުވަހާއި ގުޅިގެން ބާއްވަން ނިންމި ވިލުވެރި ފެސްޓިވަލް ވަނީ ކެންސަލްކޮށްފައެވެ. އަދި އެއްބައިވަންތަ ކަމުގެ ދުވަހު ބޭއްވުމަށް ހަމަޖެހިފައިވާ ޔުނިޓީ ރަންވެސް މިހާރުވަނީ ފަސްކޮށްފައެވެ.