މާލެއިން ޕޮޒިޓިވްވި 49 މީހުންނާއެކު އިތުރު 120 މީހުން ކޮވިޑަށް ޕޮޒިޓިވްވެއްޖެ
އެކްޓިވް ކޭހުގެ ގޮތުގައި ގުނަމުން އަންނަނީ 1939 ކޭހެއް
ކޮވިޑް އަށް ޓެސްޓު ކުރުމަށް ސާމްޕަލް ނެގުން
އިތުރު 120 މީހުން ރާއްޖެއިން ކޮވިޑް-19ށް ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ޕޮޒިޓިވްވި 120 މީހުންގެ ތެރެއިން އެންމެ ގިނަ މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އެއީ 49 މީހުންނެވެ. އަތޮޅުތަކުން 36 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 35 މީހުން ކޮވިޑަށް ޕޮޒިޓިވްވެފައިވެއެވެ. މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 94،564ށް އަރާފައެވެ. މީގެތެރެއިން 92،351 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި ގުނަމުން އަންނަނީ 1939 ކޭހެކެވެ. މީގެތެރެއިން 12 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
ރާއްޖެއިން މިހާތަނަށް 261 މީހުން ވަނީ މިބަލީގައި ނިޔާވެފައެވެ.
ރާއްޖޭގެ ކޮވިޑްގެ ހާލަތަށް ބަލާއިރު، ދުނިޔޭގައި މިހާރު ފެތުރެމުން އަންނަ ކޮވިޑް-19ގެ އައު ވޭރިއެންޓްކަމުގައިވާ އޮމިކްރޯންގެ އިތުރު 4 ކޭސް ރާއްޖެއިން ވަނީ ފެނިފައެވެ.
