"އެންޒެޑް އިންޓަރ އޮފީސް ފުޓްސަލް ޗެލެންޖް 2021" ދިއްދޫގައި ފަށަނީ
24 ޑިސެމްބަރު 2021 | ހުކުރު 18:16ބައިވެރިވެވޭނެ އެންމެ ފަހުގެ ތާރީޚަކީ 30 ޑިސެމްބަރ 2021ގެ ރޭގަނޑު 21:00ގެ ކުރިން
ދިއްދޫގައި ކުރިއަށް ގެންދެވުނު ފުޓްބޯޅަ މުބާރާތެއްގެ ތެރެއިން
ހއ. ދިއްދޫ މިޑްލް ސްޕޯރޓްސް ކުލަބާއި ހއ. ދިއްދޫ ކައުންސިލް ގުޅިގެން ކުރިއަށް ގެންދިއުމަށް ހަމަޖެހިފައިވާ "އެންޒެޑް އިންޓަރ އޮފީސް ފުޓްސަލް ޗެލެންޖް 2021” ބޭއްވުމަށް ހަމަޖެހިއްޖެއެވެ.
މިޑްލް ސްޕޯރޓްސް ކުލަބުން ހާމަކޮށްފައިވާ ގޮތުގައި މި މުބާރާތަކީ ދިއްދޫގައި ހުންނަ ސަރުކާރުގެ އޮފީސްތަކާއި މުއައްސަސާތަކާއި ސަރުކާރު ޙިއްސާވާ ކުންފުނިތަކުގެ މެދުގައި ބޭއްވޭ މުބާރާތެކެވެ. މި މުބާރާތް ފުރަތަމަ ފެށުމަށް ހަމަޖެހިފައިވަނީ ޑިސެމްބަރ 9 ވަނަ ދުވަހުއެވެ. ނަމަވެސް ދިއްދޫގައި ހަލުވި ކަމާއިއެކު ކޮވިޑް ފެތުރެމުން ދިއުމުގެ ސަބަބުން ވަނީ ފަސްކޮށްފައެވެ. އެގޮތުން މި މުބާރާތް މިހާރު ފެށުމަށް ހަމަޖެހިފައިވާ ތާރީޚަކީ 2022 ވަނަ އަހަރުގެ ޖެނުއަރީ މަހުގެ 20ވަނަ ދުވަހެވެ. މިޑްލް ސްޕޯރޓްސް ކުލަބުން ހާމަކޮށްފައިވާ ގޮތުގައި މި މުބާރާތް ބޭއްވުމުގެ މައިގަނޑު މަޤުސަދަކީ ދިއްދޫގައި ހުރި ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުންގެ މެދުގައި ކުޅިވަރުގެ ރޫޙު އާލާކޮށް އެކުވެރިކަން ދެމެހެއްޓުމެވެ.
މި މުބާރާތުގައި ބައިވެރިވާން ބޭނުންވާ އޮފީސްތަކުގެ ޓީމުތަކަށް، ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. އެގޮތުން ބައިވެރިވުމަށް އެދޭ ފޯރމާއި ކުޅުންތެރިންގެ ލިސްޓް 30 ޑިސެމްބަރ 2021 ގެ ރޭގަނޑު 21:00ގެ ކުރީން ކުލަބުގެ އިދާރާއަށް ނުވަތަ ކުލަބުގެ ރަސްމީ މެއިލް އަށް ފޮނުވުމަށް އެ ކުލަބުން އެދިފައިވެއެވެ.
މި މުބާރާތާއި ގުޅޭ އިތުރު މައުލޫމާތު ހޯދަން ބޭނުންފުޅުވާ ފަރާތްތަކުން 7656766 މި ނަމްބަރަށް ގުޅުއްވުމަށް އެ ކުލަބުން އެދިފައިވެއެވެ.
