ކޮވިޑްގެ ހާލަތު ރަނގަޅުވުމުން ދިވެހިންނަށް ބަންގްލަދޭޝްގެ އޮން އެރައިވަލް ވިސާ ލިބޭނެ
24 ޑިސެމްބަރު 2021 | ހުކުރު 06:35ރަސްމީ ވާހަކަފުޅުތަކަށްފަހު ދެގައުމުގެ ދެމެދުގައި 4 އެއްބަސްވުމެއް ވަނީ ބަދަލުކުރައްވާފައި
ވިސާ ދިނުން ހުއްޓާލީ ކޮވިޑްގެ ސަބަބުން
ކޮވިޑްގެ ހާލަތު ރަނގަޅުވުމުން ދިވެހިންނަށް ބަންގްލަދޭޝްގެ އޮން އެރައިވަލް ވިސާ ލިބޭނެކަން އެ ގަައުމުން ހާމަކޮށްފިއެވެ.
ބަންގްލަދޭޝްގެ ބޮޑުވަޒީރު ޝެއިޚް ހަސީނާ ރާއްޖެއަށް ކުރެއްވި ފުރަމާނަ ދަތުރުފުޅުގެ ތެރެއިން ބޭއްވެވި ރަސްމީ މަޝްވަރާތަކަށްފަހު ދެއްވި ގުޅިފައިވާ ބަޔާނުގައި އެކަމަނާ ވިދާޅުވީ، ކޮވިޑްގެ ހާލަތު ރަނގަޅުވެ އާއްމު ހާލަތަށް ރުޖޫއަވުމާއެކު ދިވެހިންނަށް ބަންގްލަދޭޝްގެ އޮން އެރައިވަލް ވިސާ ލިބިގެންދާނެ ކަމަށެވެ. އަދި ދިވެހި ކިޔަވާ ކުދިންނަށް ދިގު މުއްދަތަކަށް ވިސާ ދިނުމާ ގުޅޭ ގޮތުން ވެސް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއެކު މަޝްވަރާ ކުރައްވާފައިވެއެވެ.
ބަންގްލަދޭޝްއިން ރާއްޖެއަށް އޮން އެރައިވަލް ވިސާ ދިނުން ހުއްޓާލާފައިވަނީ މިދިޔަ އަހަރުގެ މާޗް މަހުގެ ތެރޭގައި ކޮވިޑް-19ގެ ސަބަބުންނެވެ. އެގޮތުން އެގައުމުން އޮން އެރައިވަލް ވިސާގެ ޚިދުމަތް ދޭ ހުރިހާ ގައުމަކަށް ވެސް އެ ޚިދުމަތް ދިނުން މެދުކަނޑާލިއެވެ.
ރާއްޖެއާއި ބަންގްލަދޭޝް ސަރުކާރާ ދެމެދުގައި ރަސްމީ ވާހަކަފުޅުތަކަށްފަހު ދެގައުމުގެ ދެމެދުގައި 4 އެއްބަސްވުމެއް ވަނީ ބަދަލުކުރައްވާފައެވެ.
ދިވެހިރާއްޖެއާއި ބަންގްލަދޭޝްއާ ދެޤައުމުގެ ދެމެދުގައި ބަދަލުކުރެވުނު އެއްބަސްވުންތަކަކީ "މެމޮރަންޑަމް އޮފް އަންޑަސްޓޭންޑިންގ އޮން ދަ ރިކްރޫމަންޓް އޮފް ކޮލިފައިޑް ހެލްތް ޕްރޮފެޝަނަލްސް" އާއި، "ރިނިއުވަލް އޮފް މެމޮރަންޑަމް އޮފް އަންޑަސްޓޭންޑިންގ އިން ދަ އޭރިއާސް އޮފް ހެލްތްކެއަރ އެންޑް މެޑިކަލް ސައިންސް" އާއި، "މެމޮރަންޑަމް އޮފް އަންޑަސްޓޭންޑިންގ އޮން ކޯޕަރޭޝަން އިން ދަ އޭރިއާ އޮފް ޔޫތް އެންޑް ސްޕޯޓްސް ޑިވެލޮޕްމަންޓް" އާއި އަދި ދިވެހި ސަރުކާރާއި ބަންގްލަދޭޝް ސަރުކާރާ ދެމެދު ޓެކްސްއަށް މަކަރު ހެދުމުގެ ފުރުޞަތު ނައްތާލުމަށާއި، ޑަބަލް ޓެކްސޭޝަން ނައްތާލުމަށް ހެދި އެގްރީމަންޓެވެ. މި އެއްބަސްވުންތަކުގެ އިތުރުން ބަންގްލަދޭޝްއިން ރާއްޖެއަށް ހަދިޔާކުރި އަސްކަރީ އުޅަނދުތަކުގެ ތަޅުދަނޑި ރަމްޒީގޮތުން ހަވާލުކޮށްދެއްވުން ކުރިއަށް ގެންގޮސްފައިވެއެވެ.
ދެ ލީޑަރުންގެ ގުޅިފައިވާ ބަޔާނުގައި ޒަމާންވީ ތާރީޚީ ގުޅުމާއި ދެ ގައުމުން ގަބޫލުކުރާ އެއްގޮތް އުސޫލުތަކާއި އާދަކާދަތަކާއި އަދި ހިއްސާކުރާ އެއްގޮތް ކަންތައްތަކުގެ މައްޗަށް އަލިއަޅުވާލައްވާފައިވެއެވެ.
މީގެ އިތުރުން ބަންގްލަދޭޝްގެ ބޮޑުވަޒީރުގެ އަރިހަށް ރައީސުލްޖުމްހޫރިއްޔާގެ ނާއިބު ވަނީ އިހުތިރާމްގެ ޒިޔާރަތެއް ކުރައްވާފައެވެ. އަދި، ބަންގްލަދޭޝްގެ ބޮޑުވަޒީރާއި އިސްވެރިންގެ ވަފްދުގެ ޝަރަފުގައި ރައީސުލްޖުމްހޫރިއްޔާ ވަނީ ރަސްމީ ޖާފަތެއް ވެސް ބާއްވަވާފައެވެ.
