އިންޑިއާ އައުޓްއޭ ރައީސް ޔާމީން ގޮވަނީ ރައްޔިތުންގެ ހިތުގައި ޤައުމަށް އޮތް ލޯބި، ހަތިޔާރެއްގެ ގޮތުގައި ބޭނުން ކުރެއްވުމަށް: ރޮޒެއިނާ
އިންޑިއާ އައުޓް ޓީޝާޓެއް ލައިގެން ކުރީގެ ރައީސަކު ނިކުތުމުން އެ މަންޒަރު ވަރަށް ހުތުރު
ރޮޒެއިނާ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަނީ
ކުރީގެ ރައީސް އަބްދުﷲ ޔާމީން އިންޑިއާ އައުޓް ކެމްޕެއިން ފައްޓަވައިގެން އުޅުއްވަނީ ދައްކާނެ ވާހަކައެއް ނެތުމުން ރައްޔިތުންގެ ހިތުގައި ޤައުމަށް އޮތް ލޯބި ހަތިޔާރެއްގެ ގޮތުގައި ބޭނުން ކުރެއްވުމުގެ މަޤްޞަދުގައި ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ރޮޒެއިނާ ވިދާޅުވީ، އިންޑިއާ އައުޓް ޓީޝާޓެއް ލައިގެން ކުރީގެ ރައީސަކު ނިކުތުމުން ދެ ޤައުމުގެ ދެމެދު ހަމަނުޖެހުން އުފެދިގެންދާނެ ކަމަށެވެ. އަދި އެއީ އެއްވެސް ހާލެއްގައި ސިޔާސީ ބޭނުމެއް ހާސިލް ކުރެއްވުމަށްޓަކައި ވެސް ކުރަން ނުޖެހޭ ކަންތައްތައް ކަމަށް ވެސް ރޮޒެއިނާ ވިދާޅުވިއެވެ.
އެންމެ ވާދަވެރި ޤައުމުތަކުގައި ވެސް މިފަދަ ހަރަކާތްތައް ކުރިއަށް ނުގެންދާކަން ފާހަގަކުރައްވައި ރޮޒެއިނާ ވިދާޅުވީ، އިންޑިއާ އައުޓްއޭ ކިޔައިގެން ނިކުންނަން ޖެހޭ އެއްވެސް ސަބަބެއް ނެތް ކަމަށެވެ. އަދި ރައްޔިތުންނަށް މުޅި މަންޒަރު އޮޅުވާލެއްވުމަށް ރައީސް ޔާމީން މަސައްކަތް ކުރައްވާ ކަމަށް ވެސް ވިދާޅުވިއެވެ.
އަދި މިހާރު އެ ކުރައްވާ ކަންތައްތަކަކީ ދިވެހި ރައްޔިތުންނަށް އޮޅުވާލައްވައިގެން އިންޑިއާއާ މެދު ރައްޔިތުންގެ މެދުގައި ނަފްރަތުކަން އުފައްދަން ކުރާ ކަމެއްގެ ގޮތުގައި ރޮޒެއިނާ ވަނީ ސިފަކުރައްވާފައެވެ.
މިހާރު އެކި ޕޯޑިއަމްތަކަށް އަރުއްވައިގެން ރައީސް ޔާމީނުގެ ވެރިކަމުގެ ޚިޔާލުފާޅު ކުރުމުގެ މިނިވަންކަން ދީފައިވާކަމަށް ވަކާލާތު ކުރައްވަމުންދާއިރު، އޭރު ކަންތައްތައް ކުރެއްވި ގޮތް ޔާމީން ހަނދުމަފުޅު ނެތީތޯ ވިދާޅުވެ ރޮޒެއިނާ ވަނީ ސުވާލު އުފައްދަވާފައެވެ.
ރައީސް ޔާމީންގެ ވެރިކަމުގައި އޭރު ޕޭވްމަންޓްމަތީގައި ވެސް ޚިޔާލުފާޅުކުރުމުގެ މިނިވަންކަމަކީ ކުށަކަށްވާ ކަމަށާއި، ނޫސްވެރިން އެއްޗެއް ޖެހުމުން މިލިއަނުން ޖޫރިމަނާ ކުރާ ކަމަށް ވެސް ވިދާޅުވިއެވެ. އަދި އެކަމުގެ ވިކްޓިމަކަށް ރާއްޖެޓީވީ ވާނެކަމަށް ރޮޒެއިނާ ވިދާޅުވިއެވެ.
އޭރު މީހުންގެ މައްޗަށް އިންތިހާއަށް އަބުރުގެ ދައުވާ ކުރެވޭ ކަމަށާއި އެއީ ރައްޔިތުންނަށް އަނިޔާވެރި ސަރުކާރެއް ކަމަށް ރޮޒެއިނާ ވިދާޅުވިއެވެ.
ރޮޒެއިނާ އިތުރަށް ވިދާޅުވީ ރައީސް ޔާމީނަކީ ސުޕްރީމް ކޯޓުން ޓިނު ނެންގެވި ބޭފުޅެއް ކަމަށާއި، މީހަކު ވެރިކަމާހެދި މޮޔަވެއްޖެނަމަ، ވީ ކަމެއް ނުވާކަމަކަށް ހަދައިގެން ލަދެއް ހަޔާތެއް ނެތި އުޅެން ފަށާ ކަމަށެވެ.
ޚިޔާނާތުގެ އެތައް މައްސަލަތަކެއް އަދިވެސް އެމަނިކުފާނުގެ މައްޗަށް ތުހުމަތު ކުރެވިފައިވާއިރު، ލިބުނު ކުޑަ ވަގުތުކޮޅުގެ ބޭނުން ހިފައިގެން ފިތުނަ ފަސާދަ އުފައްދަވަން މަސައްކަތް ކުރައްވާ ކަމަށް ރޮޒެއިނާ ވިދާޅުވިއެވެ.
