ކުޅުދުއްފުށީ އުތުރު ބަނދަރުގައި ޕެވީލިއަނެއް ތަރައްޤީކުރަން ކައުންސިލުން ނިންމައިފި
23 ޑިސެމްބަރު 2021 | ބުރާސްފަތި 05:37މި ޑިޒައިނާ އެއްގޮތަށް ބަޔަކާ މަސައްކަތް ހަވާލުކުރުމަށް ކައުންސިލް މެންބަރުންގެ އިއްތިފާގުން ވަނީ ނިންމާފައި
އުތުރު ބަނދަރުގައި ތަރައްޤީ ކުރާ ޕެވީލިއަންގެ ކުރެހުން
ކުޅުދުއްފުށީ އުތުރު ބަނދަރު ސަރަހައްދުގައި ޕެވީލިއަނެއް ތަރައްޤީކުރުމަށް ކުޅުދުއްފުށީ ސިޓީ ކައުންސިލުން ނިންމައިފިއެވެ.
އުތުރު ބަނދަރުގައި ހެދި ދަތުރުހިޔާ ހުޅުވުމުގެ ރަސްމިއްޔާތުގައި ވެސް މޭޔަރު ވަނީ އެ ސަރަހައްދު އިތުރަށް ތަރައްގީކުރުމަށް ހަމަޖެހިފައިވާކަމަށް ވިދާޅުވެފައެވެ.
ކުޅުދުއްފުށީ ސިޓީ ކައުންސިލުން މައުލޫމާތު ދިންގޮތުގައި ބުދަ ދުވަހު ބޭއްވި ކައުންސިލް ބައްދަލުވުމުގައި ނިންމީ ދަތުރުހިޔާގެ ދެ ފަރާތުގައި ފިނިމައިޒާނަކަށް ވާގޮތަށް ޕެވީލިއަނެއް ތަރައްޤީ ކުރުމަށެވެ. އަދި އެތަނުގެ ކޮންސެންޕް ޑިޒައިން ތައްޔާރުކުރީ ކައުންސިލް މެމްބަރު ރިލްވާން މުހައްމަދު ކަމަށް ވެސް ކައުންސިލުން މައުލޫމާތު ދެއެވެ. އަދި މި ޑިޒައިނާ އެއްގޮތަށް ބަޔަކާ މަސައްކަތް ހަވާލުކުރުމަށް ކައުންސިލް މެންބަރުންގެ އިއްތިފާގުން ނިންމާފައިވާކަމަށް ވެސް މައުލޫމާތު ދެއެވެ.
މި ޑިޒައިނާ ބެހޭގޮތުން ކައުންސިލް މެންބަރ ރިލްވާން ވިދާޅުވީ، އެތަނުގެ ފުރާޅު އެގޮތަށް ޑިޒައިންކޮށްފައިވަނީ ކުރިއަށްއޮތްތަނުގައި ސޯލާ ހަރުކުރަން ނިންމާފައިވާތީ ކަމަށެވެ. އަދި ޕެވީލިއަން ޑިޒައިންކުރަމުންދިޔައިރު ވަރަށް ބޮޑަށް ތިމާވެއްޓާ ރައްޓެހި ގޮތަކަށް ވިސްނާފައިވާކަމަށާއި، އެގޮތުން ގަސް އިންދާނެ ވަކި ތަންތަން ކަނޑައަޅާފައި ހުންނާނެ ކަމަށް ވިދާޅުވިއެވެ.
