ގައުމީ ފުޓްބޯޅަ ޓީމުގެ ޒުވާން ދެ ފޯވާޑުން ކަމަށްވާ މުޙައްމަދު ނާއިމް އާއި މުޙައްމަދު ޖައިލަމް (އޮގީ) ދެ އަހަރު ތެރޭ ކަކުލުގެ ދެ އޮޕަރޭޝަނެއް ކޮށްފިއެވެ.

ނާއިމުގެ ކަކުލަށް އެންމެ ފުރަތަމަ އަނިޔާވީ 2019 ވަނަ އަހަރުގެ އޮކްޓޯބަރު މަހު ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން 1-0 ގެ ނަތީޖާއަކުން އީގަލްސް މޮޅުވި މެޗުގައެވެ. އަދި އޮގީއަށް އަނިޔާވީ އެ އަހަރުގެ ޑިސެމްބަރު މަހު ދިވެހި ޕްރިމިއާ ލީގުގައި އީގަލްސް އަތުން 3-2 ގެ ނަތީޖާއަކުން ފޯކައިދޫ ޓީމު މޮޅުވި މެޗުގައެވެ.

އެއާއެކު ނާއިމް އާއި އޮގީ އެންމެ ފުރަތަމަ ކަކުލުގެ އޮޕަރޭޝަނެއް ކުރީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. އެއަށްފަހު އަނެއްކާވެސް ލިބުނު އަނިޔާއަކާ ގުޅިގެން މިދިޔަ ބުދަ ދުވަހު އެދެ ކުޅުންތެރިން ވަނީ އޭޑީކާ ހޮސްޕިޓަލުގައި ކަކުލުގެ ދެވަނަ އޮޕަރޭޝަނެއް ކޮށްފައެވެ.

އީގަލްސްއަށް ކުޅެމުން އަންނަ ނާއިމުގެ ކަކުލަށް މި ފަހަރު އަނިޔާވީ މި ފަހުން މާލޭގައި ބޭއްވި ސާފް ޗެމްޕިއަންޝިޕަށް ތައްޔާރުވާން ގަތަރުގައި ކުރިއަށްގެންދިޔަ ކޭމްޕުގެ ތެރެއިން ގަތަރުގެ އާމީ ނެޝަނަލް ޓީމާ ދެކޮޅަށް ކުޅުނު މެޗުގެ ތެރެއިންނެވެ. އަދި ކުލަބު ގްރީން ސްޓްރީޓްސްއަށް ކުޅެމުން އަންނަ އޮގީ އަށް އަނިޔާވީ 23 އަހަރުން ދަށުގެ ގައުމީ ޓީމާއެކު 23 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގައި ވާދަކުރަމުން އަންނަނިކޮށެވެ.

މި ފަހަރު ލިބުނު ލިބުނު އަނިޔާއާ ގުޅިގެން ނާއިމް އާއި އޮގީ ކަކުލުގެ އޮޕަރޭޝަނެއް ކުރަން ޖެހުމުން، އެ ދެ ކުޅުންތެރިންނަށްވެސް މި ސީޒަނުގެ ގިނަ މެޗުތަކެއް ގެއްލޭނެއެވެ.