ކޮވިޑް-19ށް އިތުރު 121 މީހުން ޕޮޒިޓިވް
1927 އެކްޓިވް ކޭސް ހިމެނޭ
މާލޭގެ މަގުމަތި
ކޮވިޑް-19ށް އިތުރު 121 މީހުން ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ބުނީ، އަންގާރަ ދުވަހުގެ އިރުއޮއްސި 6:00ން ބުދަ ދުވަހުގެ އިރުއޮއްސި 6:00ށް 4،381 ސާމްޕަލް ނަގާފައިވާ ކަމަށާއި، އޭގެ ތެރެއިން 121 މީހުން ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 37 މީހުންނާއި، އަތޮޅުތެރެއިން 50 މީހުންނާއި އަދި ހިންގަމުންދާ ރިސޯޓުތަކުން 34 މީހުންނެވެ.
1927 އެކްޓިވް ކޭސް ހިމެނޭއިރު، 15 މީހަކަށް ހޮސްޕިޓަލްގައި އެޑްމިޓް ކޮށްގެން ފަރުވާ ދެމުން ދާކަމަށް އެޗްޕީއޭއިން ބުނެއެވެ.
އެޗްޕީއޭއިން ބުނީ މިހާތަނަށް 94،299 މީހުން ޕޮޒިޓިވްވެފައިވާ ކަމަށާއި، 92،099 މީހުން ބަލިން ރަނގަޅުވެފައިވާ ކަމަށެވެ. 260 މީހުން މިބަލީގައި ނިޔާވެފައިވެއެވެ.
ރާއްޖޭގެ ކޮވިޑްގެ ހާލަތަށް ބަލާއިރު، ދުނިޔޭގައި މިހާރު ފެތުރެމުން އަންނަ ކޮވިޑް-19ގެ އައު ވޭރިއެންޓްކަމުގައިވާ އޮމިކްރޯންގެ އިތުރު 4 ކޭސް ރާއްޖެއިން ވަނީ ފެނިފައެވެ. އެކަމުގެ އިތުރު ތަފްސީލް ދެއްވަމުން އެޕިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވީ، އޮމިކްރޯނަށް ޕޮޒިޓިވްވެފައި ވަނީ ރާއްޖެއަށް ޒިޔާރަތްކުރި ފަތުރުވެރިންތަކެއް ކަމަށެވެ. އަދި މި މީހުންނަކީ އެފްރިކާގެ ދެކުނު ގައުމުތަކަށް މިފަހުން ދަތުރުކޮށްފައިވާ މީހުން ކަމަށެވެ.
