މި އަހަރުގެ އެއްބައިވަންތަކަމުގެ ދުވަސް ފާހަގަ ކުރުމުގެ ގޮތުން ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ)އާއި މޯލްޑިވްސް ރެޑްކްރެސެންޓް އަދި ކުޅުދުއްފުށީ ސިޓީ ކައުންސިލާ ގުޅިގެން ކުޅުދުއްފުށީގައި ޚާއްސަ ފެސްޓިވަލެއް ކުރިއަށް ގެންދިއުމަށް ނިންމައިފިއެވެ.

"ވިލުންވެރި" ނަމުގައި ކުރިއަށްގެންދާ މި ފެސްޓިވަލްގެ ތެރެއިން އާންމުކޮށް ހުޅުވާލައިގެން، ކުރެހުމާއި ލިއުމުގެ މުބާރާތެއްވެސް ކުރިއަށް ގެންދިއުމަށް ވަނީ ނިންމާފައެވެ.

މިކަމާގުޅިގެން އެންޑީއެމްއޭއިން ބުނީ މި ކުރެހުމާއި، ލިއުމުގެ މުބާރާތް ކުރިއަށް ގެންދިޔުމަށް ހަމަޖެހިފައިވަނީ އުމުރުން 7 އަހަރާ 25 ދެމެދުގެ މީހުންނަށެވެ. އެގޮތުން ތީމަކީ "ޔުނިޓް ޓު މިޓިގޭޓް އެންޑް ޕްރިޕެއާރ ފޮރ ދަ އިމްޕެކްޓްސް އޮފް ކްލައިމެޓް ޗޭންޖް އެންޑް ޑިޒާސްޓަރ" އެވެ. ދެ މުބާރާތްވެސް ކުރިއަށް ދާނީ މި ތީމްގެ މައްޗަށެވެ.

ކުރެހުމުގެ މުބާރާތް ކުރިއަށް ގެންދަން ނިންމާފައިވަނީ އުމުރުފުރާތައް 3 ގެޓަގަރީއަކަށް ބަހާލައިގެންނެވެ. އެގޮތުން 7 އަހަރާ 11 އަހަރާ ދެމެދުގެ ކުދިން ހިމެނެނީ ގްރޫޕް އޭ ގައެވެ. އަދި 12 އަހަރާ 16 އަހަރާ ދެމެދުގެ ކުރިން ގްރޫޕް ބީ ގައި، އަދި 17 އަހަރާ 25 އަހަރާ ދެމެދުގެ މީހުން ގްރޫޕް ސީ ގައެވެ.

ލިއުމުގެ މުބާރާތް ކުރިއަށް ގެންދަނީ 2 ކެޓަގަރީއަކަށް ބަހާލައިގެންނެވެ. އެއީ ގްރޫޕް އޭ ގައި 12 އަހަރާއި 16 އަހަރާއި ދެމެދުގެ ކުދިން، އަދި ގްރޫޕް ބީ ގައި 17 އަހަރާއި 25 އަހަރާއި ދެމެދުގެ މީހުންނަށެވެ.

މި ދެ މުބާރާތުގެ ނަތީޖާ ފާޅުކުރުން އޮންނާނީ ވިލުންވެރި ފެސްޓިވަލްގެ ތެރެއިން އަންނަ ހުކުރު ދުވަހު އޮންނަ ހާއްސަ ހަވީރެއްގަ އެވެ. މި ހަވީރު އޮންނާނީ އަމީރު އަމީން ސްކޫލުގައެވެ. ކުރެހުންތަކާއި ލިއުންތައް ހުށައަޅަން ޖެހޭނީ ފެސްޓިވަލްގައި ހުންނަ ސްޓޯލްއަށް ހުކުރު ދުވަހު 4:30 ވުމުގެ ކުރިންނެވެ.

ކުރެހުމުގެ މުބާރާތުގެ ނަތީޖާ ފާޅުކުރަން ނިންމާފައިވަނީ ގްރޫޕް އޭ އިން އެންމެ ރީތި 3 ކުރެހުން އަދި ގްރޫޕް ބީ އަދި ސީ އިން އެންމެ ރީތި 2 ކުރެހުމެވެ. ލިއުމުގެ މުބާރާތުން ކޮންމެ ގްރޫޕަކުންވެސް ހޮވާނީ އެންމެ މޮޅު 2 ލިއުމެވެ.

މިފަދަ ފެސްޓިވަލެއްގެ މަގުސަދަކީ ކުޑަކުދިންނަށް މޫސުމުގެ ސަބަބުން ރާއްޖެއަށާއި ދުނިޔެއަށް އަންނަ ބަދަލުތަކަށް އަހުލުވެރިކުރުންކަމަށް އެންޑީއެމްއޭއިން މައުލޫމާތު ދެއެވެ.