މާލިއްޔަތު ގާނޫނާއި މާލިއްޔަތު ގަވައިދާ ހިލާފު އަށް ލައްކަ އަށް ވުރެ ގިނަ ރުފިޔާ މައްސަލަ އެޗްއާރްސީއެމްގެ އޮޑިޓް ރިޕޯޓުން ފެންމަތިވެއްޖެ އެވެ. 

ހިއުމަން ރައިޓްސް ކޮމިޝަން އޮފް ދަ މޯލްޑިވްސް އެޗްއާރްސީއެމްގެ 2016 ވަނަ އަހަރުގެ އޮޑިޓް ރިޕޯޓުގައި ބުނެފައިވަނީ، މިދިޔަ އަހަރުގެ ބަޖެޓުގައި ޓޯޗަރ ޕްރިވެންޝަން ޕްރޮޖެކްޓެއްގެ ގޮތުގައި ހިއުމަން ރައިޓްސް ކުއިޒް ޕްރޮގްރާމެއް ކުރިއަށްގެންދިޔަ އިރު އެ ޕްރޮގްރާމަކީ ބަޖެޓުގައި ހިމެނިފައިވާ ޕްރޮގްރާމެއް ނޫން ކަމަށެވެ. އެހެން ނަމަވެސް މި ހަރަކާތް ކުރިއަށް ގެންދިއުމަށް އެ ކޮމިޝަނުގެ ބަޖެޓުން 88،000 ރ. ބޭނުން ކޮށްފައިވާ ކަމަށާއި މި ހަރަދު ކުރުމުގެ ކުރިން އެ ކޮމިޝަނުން ފިނޭންސް މިނިސްޓްރީގެ ހުއްދަ ހޯދާފައިނުވާ ކަމަށް އޮޑިޓް ރިޕޯޓުގައި ފާހަގަކޮށްފައިވެ އެވެ.

ހިއުމަން ރައިޓްސްއާ ގުޅޭ ކޯހެއް ފުރިހަމަކުރުމަށް 2014 ވަނަ އަހަރު އެ ކޮމިޝަނުގެ މުވައްޒަފަކަށް ފުރުސަތު ދީފައިވާ ކަމަށާއި ކަނޑައަޅާފައިވާ މުއްދަތުގެ ތެރޭގައި މުވައްޒަފަށް ކޯސް ފުރިހަމަ ނުކުރެވޭއިރު، ކޮމިޝަނުން ހަރަދު އަނބުރާ ދައްކަން ނުޖެހޭ ކަމަށް ކޮމިޝަނުން ނިންމި ކަމަށް އޮޑިޓް ރިޕޯޓްގައިވެ އެވެ. އެ ފައިސާ އަނބުރާ ނުހޯދުމަށް ކޮމިޝަނުގެ މެންބަރުން ނިންމި ނިންމުމަކީ މާލިއްޔަތު ގަވައިދާ ފުށުއަރާ ނިންމުމެއް ކަމަށް އޮޑިޓް ރިޕޯޓުގައި ފާހަގަކޮށްފައިވެ އެވެ. ދައުލަތަށް ލިބެންޖެހޭ ފައިސާއެއް ނުނަގާ ގޮތަށް ހަމަޖެއްސޭނީ، އޮޑިޓަރ ޖެނެރަލް ކަނޑައަޅާގޮތެއްގެ މަތިން ފިނޭންސް މިނިސްޓްރީން ކަމާބެހޭ ހިސާބުތަކުގައި ހިމެނުމަށްފަހު ރައީސުލްޖުމްހޫރިއްޔާގެ ހުއްދަ ލިބިގެން ކަމަށް މާލިއްޔަތު ގަވައިދުގައި ކަނޑައަޅާފައިވާ ކަމަށް އޮޑިޓަރ ޖެނެރަލްގެ އޮފީހުން ބުނެ އެވެ.

ހިއުމަން ރައިޓްސް ކޮމިޝަނުން 20 ހާސް ރުފިޔާގެ އަގު ހުރި ލެޕްޓޮޕަކާއި ޕްރޮޖެކްޓަރެއް ގެއްލިފައިވާ އިރު އެ މައްސަލަ ފުލުހުންނަށް ހުށަހަޅާފައިނުވާ ކަމަށް އޮޑިޓް ރިޕޯޓުގައި ބުނެފައިވެ އެވެ. މި ލެޕްޓޮޕާއި ޕްރޮޖެކްޓަކީ ވަކި މުވައްޒަފެއްގެ ބެލުމުގެ ދަށުގައި ހުރި ތަކެތި ކަމަށް އެ ކޮމިޝަނުން ބުނި ނަމަވެސް، ދައުލަތުގެ މާލިއްޔަތު ގަވައިދުގައި ކަނޑައަޅާފައިވާ ގޮތަށް ވަކި މުވައްޒަފަކާއި ހަވާލުކޮށް ސޮއިކުރުވާފައިނުވާ ކަމަށް އޮޑިޓް ރިޕޯޓުގައި ބުނެ އެވެ. މިގޮތަށް ވަކި މުވައްޒަފެއްގެ ބެލުމުގެ ދަށުގައިވާ މުދާ، އެ މުވައްޒަފަކާއި ހަވާލު ކުރެވޭ އިރު ސޮއިކުރެވިފައިނުވާ ނަމަ، އެ މުދަލަށް ލިބޭ ގެއްލުމަކަށް އެ މުވައްޒަފަކު ޒިންމާ ކުރެވޭނެ ގޮތެއް ނެތުމަކީ އެކަށީގެންވާ ކަމެއް ކަމަށް އޮޑިޓް ރިޕޯޓުގައި ބުނެ އެވެ.

މިދިޔަ އަހަރު ނިމުނު އިރު،  ހަރު މުދަލުގެ ގޮތުގައި ހިމަނާފައިވާ އަދަދާއި ހަރުމުދަލުގެ ރަޖިސްޓްރީގައި ހިމަނާފައިވާ އަދަދާ ދެމެދު 5 ލައްކަ ރުފިޔާގެ ފަރަގު ހުރި ކަމަށް އޮޑިޓް ރިޕޯޓުން ދައްކަ އެވެ. މިއީ ވެސް މާލިއްޔަތު ގަވައިދުގައި ކަނޑައަޅާފައިވާ މިންގަނޑުތަކާ ހިލާފު ކަމެއް ކަމަށް އޮޑިޓަރ ޖެނެރެލްގެ އޮފީހުން ބުނެ އެވެ.

އޮޑިޓަރ ޖެނެރަލް ވަނީ ދައުލަތުގެ މާލިއްޔަތު ގާނޫނާއި ގަވައިދާ އެއްގޮތްވާ ގޮތުގެ މަތިން މާލީ ނިޒާމުގެ ތެރެއިން ކުރަން ޖެހޭ ހުރިހާ ކަމެއް ކުރުމަށް އެޗްއާރްސީއެމަށް އަންގައިފަ އެވެ.