ޕްލާސްޓިކް ހުސްފުޅި އެއްކުރުމަށް އަފީފުއްދީން ސްކޫލުން ކުރިއަށްގެންދިޔަ "އެއާރ ޗެލެންޖް"ގެ ދެވަނަ ބުރު ނިންމާލައިފިއެވެ.
އެ ސްކޫލުން "އެއާރ ޗެލެންޖް"ގެ ދެވަނަ ބުރު ހުޅުވާލީ ޑިސެމްބަރުމަހުގެ 9 ވަނަ ދުވަހު އެވެ. އެ މުއްދަތުގައި ސްކޫލުން ވަނީ 108708 ހުސްފުޅި އެއްކޮށްފަ އެވެ.
އެއާރ ޗެލެންޖް"ގެ ދެވަނަ ބުރު ނިންމުމުގެ ގޮތުން ހޯމަދުވަހު އަފީފުއްދީން ސްކޫލްގައި ބޭއްވި ރަސްމިއްޔާތު ޝަރަފްވެރިކޮށްދެއްވައި، އެންމެ ގިނަ ފުޅި އެއްކުރި ދަރިވަރަށާއި މުއައްޒަފަށް ޓްރޮފީ ހަވާލުކޮށްދެއްވީ ކުޅުދުއްފުށީ ކައުންސިލް މެންބަރ މުހައްމަދު ދާއޫދުއެވެ.
މިރަސްމިއްޔާތުގައި ވާހަކަ ދައްކަވަމުން މުހައްމަދު ވިދާޅުވީ ޕްލާސްޓިކްގެ ސަބަބުން އަހަރެމެންގެ ދިރުންތަކަށް ވަރަށްބޮޑު ގެއްލުމެއް ލިބެމުންދާކަމަށާއި، އެއްފަހަރު ބޭނުންކުރެވޭ ޕްލާސްޓިކް ބޭނުންކުރުން އެއްކޮށް ހުއްޓާލަން ޖެހޭކަމަށެވެ. އަދި މީގެއިތުރުން މުހައްމަދު ވިދާޅުވީ ބައެއްކަހަލަ ޕްލާސްޓިކް ބޭނުންކޮށްގެން ތަފާތު ބޭނުންތެރި އެއްޗެހި އަހަރެމެންނަށް އުފެއްދިދާނެކަމަށެވެ. އަދި އެކަމުގެ ސަބަބުން، އުކާލަންޖޭ ޕްލާސްޓިކްގެ އަދަދު މަދުކުރެވިގެންދާނެކަންވެސް ފާހަގަ ކުރެއްވިއެވެ.
މިރަސްމިއްޔާތުގައި ފުޅި އެއްކުރި ކުދިންނަށް ސެޓްފިކެޓާއި މެޑަލް ހަވާލުކުރިއެވެ.
އެ ސްކޫލުގެ ޕްރިންސިޕަލް ނާސިހާ އިދުރީސް ވިދާޅުވީ، މި ފުޅިތައް ދެ ހަފުތާއެއްގެ ތެރޭގައި މާލެ ފޮނުވާލުމުގެ މަސައްކަތް ކުރައްވަމުން ގެންދަވާ ކަމަށެވެ. އަދި ފުރަތަމަ ބުރުގައި އެކަމަށް ކައުންސިލުން ދެއްވި އެހީތެރިކަން މިފަހަރުވެސް ލިބޭނެކަމަށް އުންމީދުކުރައްވާ ކަމަށްވެސް ނާސިހާ ވިދާޅުވިއެވެ.
