ކުޅުދުއްފުށީގައި ކޮމިއުނިޓީ ޖިމް ހުޅުވައިފި
ޖިމްގެ މެމްބަރސިޕް ފީއަކީ މަހަކު 200 ރުފިޔާ
ކުޅުދުއްފުށީ ކޮމިއުނިޓީ ޖިމް ހުޅުވުން
ކުޅުދުއްފުށި ސިޓީގައި ސަރުކާރުން ޤާއިމުކުރި ކޮމިއުނިޓީ ޖިމް ހުޅުވައި ބޭނުންކުރަން ފަށައިފިއެވެ. މިކަމަށްޓަކައި ކޮމިއުނިޓީ ސެންޓަރުގައި ބޭއްވި ހަފުލާއެއްގައި މި ޖިމް ހުޅުއްވައިދެއްވީ ކުޅިވަރަށާއި އިޖުތިމާއީ ގޮތުން ރަށަށް ގިނަ ޚިދުމަތްތަކެއް ކޮށްދެއްވާފައިވާ އަބޫބަކުރު ހުސެއިން (ޕެލޭ) އެވެ.
މި ރަސްމިއްޔާތުގައި ވާހަކަދައްކަވަމުން މޭޔަރު އާތިފު ވިދާޅުވީ، ކަސްރަތުކުރާނެ އެކަށީގެންވާ ޖިމެއްގެ އިންތިޒާރުގައި ޒުވާނުން ތިބޭތާ އެތަކެއް ދުވަހެއް ވެއްޖެ ކަމަށެވެ. އަދި ޖިމާއެކު މުޖުތަމައުއަށް އިތުރު ތަރައްޤީއެއް ލިބިގެންގޮސްފައިވާކަމަށެވެ.
ސްޓޭޑިއަމް ފިޔަވައި ޔޫތު މިނިސްޓްރީގެ އެހެން ފެސިލިޓީތަކަށް ވެސް މިނިސްޓްރީން އަޅާލާ މަންޒަރު ޒަމާންތަކަކަށްފަހު މިހާރު ފެންނަށް ފަށާފައިވާކަން ފާހަގަކުރައްވައު ވާހަކަދައްކަވަމުން މޭޔަރު ވިދާޅުވީ، ކުޅުދުއްފުށީގައި ކުޅިވަރު ތަރައްގީކުރުމާ ބެހޭގޮތުން މިނިސްޓަރު މަހުލޫފް ވެސް އުފާވެރި ޚަބަރުތަކެއް ދެއްވާފައިވާ ކަމަށެވެ.
އެގޮތުން ސަރުކާރުން ޓާރފް އަޅައިގެން ތަރައްގީކުރަމުންދާ ޒިގްޒެގް ދަނޑުގައި ރެސްޓްރޮމް އިމާރާތަކާއި ލައިޓިންގ އަދި ކޮރަލް ދަނޑުގެ ފެންސު މިނިސްޓްރީން ގާއިމުކުރަން ނިންމާފައިވާކަން ފާހަގަކުރެއްވި އެވެ.
ކުޅުދުއްފުށީ ސިޓީ ކައުންސިލުން މައުލޫމާތު ދެއްވިގޮތުގައި ޖިމް ބޭނުންކުރެވޭނީ ރެޖިސްޓަރީކޮށް މެމްބަރޝިޕް ފޯމު ފުރައިގެންނެވެ. އެގޮތުން 16 އަހަރުން މަތީގެ ކޮންމެ މީހަކަށް ވެސް މެމްބަރަކަށް ވެވިދާނެއެވެ. ރެޖިސްޓްރޭޝަން ފީ އެއްގެ ގޮތުގައި 50 ރުފިޔާ ނެގުމަށް ހަމަޖެހިފައިވާއިރު މެމްބަރޝިޕް ފޯމު އޮންލައިންކޮށް ފުރިހަމަކުރެވޭނެ ގޮތް ކައުންސިލުން ވަނީ ހަމަޖައްސައިދީފަ އެވެ. ޖިމްގެ މެމްބަރޝިޕް ފީ ދެ ގޮތަކަށް ދެއްކިދާނެ ކަމަށް ކައުންސިލުން ބުނެއެވެ. އެއީ މަހުން މަހަށް ދައްކާނަމަ މެމްބަރޝިޕް ފީ އަކީ މަހަކު 200 ރުފިޔާއެވެ. އަދި އަހަރަކަށް ގަނޑުކޮށް ފީ ދައްކާނަމަ ފީ އަކީ އަހަރަކަށް 2000 ރުފިޔާ ކަމަށް ކަނޑައަޅާފައިވާއިރު އަހަރަކަށް ގަނޑުކޮށް ފީ ދައްކާނަމަ 400 ރުފިޔާގެ ޑިސްކައުންޓެއް ލިބޭނެއެވެ.
