ޔުނިޓީ ރަން މި އަހަރު ވެސް އޮންނާނެ
މި ދުވުން އޮންނާނީ މި މަހުގެ 26 ވާ އާދީއްތަ ދުވަހު
2020 ވަނަ އަހަރުގެ ޔުނިޓީ ރަންގެ ތެރެއިން
ކޮންމެ އަހަރެއްގެ ވެސް ދިވެހީންގެ އެއްބައިވަންތަކަމުގެ ދުވަހާ ގުޅިގެން ދިވެހި ރެޑް ކްރެސެންޓުން އިންތިޒާމުކޮށްގެން ކުޅުދުއްފުށި ސިޓީގައި ބާއްވަމުން އަންނަ "ޔުނިޓީ ރަން" މި އަހަރު ވެސް އޮންނާނެކަމަށް ރެޑް ކްރެސެންޓުން ހާމަކޮށްފިއެވެ.
އެއްބައިވަންތަކަމުގެ ދުވަސް ފާހަގަކުރުމުގެ އިތުރުން ދިވެހި ރެޑް ކްރެސެންޓްގެ އެކި ހަރަކާތްތަކާއި ޚިދުމަތްތައް ކުރިއަށް ގެންދިއުމަށް ބޭނުންވާ ފަންޑް ރެއިޒްކުރުމަށާއި، ދުޅަހެޔޮ ސިއްހަތެއްގައި ތިބުމަށް ކަސްރަތުގެ މުހިއްމުކަން އަންގައިދިނުމުގެ މަޤްޞަދުގައި ކުރިއަށް ގެންދާ މި ދުވުން އޮންނާނީ މި މަހުގެ 26 ވާ އާދީއްތަ ދުވަހުގެ ހަވީރުއެވެ.
ދުވުމުގައި ބޭނުންކުރާ ބިބް ގަތުމުގެ ފުރުޞަތު މިހާރު ހުޅުވާލާފައިވާއިރު، ބިބް ވިއްކަމުން ދަނީ އެކި އަގުތަކުގައެވެ. ބިބްތަކުގެ އަގުތަކާއި، ލިބެން ހުރި ބިބްތަކުގެ ލިސްޓުhttps://bit.ly/3ozbn4pމި ލިންކުން ފެންނާނެއެވެ.
އޮންލައިން ފޯމެއްގެ ޒަރީއާއިން މި އަހަރުގެ ޔުނިޓީ ރަންގައި ބައިވެރިވުމުގެ ފުރުސަތު ހުޅުވާލާފައިވާއިރު، މި އަހަރުގެ ދުވުން ވަނީ އެކި އުމުރުފުރާތަކަށް ބަހާލާފައެވެ. އެގޮތުން މި އަހަރުގެ ދުވުމުގެ ހިމެނޭ އުމުރުފުރާތަކަކީ 12 އަހަރުން ދަށް، 13 އަހަރާއި 18 އަހަރާ ދެމެދު، 19 އަހަރާއި 39 އަހަރާ ދެމެދު، 40 އަހަރުން މަތީގެ އުމުރުފުރައެވެ. މިއިން ކޮންމެ އުމުރުފުރާއަކުން ވެސް އަންހެން ފިރިހެން ވަކީން، އެންމެ އަވަހަށް ނިންމާ ތިން ދުވުންތެރިން ހޮވުމަށް ނިންމާފައިވާއިރު، އެންމެ ބޮޑު އަގުގައި ބިބް ބައްލަވައިގެންނެވި ފަރާތް ފާހަގަކުރުމަށް ވެސް ވަނީ ހަމަޖެހިފައެވެ.
