މަރާލި ރިޟްވާންގެ މައްސަލަ: ދިހަ މަސްވެގެންދިޔައިރު ބޭރަށް ފޮނުވި ވަޅީގެ އަޕްޑޭޓެއް ނެތް!
20 ޑިސެމްބަރު 2021 | ހޯމަ 01:44ޞައްޙަ މައުލޫމާތު ފޯރުކޮށްދޭ ފަރާތަކަށް 500،000 ރުފިޔާގެ އިނާމެއް ދިނުމަށް ހަމަޖެހިފައިވޭ
ނޫސްވެރިޔާ ރިޟްވާން ގެއްލުނު ރޭ ފެނުނު ވަޅި،
މަރާލާފައިވާ މިނިވަން ނޫހުގެ ނޫސްވެރިޔާ އަހްމަދު ރިޟްވާން އަބްދުﷲ ގެއްލުވާލުމުގައި ބޭނުންކޮށްފައިވާ ކަމަށް ތުހުމަތުވާ ވަޅި ރާއްޖެއިން ބޭރަށް ފޮނުވައިގެން ދިހަ މަސްވީއިރު ވެސް އަޕްޑޭޓެއް ނެތް ކަމަށް މަރު ކޮމިޝަނުން ބުނެފިއެވެ.
ރާއްޖެއެމްވީއަށް މި މައްސަލައާ ގުޅިގެން މަރު ކޮމިޝަންގެ މެމްބަރެއް ވިދާޅުވީ އެމައްސަލައާ ގުޅޭ އިތުރު ތަފްސީލެއް ނެތް ކަމަށާއި، ރިޟްވާން ގެއްލުވާލުމުގައި ބޭނުންކޮށްފައިވާ ކަމަށް ތުހުމަތުވާ ވަޅި ރާއްޖެއިން ބޭރަށް ފޮނުވައިގެން ތަހުލީލު ކުރިއަށްދާ ކަމަށެވެ. ނަމަވެސް އިތުރު އަޕްޑޭޓެއް ނެތް ކަމަށް ވިދާޅުވިއެވެ.
ރިޟްވާންގެ މައްސަލާގެ ތަހުގީގާއި ގުޅޭ ގޮތުން 9 ފެބްރުއަރީ 2021ގައި ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ މެމްބަރު މިސްބާހު އައްބާސް ވިދާޅުވީ ރިޟްވާން ގެއްލުވާލުމުގައި ބޭނުންކޮށްފައިވާ ކަމަށް ތުހުމަތުވާ ވަޅި ރާއްޖެއިން ބޭރަށް ފޮނުވައިގެން ތަހުލީލު ކުރަމުންދާ ކަމަށާއި، އެ ވަޅި އަކީ ކޮމިޝަންގެ ތަހުގީގަށް ވަރަށް މުހިންމު ހެއްކެއް ކަމަށެވެ.
ރިޟްވާން މަރާލި ރޭ ކަންތައްތައް ހިނގައިދިޔަ ގޮތް އެނގޭނެ ފަރާތްތައް އާންމުންގެ ތެރޭގައި ތިބޭނެ ކަމަށް ކޮމިޝަނަށް ގަބޫލު ކުރެވޭ ކަމަށާއި އެ މައުލޫމާތު ހިއްސާކޮށްދިނުމަށް ވެސް މިސްބާހު ވަނީ އެދިވަޑައިގެންފައެވެ.
ވަޅިއާ ގުޅޭ ގޮތުން ނުވަތަ ކޮމިޝަނުން ތަހުގީގުކުރަމުންދާ ރިޟްވާންގެ މައްސަލައާ ގުޅޭ ގޮތުން ސާބިތުހިފޭވަރުގެ ޞައްޙަ މައުލޫމާތު ފޯރުކޮށްދޭ ފަރާތަކަށް 500،000ރ (ފަސްލައްކަ ރުފިޔާ) ގެ ފައިސާގެ އިނާމެއް ދިނުމަށް ހަމަޖެހިފައިވާ ކަމަށެވެ.
މަރާލާވިފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ރިޔާސީ ކޮމިޝަނުން ވަނީ ރިލްވާން ގެއްލުނު ރޭ ފެނުނު ވަޅީގެ ފޮޓޯ އާންމުކޮށްފައެވެ. އެކޮމިޝަނުން ބުނީ އެވަޅިއަކީ 2014 ވަނަ އަހަރުގެ އޮގަސްޓު މަހުގެ 7 ވަނަ ދުވަހުގެ ރޭގެ ދަންވަރުގެ ވަގުތެއްގައި، މ. ޝައިނިންގސްޓާރ، ރިޟްވާން ހުޅުމާލޭގައި ދިރިއުޅެމުން ދިޔަ 21 ނަންބަރު ފްލެޓު ކައިރިން ގަދަކަމުން މީހަކު ކާރަކަށް އަރުވަން އުޅުމުގެ ތެރޭގައި މަގުމައްޗަށް ވެއްޓިފައިވާ ވަޅިއެއް ކަމަށެވެ.
މި މައްސަލައާ ގުޅޭ ގޮތުން މަޢުލޫމާތު ފޯރުކޮށްދޭ ފަރާތްތަކުގެ ސިއްރު ހިފަހައްޓާނެ ކަމުގެ ޔަޤީންކަން ކޮމިޝަނުން ދީފައިވާއިރު، މައުލޫމާތު ދިނުމަށް ބޭނުންވާ ފަރާތްތަކުން، ކޮމިޝަނަށް ހާޟިރުވެ ނުވަތަ ކޮމިޝަންގެ ނަންބަރު 7390841 ފޯނަށް ގުޅައިގެން ވެސް މަޢުލޫމާތު ހިއްސާ ކުރެވޭނެ ކަމަށް ރިޔާސީ ކޮމިޝަނުން ދީފައިވެއެވެ. އަދި ހަމަ އެ ނަންބަރުން ވައިބަރ، ވަޓްސްއެޕް، ޓެލެގްރާމް އަދި ސިގްނަލް މެދުވެރިކޮށް ވެސް މަޢުލޫމާތު ހިއްސާކުރެވޭ ގޮތަށް ހަމަޖެހިފައިވާ ކަމަށް ކޮމިޝަނުން ބުނެއެވެ.
ރިޟްވާން ގެއްލުވާލުމުގައި ބޭނުންކޮށްފައިވާ ކަމަށް ތުހުމަތުވާ ވަޅި ރާއްޖެއިން ބޭރަށް ފޮނުވައިގެން ދިހަ މަސްވީއިރު ވެސް އަޕްޑޭޓެއް ނެތް ކަމަށް މަރު ކޮމިޝަނުން ބުނެފައިވާއިރު، 7 އޮގަސްޓް 2021 ގައި ކުރީގެ ކޮމިޝަނަރ އޮފް ޕޮލިސް ހުސައިން ވަހީދު މަރު ކޮމިޝަނަށް ހާޒިރުކޮށް ސުވާލު ކޮށްފައިވެއެވެ. ކޮމިޝަނަށް ކުރީގެ ސީޕީ ވަހީދު ހާޒިރުކޮށްފައިވަނީ ރިޟްވާން ގެއްލުވާލި މައްސަލައިގެ ތަހުގީގަށް މަގާމުގެ ނުފޫޒު ބޭނުންކޮށްގެން ހުރަސް އެޅުމުންނެވެ.
މީގެ އިތުރުން ސީދާ ކުރީގެ ރައީސް އަބްދުﷲ ޔާމީނަށް އެނގިވަޑައިގަންނަވާ ބައެއް ކަންކަމާއި ގުޅޭގޮތުން ސުވާލުކުރުމަށް އެމަނިކުފާނު ވެސް ކޮމިޝަނަށް ހާޒިރުކޮށް ސުވާލުކޮށްފައިވެއެވެ. މި މައްސަލާގައި ރައީސް ޔާމީނަށް ވެސް ކުރަނީ މަގާމުގެ ނުފޫޒު ބޭނުންކޮށްގެން ތަހުގީގަށް ހުރަސްއެޅުމުގެ ތުހުމަތެވެ.
