ދަ ގްރޭންޑޭ ބަލިކޮށް ގްރީނުން ފެށުން ރަނގަޅުކޮށްފި

ހަތަރު އަހަރު ފަހުން ކުޅުނު ޕްރެޒިޑެންޓްސް ކަޕުގެ ފުރަތަމަ މެޗުގައި ކުލަބު ގްރީން ސްޓްރީޓްސްއިން ފަސޭހަކަމާއެކު ދަ ގްރާންޑޭ ސްޕޯޓްސް ކުލަބު ބަލިކޮށްފިއެވެ.

އާދީއްތަ ދުވަހުގެ ހަވީރު ގައުމީ ފުޓްބޯޅަ ދަނޑުގައި ކުޅުނު މި މެޗު ގްރީނުން ކާމިޔާބުކުރީ 5-0 ގެ ނަތީޖާއަކުންނެވެ. މިއީ 2017 ވަނަ އަހަރު ފުރަތަމަ ޑިވިޝަނުގައި ވާދަކުރަން ފެށި ގްރީނަށް ޕްރެޒިޑެންޓްސް ކަޕުގައި ލިބުނު ފުރަތަމަ މޮޅެވެ.

މި މެޗު ފަށައިގެން ގްރީންގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، އެ ޓީމުން ވަނީ ދަ ގްރާންޑޭގެ ހާފަށް ބާރު ބޮޑުކޮށް ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 11 ވަނަ މިނެޓުގައި ގްރީނުން ވަނީ ލަނޑު ޖަހައި ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ އަބްދުﷲ ޔާމީން (ޔާނު) އެވެ.

އަދި މި ލަނޑަށްފަހުވެސް ގްރީންގެ ޔާނު އާއި އަންޞާރު އިބްރާހީމް (އަންކޮ) އަށް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ. އެގޮތުން ޔާނު އާއި އަންކޮގެ ހަމަލާތަކުގެ ހުރަހަކަށްވީ ދަ ގްރާންޑޭގެ ގޯލްކީޕަރު އިސްމާއިލް ޝިހާމެވެ.

ދެވަނަ ހާފު ފަށައިގެންވެސް ގްރީނުން ދަ ގްރާންޑޭގެ ގޯލަށް ނުރައްކާކުރިއިރު، މެޗުގެ 59 ވަނަ މިނެޓުގައި އެ ޓީމުން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަންކޮއެވެ. އަދި މެޗުގެ 68 ވަނަ މިނެޓުގައި ޔާނު ވަނީ ގްރީންގެ ތިންވަނަ ލަނޑު ކާމިޔާބުކޮށްދީފައެވެ. އަދި އޭގެ ދެ މިނެޓު ފަހުން ޔާނުގެ އެހީތެރިކަމާއެކު ގްރީންގެ މުޙައްމަދު ސާއިފް އެ ޓީމުގެ ހަތަރުވަނަ ލަނޑު ޖަހައިދިންއިރު، މި މެޗުގައި ގްރީންގެ ފަސްވަނަ ލަނޑު ކާމިޔާބު ކޮށްދިނީ ކެޕްޓަން ރިލްވާން ވަހީދު (ރިލޭ) އެވެ.

މި ފަހަރުގެ މުބާރާތް ރާވާފައިވާ ގޮތުން ޕްރެޒިޑެންޓްސް ކަޕުގެ އަށް ޓީމުގެ މެދުގައި ލީގު ބުރެއް ކުޅޭއިރު، މުބާރާތުގެ ފައިނަލުުގައި ކުޅޭނީ ލީގު ބުރުގެ އެންމެ މޮޅު ދެ ޓީމެވެ. އެންމެ ފަހުން ޕްރެޒިޑެންޓްސް ކަޕުގައި އަށް ޓީމު ހިމެނޭ ގޮތަށް ކުޅުނީ 2015 ވަނަ އަހަރެވެ. މި އަހަރު ޕްރެޒިޑެންޓްސް ކަޕް ބާއްވާއިރު، މި މުބާރާތް އެންމެ ފަހުން ބާއްވާފައިވަނީ 2017 ވަނަ އަހަރެވެ. އޭގެ ފަހުން ފާއިތުވި ތިން ސީޒަނުގައިވެސް އެކި ސަބަބުތަކާ ހުރެ ޕްރެޒިޑެންޓްސް ކަޕް ބާއްވާފައެއް ނުވެއެވެ.