އޮޅުވެލިފުށީގައި ފެނާއި ނަރުދަމާ ނިޒާމު ޤާއިމުކުރުމުގެ މަސައްކަތް ފަށައިފި
މި މަޝްރޫޢަކީ 80 މިލިޔަން ރުފިޔާގެ މަޝްރޫޢެއް
އޮޅުވެލިފުށީގައި ފެނާއި ނަރުދަމާގެ މަސައްކަތް ފެށުން
ޅ. އަތޮޅު އޮޅުވެލިފުށީގައި ފެނާއި ނަރުދަމާގެ ނިޒާމު ޤާއިމުކުރުމުގެ ޢަމަލީ މަސައްކަތް ފަށައިފިއެވެ.
މިކަން ފައްޓަވައިދެއްވީ ރައްޔިތުންގެ މަޖިލީހުގެ ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމާއި ހުޅުމާލެ ދާއިރާގެ މެންބަރު ޢަލީ ނިޔާޒާއި އެމްޑަބްލިއުއެސްސީގެ މެނޭޖިން ޑިރެކްޓަރ ޙަސަން ޝާހާއި ޅ. އަތޮޅު ކައުންސިލްގެ ރައީސް ޔާސީން ޢަބްދުﷲއާއި އޮޅުވެލިފުށީ ކައުންސިލްގެ ރައީސް މުޙައްމަދު ޢާޡިމެވެ.
މި މަޝްރޫޢުގައި ހިމެނޭ، ފެނުގެ ނިޒާމު ޤާއިމްކުރުރުމުގެ މަސައްކަތުގެ ދަށުން، އޮޅުވެލިފުށީގައި 9.71 ކިލޯ މީޓަރުގެ ދިގު ފެން ހޮޅީގެ މައި ނެޓްވޯރކެއް އަޅާނެއެވެ. އަދި ފެންއުފެއްދުމަށް 2 އާރްއޯ ޕްލާންޓް ބެހެއްޓުމަށް ހަމަޖެހިފައިވެއެވެ. އެ ޕްލާންޓްތައް ބަހައްޓާ އާރުއޯ ބިލްޑިންގގެ %45 މަސައްކަތް ނިމިފައިވާކަމަށް އެމްޑަބްލިއު އެސްސީން ބުނެއެވެ.
މި މަސައްކަތުގެ ދަށުން، މިޕްލާންޓްތަކުން އުފައްދާ ފެން ރައްކާރުރުމަށް 3 ތާނގީ ބަހައްޓައި، ގޭގޭގައި ފެން މީޓަރުތައް ހަރުކޮށް، ފެނުގެ ކަނެކްޝަން ގުޅައިދީ މި ގެތަކަށް ރައްކާތެރި ބޯފެން ފޯރުކޮށްދޭނެއެވެ.
މި މަޝްރޫޢުގައި ހިމެނޭ ނަރުދަމާ ނިޒާމުގެ މަސައްކަތުގެ ދަށުން އޮޅުވެލިފުށީގައި 6.56 ކިލޯމީޓަޓުގެ ނަރުދަމާ ވިއުގައެއް ޤާއިމްކޮށް، 1.60 ކިލޯ މީޓަރުގެ ޕަންޕިންގ ލައިނެއް އަޅައި، އިދާރީ ބިލްޑިންގ އިމާރާތް ކުރުން ހިމެނެއެވެ. އަދި 4 ޕަންޕިންގ ސްޓޭޝަން ރަށުގެ އެކި ސަރަހައްދުތަކުގައި ބަހައްޓައި، ނަޖިސް ބޭރުކުރުމަށް 1 ސީ އައުޓް ފްލޯ ހަދާނެއެވެ.
އޮޅުވެލިފުށީ ފެނާއި ނަރުދަމާ ނިޒާމު ޤާއިމުކުރުމުގެ މަޝްރޫޢަކީ މިނިސްޓްރީއޮފް ނޭޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރއިން، 80 މިލިއަން ރުފިޔާއަށް އެމްޑަބްލިއުއެސްސީއާ ހަވާލުކޮށްގެން ކުރިއަށްގެންދާ މަޝްރޫޢެކެވެ.
