ހޭންޑްބޯލް ކޯޗިން ކޯސް ލެވެލް ވަން އަންނަ ޖުލައި މަހު ފަށަނީ

ހޭންޑްބޯލް އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބާއްވާ ހޭންޑްބޯލް ކޯޗިން ކޯސް ލެވެލް ވަން އަންނަ ޖުލައި މަހު ހިންގުމަށް އެ އެސޯސިއޭޝަނުން ނިންމައިފި އެވެ.

ހޭންޑްބޯލް އެސޯސިއޭޝަނުން ނެރުނު ބަޔާނެއްގައި ބުނީ އަންނަ ޖުލައި މަހުގެ 8 ވަނަ ދުވަހު ފެށިގެން 23 ވަނަ ދުވަހުގެ ނިޔަލަށް ލެވެލް ވަންގެ ކޯޗިން ކޯހެއް ހިންގުމަށް ހަމަޖެހިފައިވާ ކަމަށާއި، މި ކޯހުގައި ބައިވެރިވެވޭނީ ހަމައެކަނި ބޭސިކް ކޯޗިން ކޯހުން ފާސްވެފައިވާ ބައިވެރިވެފައިވާ ފަރާތްތަކަށް ކަމަށެވެ.

މީގެއިތުރުން އެ އެސޯސިއޭޝަނުން ބުނީ މި ކޯހުގައި ބައިވެރިވާން ބޭނުންވާ ފަރާތްތަކުން އަންނަ މަހުގެ 20 ގެ ކުރިން ފޯމް ހުށަހަޅަންޖެހޭނެ ކަމަށެވެ. މި ފޯމް ލިބެން ހުންނާނީ ގަލޮޅު ދަނޑުގައި ހުންނަ ހޭންޑްބޯލް އެސޯސިއޭޝަންގެ އޮފީހުންކަމަށްވެސް އެ އެސޯސިއޭޝަނުން ވަނީ ބުނެފައެވެ.

ހޭންޑްބޯލް އެސޯސިއޭޝަނުން ވަނީ ނިމިގެންދިޔަ އެޕްރީލް މަހު ޖޫނިއާ ރެފްރީ ކޯހެއްވެސް ހިންގާފައެވެ. 10 ދުވަހުގެ މުއްދަތަށް ކުރިޔަށްގެންދިޔަ އެ ކޯހުގައި ޖުމްލަ 19 ކުދިން ބައިވެރިވެފައިވާއިރު، ބައިވެރިން ނޮމިނޭޓްކޮށްފައިވަނީ ސްކޫލްތަކުންނެވެ.