ކޮސްމޯސްގެ ބްލޮކްޗެއިން ހެކަތަން: ރާއްޖެއަށް ދެވަނަ

ދުނިޔޭގެ ފެންވަރުގައި ބޭއްވި ކޮސްމޯސްގެ ބްލޮކްޗެއިން ހެކަތަންގައި ރާއްޖޭން ބައިވެރިވި ޓީމު ދެވަނަ ހާސިލުކޮށްފިއެވެ.

ޖުމްލަ 2،000ށްވުރެ ގިނަ ބައިވެރިން ވާދަކުރި މި މުބާރާތުގައި ރާއްޖެއިން ހުށަހެޅީ 'ބޮލި ނެޓްވޯކް' ކިޔާ ޕްރޮޖެކްޓެކެވެ. އޮންލައިންކޮށް ކުރިއަށް ގެންދިޔަ މި މުބާރާތުގައި ރާއްޖެއިން ބައިވެރިވި ޓީމަކީ ރާއްޖޭގެ ދެ ބައިވެރިންގެ އިސްނެގުމާއެކު ބޭރު ގައުމުތަކުގެ ބައިވެރިން ހިމެނޭގޮތަށް އެކުލަވާލާފައިވާ ޓީމެކެވެ.

ކޮސްމޯސްގެ އެކޯސިސްޓަމްގައި ހިމެނޭ ޓޫލްސްތައް ބޭނުންކޮށްގެން އެކި ކަހަލަ އުފެއްްދުންތައް ތައްޔާރުކުރާ މި މުބާރާތުގައި ރާއްޖޭގެ ޓީމުން ހުށަހަޅާފައިވަނީ ޑިޖިޓަލް އެކޮނޮމީސް ތައްޔާރުކުރާ ޕްލެޓްފޯމެކެވެ.

މި މުބާރާތް ކުރިއަށް ގެންގޮސްފައިވަނީ މިއަހަރުގެ ނޮވެމްބަރ 11ން ޑިސެމްބަރ މަހުގެ އަށްވަނަ ދުވަހުގެ ނިޔަލަށެވެ.