މޭރީގެ މަރު: ލަމްހާގެ ބަންދަށް 15 ދުވަސް
17 ޑިސެމްބަރު 2021 | ހުކުރު 13:30ލަމްހާ ހައްޔަރުކޮށްފައިވަނީ ބުރާސްފަތި ދުވަހު
މާވިންއާއި ލަމްހާ
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހަކު މަރާލި މައްސަލައިގައި ހައްޔަރުކުރި ދިވެހި އަންހެން މީހާގެ ބަންދަށް 15 ދުވަސް ޖަހައިފިއެވެ.
ފިލިޕީންސްއަށް ނިސްބަތްވާ ނަރުސް މޭރީ ގްރޭސްގެ މަރުގެ މައްސަލައިގައި، ކޯޓު އަމުރެއްގެ ދަށުން 24 އަހަރުގެ ދިވެހި އަންހެނަކު ހައްޔަރުކޮށްފައިވާކަން ފުލުހުން ހާމަކޮށްފައިވަނީ ބުރާސްފަތި ދުވަހުއެވެ. ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ބަންދުގައި ބެހެއްޓުމަށް ކޯޓުން 15 ދުވަސް ޖަހާފައިވާކަމަށެވެ.
އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރަމުންދިޔަ މޭރީ ގްރޭސްގެ މަރުގެ މައްސަލައިގައި ފުލުހުން އެންމެ ފުރަތަމަ ހައްޔަރުކޮށްފައިވަނީ މޭރީ ގްރޭސްގެ ފިރިމީހާ މާވިން، 29 އެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ. މި މައްސަލައިގައި ދެވަނައަށް ހައްޔަރުކޮށްފައިވާ ދިވެހި އަންހެން މީހާ، ލަމްހާ އަކީ މާވިންއާ ލޯބީގެ ގޮތުން ގުޅުން އޮންނަ މީހެއް ކަމަށް މައުލޫމާތު ލިބެއެވެ.
މި މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ ނަރުސް މީހާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ.
އެހެންކަމުން އޭނާ މަަރުވި ސަބަބު ދެނެގަތުމަށް ފުލުހުން ވަނީ އޭނާގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ހަދާފައެވެ. އަދި ޕޯސްޓްމޯޓަމް ރިޕޯޓުން އެނގޭގޮތުގައި މޭރީ މަރުވެފައިވަނީ ލިބުނު ޒަޚަމްތަކުގެ ސަބަބުން ކަމަށް ފުލުހުން ބުނެފައިވެއެވެ.
