ފުވައްމުލަކު ސިޓީގެ ތަރައްޤީގެ ޕްލޭން ތަންފީޒު ކުރުމުގެ ކަންތައްތައް ދަނީ ކުރިއަށް: މޭޔަރ
ތަރައްޤީގެ ޕްލޭންއަށް ބޭނުންވާ ފަންޑު ހޯދުމާއި އެކަމަށް ބޭނުންވާ ޓެކްނިކަލް ލަފާ ހޯދުމުގެ މަސައްކަތް އެބަ ކުރިއަށްދޭ
ފުވައްމުލަކު ސިޓީގެ މޭޔަރ އިސްމާއިލް ރަފީޤް ރާއްޖެޓީވީއަށް އިންޓަވިއު ދެއްވަނީ | ރާއްޖެއެމްވީ
ފުވައްމުލަކު ސިޓީގެ ތަރައްޤީގެ ޕްލޭން ނިމިފައިވާ ކަމަށާއި އެ ޕްލޭން ތަންފީޒު ކުރުމުގެ ކަންތައްތައް ކުރިއަށްދާ ކަމަށް މޭޔަރ އިސްމާއިލް ރަފީޤް ވިދާޅުވެއްޖެއެވެ.
ރާއްޖެޓީވީއަށް ދެއްވި އިންޓަވިއުއެއްގައި އިސްމާއިލް ވިދާޅުވީ ތަރައްޤީގެ ޕްލޭންއަށް ބޭނުންވާ ފަންޑު ހޯދުމާއި އެކަމަށް ބޭނުންވާ ޓެކްނިކަލް ލަފާ ހޯދުމުގެ މަސައްކަތް ކުރިއަށްދާ ކަމަށެވެ. އަދި 2022 ވަނަ އަހަރަށް ޕްލޭންކޮށްފައިވާ ކަންތައްތައް އެ މުއްދަތުގެ ތެރޭގައި ނިންމާލެވޭނެ ކަމުގެ އުންމީދު އެބައޮތް ކަމަށް ވެސް އޭނާާ ވިދާޅުވިއެވެ.
ފުވައްމުލަކު ސިޓީ ކައުންސިލުން ވަނީ ދާދިފަހުން ޕްލޭނިންގ މިނިސްޓަރ މުހައްމަދު އަސްލަމް އެ ރަށަށް ވަޑައިގެން ރަށުގެ ތަރައްޤީގެ ގިނަކަންތައްތަކާ ގުޅޭގޮތުން މަޝްވަރާ ވަނީ ކުރައްވާފައެވެ. އެގޮތުން މަގު ހެދުމުގެ މަޝްރޫއަށް ގެންނަންޖެހޭ ބަދަލުތަކާއި ފުވައްމުލަކުގެ ބަނދަރުގެ ޖާގައިގެ ދަތިކަން ހައްލުކުރުމުގެ ގޮތުން ކުރެވޭނެ ކަންތައްތަކާ ގުޅޭގޮތުން ވަނީ މަޝްވަރާ ކޮށްފައެވެ.
އިސްމާއިލް ވިދާޅުވީ ބަނދަރުގެ ބޭރު ތޮށި ބޭނުންކުރެވޭނެ ގޮތަކާމެދު މަޝްވަރާ ކުރިއަށްދިޔަ ކަމަށާއި، ބަނދަރުގެ ޖާގަ އިތުރު ކުރުމަށް ކުރެވޭނެ ކަންތައްތަކާމެދު ވެސް މަޝްވަރާ ކޮށްފައިވާ ކަމަށެވެ. ކައުންސިލުން އެދިފައިވަނީ ބަނދަރު ގޮއްވައިގެން މަސައްކަތް ކުރިއަށް ގެންދިޔުމަށެވެ. ނަމަވެސް މިހާރު އިމާރާތްތައް ކައިރީގައި ހުރުމާއެކު ގޮއްވުމަކީ ކުރެވޭނެ ކަމެއް ނޫން ކަމަށް މިނިސްޓްރީން ބުނެފައިވާ ކަމަށް އިސްމާއިލް ވިދާޅުވިއެވެ. ޓެކްނިކަލް ދިރާސާއަށް ފަހު ކުރިއަށްދެވޭނެ ގޮތްތައް ނިންމާނެ ކަމަށް މިނިސްޓްރީން ބުނެފައިވާ ކަމަށް އިސްމާއިލް ވިދާޅުވިއެވެ.
ފުވައްމުލަކު ސިޓީ ކައުންސިލުން މިހާރު ކުރިއަށްގެންދާ ބައެއް މުހިންމު މަސައްކަތްތަކަށް އަލިއަޅުއްވާލައްވައި އިސްމާއިލް ވިދާޅުވީ މަގުހެދުމުގެ މަޝްރޫއާއި ސްކޫލްގެ ކްލާސްރޫމާއި މަލްޓިޕާޕަސް ހޯލް ހެދުމުގެ މަސައްކަތާއި ހޮސްޕިޓަލުގެ މިހާރުގެ އިމާރާތަށް ޖާގަ އިތުރު ކުރުމުގެ މަސައްކަތް ވެސް ކުރިއަށްދާ ކަމަށެވެ. މީގެއިތުރުން ހޮސްޕިޓަލުގެ އައު އިމާރާތް އެޅުމަށް ޑިޒައިންގެ މަރުހަލާގައިވާ ކަމަށް ވެސް އޭނާ ވިދާޅުވިއެވެ.
ފުވައްމުލަކުގެ ތަރައްޤީއަށް ސަރުކާރުން ގިނަކަންތައްތަކެއް ކުރަމުންދާއިރު ފުވައްމުލަކު ގޮނޑުދޮށް ހިމާޔަތް ކުރުމުގެ މަޝްރޫއުގެ އަމަލީ މަސައްކަތުގެ އެއްބަސްވުމުގައި ދާދި ފަހުން ވަނީ ސޮއިކޮށްފައެވެ.
މިނިސްޓަރ އަސްލަމް ވިދާޅުވީ، މި މަޝްރޫއުގެ ވާހަކަ އެންމެ ފުރަތަމަ ދެކެވެން ފެށީ 2009 ވަނަ އަހަރު ކަމަށެވެ. 2012 ވަނަ އަހަރު އެ ކުންފުންޏަށް ޕްރޮޕޯޒަލެއް ފޮނުވި ކަމަށް ވެސް ވިދާޅުވިއެވެ. މި މަސައްކަތް ބާރު ސްޕީޑުގައި ކުރިއަށްދާނެކަން ފާހަގަކުރައްވައި އަސްލަމް ވިދާޅުވީ ބަނދަރުގައި 2.6 ކިލޯމީޓަރުގެ ތޮށި، މި މަޝްރޫއުގެ ދަށުން ލެވިގެންދާނެ ކަމަށެވެ. އަދި މިއީ ސަރުކާރުން ފަށާނެ ބިޔަ މަޝްރޫއެއް ކަމަށާއި 234 މަޝްރޫއެއްގެ އަމަލީ މަސައްކަތް މިހާރު ވެސް ކުރިއަށްދާ ކަމަށް އަސްލަމް ވިދާޅުވިއެވެ.
ގޮނޑުދޮށް ހިމާޔަތްކުރުމުގެ ގޮތުން 738 މިލިއަން ރުފިޔާގެ މަސައްކަތް ސަރުކާރުން ކުރިއަށް ގެންދާ ކަމަށް ވިދާޅުވިއެވެ. ރާއްޖެއަކީ މިހާރު ފަގީރު ގައުމުތަކުގެ ލިސްޓުން ކެނޑި، ތަރައްގީވަމުން އަންނަ ގައުމުގެ ލިސްޓަށް އަރާފައިވާ ގައުމެއް ކަމަށް މިނިސްޓަރ ވިދާޅުވިއެވެ. އަދި ތަރައްގީވެފައިވާ ލިސްޓަށް ރާއްޖޭގެ ނަން އަރަންދެން މަސައްކަތް ކުރިއަށް ގެންދަވާނެ ކަމަށް ވިދާޅުވިއެވެ.
މި މަޝްރޫއަކީ 300 މިލިއަން ރުފިޔާގެ މަޝްރޫއަކަށްވާއިރު، މި މަޝްރޫއަށް ފަންޑު ކުރަނީ ދިވެހި ސަރުކާރާއި ނެދަރލެންޑްސްގެ އިންވެޓްސް އިންޓަރނޭޝަނަލްއާއި ކުވައިތު ފަންޑް ފޯރ އެރެބް އިކޮނޮމިކް ޑިވެލޮޕްމަންޓުންނެވެ.
މި މަޝްރޫއުގެ މަސައްކަތް 606 ދުވަހުގެ ތެރޭގައި ނިންމާ ގޮތަށް ވަނީ ހަވާލުކޮށްފައެވެ.
