އިނގިރޭސި ޕްރިމިއާ ލީގުގައި ބުރާސްފަތި ދުވަހުގެރޭ ފަހަތުން އަރައި ނިއުކާސަލް ޔުނައިޓެޑް ބަލިކޮށް، ޕްރިމިއާ ލީގު ތާރީޚުގައި އެންމެ ފުރަތަމަ 2،000 މޮޅު ހަމަކުރި ޓީމުގެ ރިކޯޑު ލިވަޕޫލުން ގާއިމުކޮށްފިއެވެ.

އަމިއްލަ ދަނޑުގައި ކުޅުނު މެޗުން ލިވަޕޫލް މޮޅުވީ ފަހަތުން އަރައި ނިއުކާސަލް އަތުން 3-1 ގެ ނަތީޖާއަކުންނެވެ. މި މޮޅާއެކު ލިވަޕޫލުން 2،000 މޮޅު ހަމަކޮށް ރިކޯޑު ހެދިއިރު، އެ ޓީމާ އެންމެ ކައިރި ކުރާ ކުލަބަކަށް އޮތީ އާސެނަލެވެ. އެގޮތުން އާސެނަލުން ވަނީ ލީގު ތާރީޚުގައި 1927 މޮޅު ހޯދާފައެވެ.

ބުރާސްފަތި ދުވަހުގެރޭ ކުޅުނު މެޗާ ކުރިމަތިލިއިރު ލިވަޕޫލުގެ ވާޖިލް ވެން ޑައިކާއި، ފަބީނިއޯ އަދި ކާޓިސް ޖޯންސް ވަނީ ކޮވިޑް-19 އަށް ޕޮޒިޓިވްވެފައެވެ. އެހެންކަމުން އެ ތިން ކުޅުންތެރިން ނުލައި މި މެޗަށް ލިވަޕޫލުން ނުކުތްއިރު، މެޗުގެ ވަރަށް ކުރީކޮޅު ނިއުކާސަލުން ވަނީ ލީޑު ނަގާފައެވެ. މެޗު ފަށައިގެން ހަތްވަނަ މިނެޓުގައި ލިވަޕޫލުގެ ތިއާގޯއަށް ހެދުނު ގޯހެއްގެ ފައިދާ ނަގައި އޭރިއާ ބޭރުން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޖޮންޖޯ ޝެލްވީއެވެ.

އެކަމަކު އޭގެ ފަހުން ގާތްގާތުގައި ދެ ލަނޑު ޖަހައި ލިވަޕޫލުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 21 ވަނަ މިނެޓުގައި ޑިއޯގޯ ޖޮޓާ ލިވަޕޫލަށް ނަތީޖާ އެއްވަރުކޮށްދިންއިރު، އޭގެ ހަތަރު މިނެޓު ފަހުން ލިވަޕޫލަށް ލީޑު ނަގައިދިން ލަނޑު ކާމިޔާބުކޮށްދިނީ މުޙައްމަދު ސަލާހެވެ. މި ލަނޑާއެކު ސަލާހު ވަނީ ލީގުގައި ޖެހިޖެހިގެން 15 މެޗުގައި ލަނޑެއް ޖަހައި ނުވަތަ ލަނޑެއް ޖަހަން ފުރުސަތު ތަނަވަސްކޮށްދީގެން ލެސްޓާ ސިޓީގެ ފޯވާޑް ޖޭމީ ވާޑީ ހަދާފައިވާ ރިކޯޑާ ހަމަކޮށްފައެވެ.

ދެން މި މެޗުގައި ލިވަޕޫލުން ޖެހި ތިންވަނަ ލަނޑު ފެނިގެންގޮސްފައިވަނީ މެޗު ނިމެން ތިން މިނެޓަށް ވެފައި ވަނިކޮށެވެ. އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޓްރެންޓް އަލެކްސަންޑަ-އާނޯލްޑެވެ.

މި މެޗުން ލިވަޕޫލް މޮޅިވިއިރު، ލީގުގައި ބުރާސްފަތި ދުވަހުގެރޭ ކުޅުނު މެޗުން ޗެލްސީ އެއްވަރުވީ އެވަޓަނާ ވާދަކޮށް 1-1 ގެ ނަތީޖާއަކުންނެވެ.

ޗެލްސީގެ ދަނޑުގައި ކުޅުނު މި މެޗާ ކުރިމަތިލިއިރު އެ ޓީމުގެ ޓިމޯ ވާނާ އާއި, ރޮމެލޫ ލުކާކޫ އަދި ކަލުމް ހަޑްސަން-އޮޑޯއި ވަނީ ކޮވިޑަށް ޕޮޒިޓިވްވެފައެވެ. އަދި މި މެޗަށް އެވަޓަނުން ނުކުމެފައިވަނީ ކޮވިޑާއި އަނިޔާގެ މައްސަލަތަކުގެ ސަަބަބުން ގިނަ ކުޅުންތެރިންތަކެއް ނުލައެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ދެވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނެގީ ޗެލްސީންނެވެ. މެޗުގެ 70 ވަނަ މިނެޓުގައި ރީސް ޖޭމްސް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މޭސަން މައުންޓެވެ. އެކަމަކު އޭގެ ހަތަރު މިނެޓު ފަހުން އެންތަނީ ގޯޑަން ހުރަސްކޮށްދިން ބޯޅައަކުން ޖަރާޑް ބްރަންތުވެއިޓް ވަނީ ލަނޑެއް ޖަހައި، އެވަޓަނަށް ނަތީޖށ އެއްވަރުކޮށްދީފައެވެ.

މި ނަތީޖާތަކާއެކު ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީއަށް ކުޅުނު 17 މެޗުން 41 ޕޮއިންޓް ލިބިފައިވާއިރު، ދެވަނައިގައި ލިވަޕޫލް އޮތީ 17 މެޗުން 40 ޕޮއިންޓާއެކުއެވެ. އަދި ތިންވަނައިގައި އޮތް ޗެލްސީއަށް 17 މެޗުން ލިބިފައިވަނީ 37 ޕޮއިންޓެވެ.