ރ. އިނގުރައިދޫގެ މަގުހެދުމުގެ މަޝްރޫޢު ފައްޓަވާނެކަމަށް ރައީސް ވިދާޅުވެއްޖެ
16 ޑިސެމްބަރު 2021 | ބުރާސްފަތި 14:16ކަންކަން ސަރުކާރުން ކުރިޔަށް ގެންދާނީ އެ ދާއިރާއެއްގެ އަދި އެރަށެއްގެ ރައްޔިތުންގެ ލަފަޔާއި މަޝްވަރާއާއެކު
ރ. އިނގުރައިދޫ ކައުންސިލާ ރައީސް ބައްދަލުކުރެއްވުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މާޅޮސްމަޑުލު އުތުރުބުރީ އިނގުރައިދޫ ކައުންސިލާއި ބައްދަލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި މި ބައްދަލުކުރެއްވުމުގައި އިނގުރައިދޫ ކައުންސިލުން ވަނީ, އެރަށުގެ ފެނާއި ނަރުދަމާ ނިޒާމުފަދަ، ރަށުގެ ތަރައްޤީއަށް މުހިންމު މަޝްރޫޢުތައް ކުރިޔަށްގެންދަވާތީއާއި ތަރައްޤީއަށް ބޭނުންވާ މުހިންމު މަޝްރޫޢުތަކެއް އަންނަ އަހަރުގެ ބަޖެޓުގައިވެސް ހިމެނޭތީ އެކަން ޝުކުރުވެރިކަމާއެކު ފާހަގަކުރައްވާފައެވެ.
މި ބައްދަލުކުރެއްވުމުގައި އިނގުރައިދޫ ކައުންސިލަރުން ވަނީ ރަށުގެ ތަރައްޤީއަށް އެންމެ މުހިންމު ކަންކަމާ ގުޅޭގޮތުން ރައީސުލްޖުމްހޫރިއްޔާއާ މަޝްވަރާ ކުރައްވާފައެވެ. އެގޮތުން ރަށުގެ މަގުތައް ރަނގަޅު ފެންވަރަށް ހެދުމާއި، ބަނދަރާއި، ބަނދަރަށް ވަދެނިކުތުމަށް އޮންނަ ނެރާ ގުޅޭގޮތުން ހުރި ކަންބޮޑުވުންތަކާއި، ކުނިމެނޭޖުކުރުމުގައި ހުރި ދަތިތަކާއި، ކައުންސިލު އިދާރާއާއި ޞިއްޙީ މަރުކަޒާއި ސްކޫލުގެ އިމާރާތުގެ ޖާގައިގެ ދަތިކަމާއި، މުވައްޒަފުންގެ ދަތިކަމުގެ މައްސަލައާއި، ރަށުގެ ގެދޮރުގެ ދަތިކަން، އަދި އެސަރަޙައްދުގައި އެއާރޕޯޓެއް އެޅުމާއި އެރަށަށް އައު މިސްކިތެއްގެ މުހިންމުކަމާއި މި ނޫންވެސް ރަށުގެ އިޤްތިޞާދީ އަދި އިޖްތިމާޢީ ތަރައްޤީއަށް ބޭނުންވާ މުހިންމުކަންކަން ކައުންސިލަރުން ފާހަގަކުރެއްވިއެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ އިނގުރައިދޫ ކައުންސިލުން ފާހަގަކުރެއްވި މަޝްރޫޢުތަކާއި ކަންކަމުގެ އެންމެފަހުގެ މަޢުލޫމާތުތައް ކައުންސިލަރުންނާ ހިއްސާކުރައްވާފައެވެ. އެގޮތުން އިނގުރައިދޫގައި މިހާރު ކުރިޔަށްދާ، ފެނާއި ނަރުދަމާގެ މަސައްކަތް ނިމުމުން އެރަށުގެ މަގުހެދުމުގެ މަޝްރޫޢު ސަރުކާރުން ކުރިޔަށް ގެންދަވާނެކަމުގައި އެމަނިކުފާނު ވިދާޅުވިއެވެ. މީގެ އިތުރުން، ބަނދަރާއި ސްކޫލުގެ އިމާރާތުގެ ދަތިކަމާ ގުޅޭގޮތުން ކައުންސިލުން ފާހަގަކުރެއްވި ކަންކަމާއި، އަދި ކައުންސިލަރުން ފާހަގަކުރެއްވި އިތުރު ކަންކަމުގައި، ކަމާގުޅޭ ސަރުކާރުގެ އިދާރާތަކާއި މަޝްވަރާ ކުރައްވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި އެ އެރަށުގެ ތަރައްޤީއަށް ކުރަންހުރި ކަންކަން ބަޖެޓުގައި ހިމަނައިގެން ސަރުކާރުން ކުރިޔަށްގެންދަވާނެކަމަށާއި އަދި އެ ކަންކަން ސަރުކާރުން ކުރިޔަށްގެންދަވާނީ އެ ދާއިރާއެއްގެ، އަދި އެރަށެއްގެ ރައްޔިތުންގެ ލަފަޔާއި މަޝްވަރާއާއެކު ކަމުގައި ވިދާޅުވިއެވެ.
