ހެލްތް މިނިސްޓްރީއާ ފެނަކައާ ދެމެދު އެއްބަސްވުމެއްގައި ސޮއިކޮށްފި
މައިގަނޑު މަގުސަދަކީ ސިއްހީ ދާއިރާ ޑިޖިޓަލައިޒް ކުރުމަށް ބޭނުންވާ އެހީތެރިކަން ދިނުން
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
މިނިސްޓްރީ އޮފް ހެލްތާއި ފެނަކަ ކޯޕަރޭޝަން ލިމިޓެޑާ ދެމެދު "މެމޮރެންޑަމް އޮފް އަންޑަރސްޓޭންޑިންގް''އެއްގައި ސޮއިކޮށްފިއެވެ.
ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައި މިއެއްބަސްވުމުގައި ހެލްތު މިނިސްޓްރީގެ ފަރާތުން ސޮއިކުރެއްވީ، މިނިސްޓަރު އަހުމަދު ނަސީމެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދެވެ.
މި އެއްބަސްވުމުގެ މައިގަނޑު މަގުސަދަކީ ސިއްހީ ދާއިރާ ޑިޖިޓަލައިޒް ކުރުމަށް ބޭނުންވާ އެހީތެރިކަން ދިނުމެވެ.
ހެލްތު މިނިސްޓްރީން ބުނީ މި އެއްބަސްވުމުގެ ސަބަބުން، ފެނަކަގެ އައިޓީ ޓީމުން ސިއްހީ ދާއިރާގެ އައިޓީ އިންފްރާސްޓްރަކްޗަރ އޮޑިޓެއް ހެދިގެން ދާނެކަމަށެވެ.
އޭގެތެރޭގައި، ސިއްހީ ދާއިރާ ޑިޖިޓަލައިޒްކުރުމަށް އިތުރަށް ހަރުދަނާ ކުރަންޖެހޭ ކަންތައްތައް އެނގިގެންދާނެ ކަމަށް މިނިސްޓްރީން ބުނެއެވެ. މިފަދަ މަޝްރޫއެއްގެ ސަބަބުން ސިއްހީ ޚިދުމަތްދޭ ތަންތަނުން ދެމުންދާ ޚިދުމަތްތަކާއި ކުރެވޭ މަސައްކަތްތަކުގެ މައުލޫމާތުތައް ފަސޭހައިން ޑޭޝްބޯރޑްސް ފަދަ އެކި ޑިޖިޓަލް ވަސީލަތްތައް މެދުވެރިކޮށް ހެލްތު މިނިސްޓްރީއަށް ދުވަހުން ދުވަހަށް ފެންނާނެ ފަދަ ނިޒާމެއް ގާއިމްކުރުމަށް މަގު ފަހިވެގެން ދާނެއެވެ.
މީގެ އިތުރުން ހެލްތު މިނިސްޓްރީން ބުނީ، މި މަސައްކަތާއެކު މިނިސްޓްރީގެ އެއް އަމާޒު ކަމަށްވާ ސިއްހީ ދާއިރާގައި ބޭނުންކުރަމުންދާ އެކި ސިސްޓަމްތަކާއި މި އެޕްލިކޭޝަންތައް ނެޝަނަލް ހެލްތު އިންފޮރމޭޝަން ސިސްޓަމާއި ގުޅާލުމަށް މަގު ފަހިވެގެންދާނެ ކަމަށެވެ.
