ޒުވާން ތިން ކުޅުންތެރިންވެސް ވޮލީގެ ފައިނަލް ސްކޮޑަށް

މި މަހު ބަންގްލަދޭޝްގައި ބާއްވާ ސެންޓްރަލް ޒޯން ވޮލީބޯޅަ މުބާރާތަށް އެކުލަވާލި ގައުމީ ފިރިހެން ވޮލީބޯޅަ ޓީމުގެ ފައިނަލް ސްކޮޑުގައި ޒުވާން ތިން ކުޅުންތެރިންވެސް ހިމަނައިފިއެވެ.

މި މަހުގެ 21 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް ބަންގްލަދޭޝްގައި ބާއްވާ މުބާރާތާ ގައުމީ ފިރިހެން ވޮލީ ޓީމު ކުރިމަތިލާނީ ތަޖުރިބާކާރު ކޯޗު މުޙައްމަދު ސާޖިދު (ކާއްޓޭ) ގެ އިރުޝާދުގެ ދަށުންނެވެ. މީގެ ކުރިން ދެ ފަހަރެއްގެ މަތިން ހެޑް ކޯޗުގެ މަގާމު ކާއްޓޭ އަދާކޮށްފައިވާއިރު، އޭނާގެ އިރުޝާދުގެ ދަށުން ގައުމީ ޓީމުން މީގެ ކުރިންވެސް ވަނީ ސެންޓްރަލް ޒޯން ވޮލީބޯޅަ މުބާރާތުގައި ވާދަކޮށްފައެވެ.

މި މުބާރާތަށް ތައްޔާރުވާން 21 ކުޅުންތެރިންގެ ސްކޮޑަކާއެކު ގައުމީ ޓީމުން އެންމެ ފުރަތަމަ ފަރިތަކުރުންތައް ފެށިއިރު، މިދިޔަ މަހު އެކުލަވާލި 15 ކުޅުންތެރިންގެ ސްކޮޑުގައި ޒުވާން ތިން ކުޅުންތެރިއަކު ހިމެނިއެވެ. އެ ތިން ކުޅުންތެރިންނަކީ އުމުރުން 17 އަހަރުގެ މާއިޝް އަޙްމަދާއި، އުމުރުން 19 އަހަރުގެ އަޙްމަދު ނާފިއު އަދި އުމުރުން 20 އަހަރުގެ ޝާމިލް މުޙައްމަދެވެ. މި ތިން ކުޅުންތެރިންނަކީވެސް ގައުމީ ސްކޮޑުގައި މުޅިން އަލަށް ހިމެނުނު ތިން ކުޅުންތެރިންނެވެ.

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ކްނިކަލް ކޮމިޓީން މީގެ ކުރިން ވަނީ ގައުމީ ޓީމުތަކަށް ކުޅުންތެރިން ނެގުމުގައި އުސޫލުތަކެއް ކަނޑައަޅާފައެވެ. އެގޮތުން މުބާރާތުގައި ވާދަކުރާ ސްކޮޑުގައި 23 އަހަރުން ދަށުގެ ގައުމީ ޓީމުގެ ދެ ކުޅުންތެރިން ހިމެނުމަށް ވަނީ ހަމަޖެހިފައެވެ. އެކަމަކު މުބާރާތަށް އެކުލަވާލި 12 ކުޅުންތެރިންގެ ސްކޮޑުގައި އެ ތިން ކުޅުންތެރިންވެސް ވަނީ ހިމަނާފައެވެ.

އެއާއެކު 15 ކުޅުންތެރިންގެ ސްކޮޑުން ބާކީކުރި ތިން ކުޅުންތެރިންނަކީ ދެ ލިބަރޯއިން ކަމަށްވާ އަޝްފާގު އާދަމް (އައްކަޅޭ) އާއި ޖަވާމް އަލީ އަދި ސެޓަރަކަށް ކުޅޭ އަޙްމަދު ޝިމާއުއެވެ. މި ސްކޮޑު ފައިނަލްކޮށްފައިވަނީ ލަންކާއާ ދެކޮޅަށް މާލޭގައި ދާދި ފަހުން ކުޅުނު އެކުވެރިކަމުގެ ތިން މެޗަށް ބަލައިގެންނެވެ. އެ މެޗުތަކުގައި ސެޓަރަކަށް ކުޅޭ ޝިމާއުއަށް ފުރުސަތު ލިބިފައި ނުވާއިރު، ދެ މެޗެއްގައި ފުރަތަމަ ލިބަރޯގެ ގޮތުގައި އައްކަޅޭ ކުޅުނެވެ. އަދި ޖަވާމުވެސް ވަނީ އެއް މެޗެއްގެ ފަހު ސެޓުގައި ކުޅެފައެވެ.

ކާއްޓޭގެ އިރުޝާދުގެ ދަށުން ސްކޮޑު ފައިނަލް ކުރިއިރު، ސެންޓްރަލް ޒޯން މުބާރާތަށް ދިއުމުގެ ކުރިން ގައުމީ ވޮލީބޯޅަ ޓީމުން މާލޭގައި އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ތިން މެޗެއް ކުޅޭ ގޮތަށް މިހާރު ވަނީ ހަމަޖެހިފައެވެ. ވީއޭއެމުގެ ރައީސް މުޙައްމަދު ރަނޭޝް (ރަނޭ) "ރާއްޖެ.އެމްވީ" އަށް ދެއްވި ޚާއްސަ އިންޓަވިއުއެއްގައި ވިދާޅުވީ އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް މެޗުތައް ކުޅޭނީ 16 ވަނަ ދުވަހުގެރޭ 21:00 ގައި އާއި، 17 އަދި 18 ވަނަ ދުވަހުގެރޭ 20:00 ގައި ކަމަށެވެ.

މި މަހު ބަންގްލަދޭޝްގައި ބާއްވާ މުބާރާތުގައި ގައުމީ ފިރިހެން ވޮލީ ޓީމުގެ އިތުރުން އަންހެން ޓީމުވެސް ވާދަކުރާނެއެވެ. މި ފަހަރުގެ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެއާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.