އިނގިރޭސި ޕްރިމިއާ ލީގުގެ ކުލަބުތަކުން ފާއިތުވެދިޔަ ހަފުތާއެއްހާ ދުވަހުގެ ތެރޭގައި ކޮވިޑް-19 ގެ ގިނަ ކޭސްތަކެއް ފެނިފައިވާއިރު، ލީގުގައި ބްރެންޓްފޯޑާއި މެންޗެސްޓާ ޔުނައިޓެޑް ބައްދަލުކުރަން އޮތް މެޗު ފަސްކޮށްފިއެވެ.

މިދިޔަ ހަފުތާއެއްހާ ދުވަހުގެ ތެރޭގައި ޕްރިމިއާ ލީގުން 3،805 ޓެސްޓުކޮށްފައިވާއިރު، 42 ޕޮޒިޓިވް ކޭސް ފެނިފައިވެއެވެ. ކޭސްތައް ފެނިފައިވަނީ ބްރައިޓަން، ޓޮޓެންހަމް ހޮޓްސްޕާ، ލެސްޓާ ސިޓީ، ޔުނައިޓެޑް، އެސްޓަން ވިލާ އަދި ނޯވިޗް ސިޓީންނެވެ. އެގޮތުން ޓޮޓެންހަމުގައި މިދިޔަ ހަފުތާގެ ތެރޭގައި ކޮވިޑުގެ ހާލަތު ގޯސްވެ، ޔުއެފާ ކޮންފަރެންސް ލީގުގައި އެ ޓީމުން ރެންއާ ދެކޮޅަށް ކުޅެން އޮތް މެޗާއި، މިދިޔަ އާދިއްތަ ދުވަހު ބްރައިޓަންއާ ދެކޮޅަށް ކުޅެން އޮތް މެޗު ވަނީ ފަސްކޮށްފައެވެ.

އިނގިރޭސިވިލާތުގައި އޮމިކްރޯން ވޭރިއަންޓުގެ ނުރައްކާ ބޮޑުވެފައިވާއިރު, ޕްރިމިއާ ލީގުން ވަނީ ކުލަބުތަކުން އިމަޖެންސީ ފިޔަވަޅު ވަރުގަދަ ކުރުމަށް އަންގާފައެވެ. އެގޮތުން އައު ޕްރޮޓޮކޯލެއް ހަދާފައިވާއިރު، ދެ ޑޯޒު ވެކްސިން ފުރިހަމަކުރި ރޭޓް މަތި ޓީމުތަކަށް މި އުސޫލުތަކުގައި ފަސޭހަތަކެއް އެބަހުއްޓެވެ.

އަންގާރަ ދުވަހުގެރޭ ބްރެންޓްފޯޑާއި ޔުނައިޓެޑް ބައްދަލުކުރަން އޮތް މެޗު ފަސްކުރީ ހޯމަ ދުވަހު ޔުނައިޓެޑުން ޕޮޒިޓިވް ކޭސްތަކެއް ފެނުމާ ގުޅިގެންނެވެ. ރިޕޯޓުތައް ބުނާ ގޮތުން ޔުނައިޓެޑުގެ ބައެއް ކުޅުންތެރިންގެ ފަރާތުން ކޮވިޑުގެ އަލާމަތްތަކެއް ފެނިގެން ހެދި ޕީސީއާރް ޓެސްތައް ވަނީ ޕޮޒިޓިވްވެފައެވެ.

ބްރެންޓްފޯޑްގެ ކޯޗު ތޯމަސް ފްރޭންކް ވަނީ ކޮވިޑާ ހެދި މެޗުތައް ކެންސަލް ކުރަނީ ކޮން އުސޫލަކުންތޯ އެނގިފައި އޮންނަން ޖެހޭ ކަމަށް ބުނެ ހިތްހަމަނުޖެހުން ފާޅުކޮށްފައެވެ. އެކަމަކު ޕްރިމިއާ ލީގުން ބުނީ ސިއްހީ ރައްކާތެރިކަން ފުރިހަމައަށް ކަށަވަރުނުވާތީ މެޗު ފަސްކުރަން ނިންމާފައިވާ ކަމަށެވެ.

މީގެ ކުރިން އާސެނަލުގެ ކޯޗު މިކޭލް އާޓެޓާ ވެސް ވަނީ ކޮވިޑުގެ ސަބަބުން މެޗެއް ފަސްކުރަން ޖެހޭނެ ހާލަތު ސާފުކޮށް އެނގެން އޮންނަން ޖެހޭނެ ކަމަށް ބުނެފައެވެ.