ޗެމްޕިއަންސް ލީގުގެ ގުރުލުން އަލުން ބާއްވަނީ
13 ޑިސެމްބަރު 2021 | ހޯމަ 13:43ފުރަތަމަ ގުރުލުމުގައި ތިން މައްސަލައެއް ފާހަގަވި
ޔުއެފާ ޗެމްޕިއަންސް ލީގުގެ ޓްރޮފީ
:ޔުއެފާ ޗެމްޕިއަންސް ލީގުގެ ދެވަނަ ބުރުގެ މެޗުތަކުގެ ގުރުއަތުލުން އަލުން ބާއްވަން ނިންމައިފިއެވެ.
ޔުއެފާ އިން މި ގޮތަށް ނިންމީ މެންޗެސްޓާ ޔުނައިޓެޑާއި އެތުލެޓިކޯ މެޑްރިޑުގެ ގުރުއަތުލުންތައް ކަނޑައެޅުމުގައި ހެދުނު ގޯސްތަކެއްގެ މައްސަލަ ހޫނުވެ، ގިނަ ޓީމުތަކަކުން އަލުން ގުރުއަތުލުން ބާއްވަން އެދުމާ ގުޅިގެންނެވެ.
އެގޮތުން ހޯމަ ދުވަހުގެ ހަވީރު ސްވިޓްޒަލެންޑުގެ ނިޔޯނުގައި ހުންނަ ޔުއެފާ ހެޑްކުއާޓަރުގައި ބޭއްވި ގުރުލުމުގައި ފާހަގަކުރެވުނު ފުރަތަމަ މައްސަލައަކީ މެންޗެސްޓާ ޔުނައިޓެޑާއި ވިޔަރެއާލް ކުޅެން ޖެހޭގޮތަށް ގުރުއަތުން ދިމާވުމެވެ. ޔުއެފާގެ ގަވާއިދުގައިވާ ގޮތުން އެއް ގްރޫޕެއްގައި އޮތް ދެ ޓީމަކަށް ދެވަނަ ބުރުގައި ނުކުޅެވޭނެއެވެ. އެހެންކަމުން އަލުން ގުުރުއަތުލައިގެން ޔުނައިޓެޑަށް ދިމާވީ ޕީއެސްޖީއެވެ.
ދެން ފާހަގަކުރެވުނު އަނެއް މައްސަލައަކީ ލިވަޕޫލުގެ ބޯޅަ އެތުލެޓިކޯއާ ކުޅެން ޖެހޭ ގުރުއަތުލުމުގައި ހިމެނުމެވެ. އެތުލެޓިކޯ އާއި ލިވަޕޫލް އެއް ގްރޫޕެއްގައި ކުޅެފައިވާއިރު، މި ދެ ޓީމަށް ދެވަނަ ބުުރުގައި ބައްދަލުނުކުރެވޭނެއެވެ. މީގެ އިތުރުން އެތުލެޓިކޯގެ ގުރުއަތުލުމުގައި ޔުނައިޓެޑް ހިމަނާފައިނުވުންވެސް ވަނީ ފާހަގަވެފައެވެ.
އެހެންކަމުން ޔުއެފާގެ ކޮމްޕެޓިޝަން ޑިޕާޓްމަންޓުން މިހާރު ވަނީ ފުރަތަަމަ ނެގި ގުރުއަތުލުން އެއްކޮށް އުވާލުމަަށް ނިންމާފައެވެ. ގުރުލުން އުވާލަން ނިންމައި ޔުއެފާއިން ނެރުނު ބަޔާނެއްގައި ބުނީ އެ މައްސަލަތައް ދިމާވީ ޓެކްނިކަލް ކަމެއްގެ ސަބަބުން ކަމަށެެވެ.
ޗެމްޕިއަންސް ލީގުގެ ދެވަނަ ބުރުގެ މެޗުތަކުގެ ގުރުއަތުލުން އަލުން ބާއްވާއިރު، އެ ގުރުލުން އޮންނާނީ ހޯމަ ދުވަހުގެރޭ ރާއްޖެ ގަޑިން 19:00 ގައެވެ.
