ފުވައްމުލަކު ދޫޑިގަން އަވަށުގައި އިމާރާތްކުރާ މިސްކިތުގެ ބިންގާ އަޅައިފި
13 ޑިސެމްބަރު 2021 | ހޯމަ 15:07މި މިސްކިތަކީ 500 މީހުންގެ ޖާގައިގެ މިސްކިތެއް
ނާއިބުރައީސް، މިސްކިތުގެ ބިންގާ އަޅުއްވައިދެއްވަނީ
ފުވައްމުލަކު ދޫޑިގަން އަވަށުގައި އިމާރާތްކުރާ މިސްކިތުގެ އަމަލީ މަސައްކަތް ނާއިބުރައީސް ފައިސަލް ނަސީމް ފައްޓަވައިދެއްވައިފިއެވެ.
ދައުލަތުގެ ބަޖެޓުން 11.9 މިލިއަން ރުފިޔާ ޚަރަދުކޮށްގެން އިމާރާތްކުރާ މި މިސްކިތަކީ 500 މީހުންގެ ޖާގައިގެ މިސްކިތެކެވެ.
ފުވައްމުލަކު ދޫޑިގަން އަވަށުގައި އިމާރާތްކުރާ މި މިސްކިތުގެ ބިންގާ އެޅުމުގެ ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރ ވިދާޅުވީ، މި މިސްކިތް އިމާރާތް ކުރުމަށް ހަމަޖެހިފައިވަނީ ހައިބަތު ފެންނަ ގޮތަކަށް ކަމަށެވެ. މިސްކިތުގެ ބޭރުން ބަލާލުމުން، މިސްކިތުގައި ނަމާދު ކުރެވޭނެ މީހުންގެ ޖާގަ އެނގޭ ގޮތަށް އިމާރާތް ކުރަން ނިންމާފައިވާ މި މިސްކިތް އެހާ ރީތިކޮށް އިމާރާތް ކުރަން ސަރުކާރުން އަމާޒު ހިފާފައިވަނީ، ކީރިތި ރަސޫލާވެސް އެގޮތަށް އަމަލު ކުރައްވާފައިވާތީ ކަމަށް އެމަނިކުފާނު ވިދާޅުވިއެވެ.
މިސްކިތްތައް ހަމައެކަނި ބޭރު ފުށުން ޒީނަތްތެރިކުރުމުން ނުފެދޭ ކަމަށާއި، މިސްކިތްތައް އަޅުކަމުން ޒީނަތްތެރިކުރަން ޖެހޭ ކަމަށް އިސްލާމިކް މިނިސްޓަރ ވިދާޅުވިއެވެ. އަޅުކަމުގެ އެކިއެކި ކަންތައްތަކަށް ރަސޫލާ މިސްކިތްތައް ބޭނުންކުރެއްވިކަން ފާހަގަކުރައްވައި މިނިސްޓަރ ވިދާޅުވީ، މިސްކިތުގައި ޤުރުއާން ކްލާސް ފެށުމަކީ މިނިސްޓްރީގެ އަމާޒެއް ކަމަށެވެ. ކޮވިޑާ ގުޅިގެން އެކަން ހުއްޓިފައި އޮތް ނަމަވެސް ވަރަށް އަވަހަށް އެ މަސައްކަތް ފައްޓަވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ ކީރިތި ޤުރުއާނާބެހޭ ޤައުމީ މަރުކަޒުގެ ދެ އިމާރާތް ފުވައްމުލަކުގައި އެޅުމުގެ މަސައްކަތް ފެށިގެންދާނެ ކަމަށާއި، މިސްކިތުގެ އަމަލީ މަސައްކަތް އަންނަ ހަފުތާގައި ފެށިގެންދާނެ ކަމަށެވެ. ދީނީ ކަންތައްތަކަށް ސަރުކާރުން ދޭ ސަމާލުކަން ދިރިއުޅުމުގެ އަމަލީ މަސައްކަތުން ވެސް ދައްކުވައި ދިނުމަށް މިނިސްޓަރ އެދިވަޑައިގަންނަވަމުން، ދީނަކީ މުޅި ދިރިއުޅުމުގެ ނިޒާމުކަމަށް މިނިސްޓަރ ވިދާޅުވިއެވެ.
އިސްލާމް ދީނުގައި އަންގަވާފައިވާ ގޮތަށް އެމީހެއްގެ ދިރިއުޅުން ބައްޓަންކުރަން ޖެހޭކަމަށް މިނިސްޓަރ ވިދާޅުވިއެވެ.
މި މިސްކިތް އިމާރާތް ކުރުމުގެ އެއްބަސްވުމުގައި އިސްލާމިކް މިނިސްޓްރީން، އަމޭން މޯލްޑިވްސް ޕްރައިވެޓް ލިމިޓެޑްއާއެކު ސޮއިކޮށްފައިވަނީ 17 ނޮވެމްބަރު 2021 ގައެވެ. ޒަމާނީ ޑިޒައިނަކަށް އިމާރާތްކުރާ މި މިސްކިތް ނިންމުމަށް ހަމަޖެހިފައިވަނީ އެއްއަހަރު ދުވަހުގެ ތެރޭގައެވެ.
