އުރީދޫގެ އެމްފައިސާއިން ބިލު ދައްކައިގެން 10 އިންސައްތަ އަނބުރާ އެކައުންޓަށް ލިބޭ ޕްރޮމޯޝަނެއް އުރީދޫ މޯލްޑިވްސް އިން ފަށައިފިއެވެ.

މި ޕްރޮމޯޝަންގެ ދަށުން ބައެއް ރެސްޓޯރެންޓްތަކާ ސުޕަމާޓްތަކަށް އެމްފައިސާ މެދުވެރިކޮށް ބިލް ދެއްކުމުން ކަސްޓަމަރުގެ އެކައުންޓަށް ބިލްގެ 10 އިންސައްތަ އަނބުރާ ލިބޭނެއެވެ. މީގެ ތެރޭގައި ސެމިލީސް، ދަ ޑައިނާސް ކްލަބް، ދަ ގްރޯވް، ރެޑްވޭ، ވީބީ މާޓް އަދި ޑަބްލިއުއެޗްއައިއެމް ފަދަ ތަންތަން ހިމެނެއެވެ.

މި މަހުގެ ނިޔަލަށް ކުރިއަށްދާ މި ޕްރޮމޯޝަންގެ ދަށުން އެމްފައިސާއިން ބިލް ދެއްކުމުން ކަސްޓަމަރުންނަށް ލިބޭ ފައިސާ ޖަމާވާނީ ކަސްޓަމަރުގެ އެމްފައިސާ އެކައުންޓަށެވެ.

އުރީދޫ އެމް ފައިސާ އަކީ ފަސޭހައިން ބިލުތައް ދެއްކޭގޮތަށް ތައާރަފު ކޮށްފައިވާ ޑިޖިޓަލް ވޮލެޓެކެވެ. މި ވޮލެޓަށް ބީއެމްއެލްއާ، އެމްއައިބީ އަދި އެސްއައިބީ އެކައުންޓުތައް މެދުވެރިކޮށް ކޭޝް އިން ކުރެވޭނެއެވެ. މިއީ ކޮންމެ ތަނަކުން، އަދި ކޮންމެ ވަގުތެއްގައި ވެސް، ޑިޖިޓަލް ވޮލެޓެއް މެދުވެރިކޮށް ފައިސާ ޖަމާކޮށް، ފައިސާ ނަގައި، އެއް އެކައުންޓުން އަނެއް އެކައުންޓަށް ފައިސާ ފޮނުވައި، ތަފާތު ހިދުމަތްތަކަށް ފައިސާ ދެއްކުމަށް މަގުފަހިކޮށްދޭ ޑިޖިޓަލް ޕޭމަންޓް ސޮލިއުޝަނެކެވެ.

އެމްފައިސާ ބޭނުންވާ ކަސްޓަމަރުންނަށް އުރީދޫ މޯބައިލް އެޕްލިކޭޝަން މެދުވެރިކޮށް ފަސޭހަކަމާއެކު ރަޖިސްޓްރީ ކުރެވޭނެއެވެ.

އެމްފައިސާއަކީ ފެނުގެ ޚިދުމަތްފަދަ އެންމެ ގިނަ ޔޫޓިލިޓީ ބިލްތަކަށް އެއްތަނަކުން ފައިސާ ދެއްކެވުމަށް ރާއްޖޭގައި ބޭނުން ކުރެވޭ ޑިޖިޓަލް ޕްލެޓްފޯމްއެވެ. މީގެ ތެރޭގައި އުރީދޫ، ސްޓެލްކޯ، އެމްޑަބްލިއުއެސްސީ، މީޑިއާނެޓް، މޯލްޑިވް ގޭސް އަދި ވިލާ ގޭސް ފަދަ ގިނަ ކުންފުނިތަކެއް ހިމެނެއެވެ.