ހަފްތާއެއްގެ ތެރޭގައި 40 މީހުން ކޮވިޑް-19 އަށް ޕޮޒިޓިވް ވެފައިވާ ކަމަށް ހދ.ހަނިމާދޫ ސިއްހީ މަރުކަޒުން ބުނެފިއެވެ.

މި މަހު ފަސްވަނަ ދުވަހު ރޯގާގެ އަލާމާތްތައް ހުރެގެން އެ ރަށު ސިއްހީ މަރުކަޒަށް ދެއްކި މީހަކު މި މަހު 6 ވަނަ ދުވަހު ކޮވިޑް-19 އަށް ވަނީ ޕޮޒިޓިވްވެފައެވެ. އެ ކޭސް އާޢި ގުޅިގެން ކޮންޓެކްޓް ޓްރޭޝިންގެ ތެރެއިން 40 މީހަކު މިހާތަނަށް އެ ބައްޔަށް ވަނީ ޕޮޒިޓިވް ވެފައި ވާކަމަށް، ސިއްހީ މަރުކަޒުން ބުނެއެވެ.

ހަނިމާދޫ ސިއްހީ މަރުކަޒުން ބުނީ މިމަހު 5 ވަނަ ދުވަހު ކޮވިޑަށް ޕޮޒިޓިވް ވެފައިވަނީ އެ ރަށު ކެފޭއެއްގައި މަސައްކަތް ކުރާ އަންހެން ކުއްޖެކެވެ. އެ ކެފޭއިން އޭނާގެ ޑައިރެކްޓް ކޮންޓެކްޓުންގެ ގޮތުގައި އެ ކެފޭގައި މަސައްކަތް ކުރާ އިތުރު 3 މީހަކުވެސް ވަނީ ޕޮޒިޓިވްވެފައެވެ.

ހަނިމާދޫގައި މިހާރު ކުރިއަށްދާ އާދަމް ސަލީމް ކަޕް 2021ގެ ކުޅުން ތެރިޔަކުވެސް ޕޮޒިޓިވް ވުމާގުޅިގެން، އެ މުބާރާތް ވެސް ވަނީ މެދު ކަނޑާލާފައެވެ.

ހަފުތާއެއްގެ ތެރޭގައި 40 މީހުން ޕޮޒިޓިވްވެ، ހަލުވިކަމާއި އެކު އެރަށުގައި މި ރޯގާ ފެތުރޭތީ ހެލްތް ސެންޓަރުން އިލްތިމާސް ކުރަނީ ބަލި ކޮންޓްރޯލް ކުރުމަށް ކޮވިޑް ޓާސްކްފޯހަށް އެއްބާރުލުން ދީގެން ކޮވިޑުން ރައްކާތެރިވުމަށް ދޭ އިރުޝާދު ތަކަށް ފުރިހަމައަށް އަމަލުކުރުމަށެވެ.