ބަދަހި ހިރަފުސް ކަޕް 2021، ކުޅުދުއްފުށީގައި ފަށައިފި

ކުޅުދުއްފުށީ ހިރަފުސް ޓީމުގެ ފަރާތުން އިންތިޒާމުކޮށްގެން ބާއްވާ "ބަދަހި ހިރަފުސް ކަޕް 2021" ފުޓްބޯޅަ މުބާރާތް ހޮނިހިރު ދުވަހު ފަށައިފިއެވެ.

މި މުބާރާތަކީ "ހީވާގި މަސްވެރިންނާއެކު ހިރަފުސް" މި ޝިއާރުގެ ދަށުން ކުރިއަށްގެންދާ މުބާރާތެކެވެ. މި މުބާރާތް ފެށުމަށް މީގެ ކުރިން ހަމަޖެހިފައި އޮތީ ހުކުރު ދުވަހެވެ. އެކަމަކު މޫސުން ތަންނުދިނުމުން މުބާރާތް ފަށާފައިވަނީ ހޮނިހިރު ދުވަހެވެ. މި މުބާރާތުގައި ޖުމްލަ ހަ ޓީމެއް ވާދަކުރެއެވެ. އެއީ ބަރަކޫޑާ، ބްލޫ މާލިންސް، ވައިލެޓް، ރެޑް ސްނެޕާސް، ސްޕީޑީ ޖޫސް އަދި ފެމެލީ ބޭކަރީއެވެ.

މުބާރާތް ހުޅުވި މެޗުގައި ބައްދަލުކޮށްފައިވަނީ ބަރަކޫޑާ އާއި ބްލޫ މާލިންސްއެވެ. މި މެޗު 2-1 ގެ ނަތީޖާއަކުން ކާމިޔާބުކުރީ ބަރަކޫޑާއިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ބަރަކޫޑާގެ ހުސެއިން މުޙައްމަދު (ޕޮލީ) އެވެ.

މުބާރާތް އިންތިޒާމުކުރާ ހިރަފުސް ޓީމުން ބުނީ މި މުބާރާޓް ބޭއްވުމުގެ މަގުސަދަކީ ޒުވާނުންގެ މެދުގައި އެއްބައިވަންތަކަން އުފެއްދުމާއި، ޒުވާނުން ބައްދަލުވެ، އެއްބަޔަކު އަނެއް ބަޔަކާ އެކުވެރިކަން އާލާކުރުމާއި، ކުޅިވަރުގެ ރޫހާއި އެއްގޮތަށް ފުޓްބޯޅަ ކުރިއަށް ގެންދިއުމާއި ހަވީރު ހިރަފުސް ދަނޑަށް ކުޅެން ދިއުމަށް ކުޅުންތެރިންނަށް ބާރުއެޅުމެވެ.

މީގެ އިތުރުން ހިރަފުސް ދަނޑަށް ކުޅެންދާ ހުރިހާ އެންމެން ތަފާތު ކުރުމެއް ނެތި ފުޓްބޯޅަ މުބާރާތެއްގައި ކުޅުމުގެ ފުރުސަތު ހޯދައިދިނުމުގެ އިތުރުން، ޒުވާން ކުޅުންތެރިން ބޮޑެތި މުބާރާތްތަކުގައި ބައިވެރިވުމަށް ޝައުޤުވެރިކަން އުފެއްދުމަކީވެސް މި މުބާރާތުގެ މަގުސަދެއް ކަމަށް ވަނީ ބުނެފައެވެ.

މި މުބާރާތުގެ މެޗެއް އާދީއްތަ ދުވަހުވެސް ކުޅޭނެއެވެ. އެ މެޗުގައި ބައްދަލުކުރާނީ ސްޕީޑީ ޖޫސް އާއި ފެމެލީ ބޭކަރީއެވެ.

މި އަހަރު ބަދަހި ހިރަފުސް ކަޕް ބާއްވާއިރު، މިދިޔަ އަހަރުވެސް ވަނީ ބަދަހި ހިރަފުސް ކަޕުގެ ނަމުގައި ފުޓްބޯޅަ މުބާރާތެއް ކުރިއަށް ގެންގޮސްފައެވެ.