ހދ.ކުޅުދުއްފުށީގެ މަގުތަކުގައި ތާރުއަޅައި ޒަމާނީ ފެންވަރަށް ތަރައްގީކުރުމުގެ މަސައްކަތުގެ ދަށުން، ދެވަނަ ފިޔަވަހީގެ މަސައްކަތްތައް ފެށުމަށް ތައްޔާރުވެއްޖެއެވެ. މި މަސައްކަތް ހަވާލުކޮށްފައި ވަނީ ރޯޑް ޑިވެލޮޕްމަންޓް ކޯޕަރޭޝަން އާރްޑީސީއާއެވެ.

ކުޅުދުއްފުށީގެ އިތުރު މަގުތަކުގައި ތާރުއަޅައިގެން ޒަމާނީ ފެންވަރަށް ތަރައްގީކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން އާރްޑީސީއާ ހަވާލުކޮށްފައި ވަނީ މިއަހަރުގެ ފެބްރުއަރީމަހުއެވެ. ނަމަވެސް ކޮވިޑްގެ ހާލަތާ ގުޅިގެން މަސައްކަތް މަޑުޖެހިފައި އޮތުމަށްފަހު، އެ ކުންފުނިން މިހާރު ވަނީ ކުޅުދުއްފުށީގައި މަސައްކަތް ފެށުމަށް ތައްޔާރުވާން ފަށާފައެވެ. އެގޮތުން ކުޅުދުއްފުށީ މަގުތައް ތާރުއަޅައި، ޒަމާނީ ފެންވަރަށް ތަރައްގީ ކުރުމުގެ މަސައްކަތް ފެށުމަށްޓަކައި ކާސްޓިންގގެ މަސައްކަތް ހޮނިހިރު ދުވަހު އާރްޑީސީއިން ވަނީ ފަށާފައެވެ.

ދެވަނަ ފިޔަވަހީގެ މަސައްކަތުގައި ހިމެނެނީ އެރަށުގެ އިތުރު 24 މަގެއްގައި ތާރު އަޅައިގެން ތަރައްގީކުރުމެވެ. އެއީ 6 ކިލޯމީޓަރުގެ މަގުގެ ސަރަހައްދެވެ. ތާރުއެޅުމުގެ އިތުރުން މަގުތަކުގައި ފެން ހިންދާ ނިޒާމު ގާއިމުކުރުމާއި، މަގުބައްތި ޖެހުމާއި ސްޕީޑް ބްރޭކަރު ހަރުކުރުމުގެ މަސައްކަތް ހިމެނެއެވެ. މި މަސައްކަތް އާރްޑީސީއާ ހަވާލުކޮށްފައިވަނީ 100.7 މިލިއަން ރުފިޔާއަށް، އެއް އަހަރާއި 7 މަސް ދުވަހުން ނިންމާގޮތަށެވެ. ކުޅުދުއްފުށީ މަގުތައް ޒަމާނީ ފެންވަރަށް ތަރައްގީކުރުމުގެ ފުރަތަމަ ފިޔަވަހީގެ މަސައްކަތް ކުރިއަށްގެން ދިޔައީ 2016 ވަނަ އަހަރުއެވެ. ފުރަތަމަ ފިޔަވަހީގައި ރަށުގެ 18 މަގެއްގައި ތާރުއަޅާފައިވެއެވެ. ފުރަތަމަ ފިޔަވަހީގެ މަސައްކަތްތައް މުޅިން ނިމިފައި ވަނީ 2018 ވަނަ އަހަރުއެވެ.

ކުޅުދުއްފުށީގެ މަގުތައް ތަރައްގީކުރުމުގެ ފުރަތަމަ ފިޔަވަހީގައި ތާރު އެޅީ، ރައްޔިތުން އާއްމު ގިނަ ޚިދުމަތްތައް ހޯދުމަށްދާ އެކިއެކި މުއައްސަސާތައް ހުރި މަގުތަކުގައެވެ. އެގޮތުން ހޮސްޕިޓަލާއި ސްކޫލް ހުންނަ މަގުގެ އިތުރުން ބަނދަރު ސަރަހައްދު ހިމެނެއެވެ. ދެވަނަ ފިޔަވަހީގެ މަސައްކަތްތައްވެސް ގުޅިގެން އަންނާނީ މި ސަރަޙައްދުތަކާއެވެ. ހދ. ކުޅުދުއްޓަކީ އެ ސަރަޙައްދުގެ ރީޖަނަލް ހޮސްޕިޓަލް ހުންނަ ރަށަށްވުމާއި، އަދި އިތުރު ގިނަ ޚިދުމަތްތަކެއް ލިބޭ ރަށަކަށްވާތީ ކޮންމެ ދުވަހަކުވެސް ގިނަ ބަޔަކު އަރާ ފައިބާ ރަށެކެވެ.

ފުރަތަމަ ފިޔަވަހީގެ ދަށުން 18 މަގެއްގައި ތާރުއަޅާ ނިމި އެމަގުތައް ބޭނުންކުރަމުން ދިޔަނަމަވެސް، ފެންހިންދާނޭ ރަނގަޅު ނިޒާމެއް ގާއިމުކުރެވިފައި ނެތުމުގެ ސަބަބުން ވާރޭވެހޭ މޫސުމަށް ތާރު އެޅިމަގުތަކުގައި ފެންބޮޑުވެ ރައްޔިތުން ދަތިތަކާއި ކުރިމަތިލާންޖެހެއެވެ. ކުޅުދުއްފުށީ ވެފައި ވަނީ މަގުތައް ހަލާކުވެ، ފެންބޮޑުވުމުގެ މައްސަލަވެސް ބޮޑު ރަށަކަށެވެ. އެހެންކަމުން ފެން ހިންދާ ނިޒާމާއެކު މަގުތައް ހެދުންވެފައި ވަނީ އެރަށަށް މުހިންމު މަސައްކަތަކަށެވެ.