މަސްވެރިންގެ ދުވަހާ ގުޅުވައިގެން އެމްޓީސީސީން ޚާއްސަ ފޯރަމެއް ބާއްވައިފި
ޕްރޮޑަކްޓުތަކާއި ޚިދުމަތްތަކުގެ މައުލޫމާތާއި ބޯޓުޔާޑުން ލިބޭ ޚިދުމަތްތަކުގެ މައުލޫމާތު ހިއްސާކުރި
އެމްޓީސީސީ އިން ކ.ގާފަރުގައި ބޭއްވި އޮޑިވެރިޔާ ފޯރަމްގެ ތެރެއިން
މަސްވެރިންގެ ދުވަހާ ގުޅުވައިގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން “އޮޑިވެރިޔާ” ގެ ނަމުގައު ފޯރަމެއް ބާއްވައިފިއެވެ.
ބުރާސްފަތި ދުވަހު މި ފޯރަމް ބޭއްވީ ކ. ގާފަރުގައެވެ. މިއީ އެ ކުންފުނިން ވިއްކާ މެރިން ދާއިރާގެ ޕްރޮޑަކްޓުތަކާއި ޚޮދުމަތްތަކުގެ މައުލޫމާތާއި، ބޯޓު ޔާޑުން ލިބޭ ޚިދުމަތްތަކުގެ މައުލޫމާތު ހިއްސާކުރުމަށް ކުރިއަށްގެންދިޔަ ފޯރަމެކެވެ.
މި ފޯރަމުގައި އެމްޓީސީސީގެ ބޯޓުޔާޑާއި، ކަށަވަރުގެ ޚިދުމަތްތަކާ ގުޅޭގޮތުން އެ ކުންފުނީގެ އިންޖީނިއަރިން އަދި ޓްރޭޑިން ޑިވިޝަނުގެ 6 މެންބަރުން ހިމެނޭހެން ޕެނަލް ޑިސްކަޝަނެއް ވަނީ ކުރިއަށް ގެންގޮސްފައެވެ. އަދި ޔަންމާ އިންބޯޑު އިންޖީނާއި، ސުޒުކީ އައުޓްބޯޑް އިންޖީނާއި، ކާސްޓްރޯލް އަޑީތެލާއި، ޕީޕީޖީ ޕްރޮޓެކްޓިވް މެރިން ކޯޓިން އާއި ބޯޓު ޔާޑުން ދޭ ޑޮކިން އާއި އިންޖިނިއަރިން އާއި ވެލްޑިން އާއި މެޓަލް ފެބްރިކޭޝަނާއި ފައިބާ އަދި ވަޑާމުގެ ޚިދުމަތްތަކުގެ މައުލޫމާތުވެސް އެމްޓީސީސީން ހިއްސާކުރިއެވެ.
އެމްޓީސީސީން ބުނީ އެ ކުންފުނީގެ އަމާޒަކީ މެރިން ދާއިރާއަށް ބޭނުންވާ ހުރިހާ މުދަލަކާއި ޚިދުމަތެއްގެ ހައްލު އެއްފުރާޅެއްގެ ދަށުން އޮޑިވެރީންނާއި މަސްވެރިންނަށް ލިބޭނެ މަގު ފަހި ކޮށްދިނުން ކަމަށެވެ. އަދި ރައްޔިތުންނާ ގާތުން ޚިދުމަތްތައް ފޯރުކޮށްދީ، އެ ކުންފުނީގެ ޚިދުމަތްތައް ލިބިގަންނަ ފަރާތްތަކަށް ލުއިފަސޭހަ ގޮތްތަކެއް ހޯދައިދިނުމަކީ އަބަދުވެސް އެ ކުންފުނީގެ އަމާޒެއް ކަމަށް ބުންޏެވެ.
