މަހުގެ ސިނާއަތް ފުޅާކޮށް، އޭގެ ނަފާ އިތުރުކުރެވޭނީ ހަމައެކަނި ރޯމަސް އެކްސްޕޯޓް ކުރުމުގެ ވިސްނުން ދޫކޮށްލައިގެން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ގާފަރުގައި މަސްވެރިވެރިންގެ ދުވަސް ފާހަގަކުރުމަށް ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ, ހަމައެކަނި ރޯމަސް އެކްސްޕޯޓް ކުރުމުގެ ބަދަލުގައި ބާނާ މަހަށް އެކުވި އަގެއް ލިއްބައިދެވޭނެ ވެލިއު އެޑެޑް އުފެއްދުންތަކުގެ ގޮތުގައި މަސް އެކްސްޕޯޓް ކުރެވެން ޖެހޭ ކަމަށެވެ. މިކަމަށްޓަކާ ވަކި ޚާއްސަ ކަންތައްތަކެއް ސަރުކާރުން ކުރަައްވާ ކަަމަށާއި, އެގޮތުން ފެލިވަރު އެކްސްޕެންޝަންޕްރޮޖެކްޓްގެ ދަށުން ފެލިވަރުގެ ޕްރޮސެސިން ކެޕޭސިޓީ ދެގުނައަށް އިތުރުކުރެވޭނެ ކަމަށެެވެ. އެއީ މުޅިން އަލަށް ދުވާލަކަށް އިތުރު 100 ޓަނު ޕްރޮސެސްކުރުމުގެ ގާބިލްކަން އެކާރުޚާނާއަށް ލިބިގެން ދިއުން ކަމަށް ރައީސް ވިދާޅުވިއެވެ. ރައީސް ވިދާޅުވީ, ފެލިވަރުގައި މިކަމަށް ބޭނުންވާ ބިން އިތުރުކުރުމުގެ މަސައްކަތް މިހާރުދަނީ ހިނގަމުން ކަމަށާއި, އަންނަ އަހަރު ޕްރޮސެސިން ޕްލާންޓްގެ އަމަލީ މަސައްކަތް ފެށިގެންދާނެ ކަމަށެވެ.

ދިވެހިން ބާނާ މަސް ޕްރޮސެސް ނުކޮށް ރޯމަހުގެ ގޮތުގައި އެކްސްޕޯރޓް ކުރުމަކީ ޒަމާނުއްސުރެ ކަންހިނގާ ގޮތް ކަމަށާއި, ނަތީޖާއަކަށްވީ މިސިނާއަތް ތަރައްގީ ވާންޖެހޭ މިންވަރަށް ތަރައްގީ ނުވުންކަން ރައީސް ފާހަގަކުރެއްވިއެވެ. ނަތީޖާއެއްގެ ގޮތުން މަހުގެ އުފެއްދުންތެރިކަން ގައުމުގެ އެތެރޭގައި ހިފެހެއްޓި ހުއްޓުން އަރާފައި އޮވެ, ދިވެހި މަހުގެ ފައިދާ އެހެން ގައުމުތަކުން ނެގުން ކަމުގައި ރައީސް ވިދާޅުވިއެވެ.

ފެލިވަރު، ކޫއްޑޫ، ކަނޑުއޮތްގިރި، އަދި ތިނަދޫ އާއި މުލަކުގައި، ގާއިމުކުރެވޭ ކޯލްޑް ސްޓޯރޭޖް ބޮޑުކުރުން ކުރިއަށްދާނެ ކަމަށާއި، އެއީ ޖުމުލަ ކެޕޭސިޓީ 9000 ޓަނަށް ވުރެ އިތުރުވެގެންދާނެ މަޝްރޫއއް ކަމަށް ރައީސް ވިދާޅުވިއެވެ. މިމަޝްރޫއުތައް ނިމުމުން މަސްވެރިންގެ އަތުން މަސްގަނެވޭ މިންވަރު ދުވާލެއްގެ މައްޗަށް 61 އިންސައްތަ މިހާރަށްވުރެ އިތުރު ކުރުމުގެ ގާބިލްކަން މިފްކޯ އަށް ލިބިގެންދާނެއެވެ.

ޖަލްސާއަށްފަހު ރައީސް ވަނީ ބައެއް މަސްވެރިންނާ ބައްދަލު ކުރައްވައި، މަސްވެރިކަމުގެ ދާއިރާގައި ހުރި ގޮންޖެހުންތަކާއި، ދާއިރާ އިތުރަށް ކުރިއެރުވިދާނެ ގޮތާއި ބެހޭ ގޮތުން މަޝްވަރާ ކުރައްވާފައެވެ.