ރައްޔިތުންގެ ލޯ ލާރިއަކަށްވެސް ޚިޔާނާތްތެރިއެއް ނުވަން، މަހުގެ އަގު އަންނަ އަހަރު މަތިވާނެ - ރައީސް
10 ޑިސެމްބަރު 2021 | ހުކުރު 17:29މި ސަރުކާރުގެ ސިޔާސަތަކަށްވީ، މަސް ގަތުމަށްފަހު ދޭންޖެހޭ ފައިސާ ދެވޭނެ އިންތިޒާމު ނިޒާމީ ގޮތެއްގައި ހަމަޖެއްސުން
މަސްވެރިންގެ ދުވަހުގެ ޚާއްސަ ޖަލްސާގެ ތެރެއިން
އަންނަ އަހަރުގެ ފުރަތަމަ ތިން މަސް ދުވަހުގެ ތެރޭގައި، މަހުގެ އަގު މަތިވާން ފަށާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މަސްވެރިންގެ ދުވަހުގެ ޚާއްސަ ޖަލްސާގައި ކ.ގާފަރުގައި ވާހަކަފުޅު ދައްކަވަމުން ރައީސް ވިދާޅުވީ, ދެން ވާން އޮތް ރަނގަޅަކީ، މަސްވެރިންނަށް ރަނގަޅު އަގެއް ލިއްބައިދިނުކަމަށެވެ. އެކަމަށްޓަކާ އެތައްކަމެއް ސަރުކާރުން ކުރަމުންދާ ކަމަށާއި, އެކަން ޙާޞިލުވާނެ ކަމުގެ އުންމީދު އެބައޮތް ކަމުގައި ރައީސް ވިދާޅުވިއެވެ. މަހުގެ އަގު މަތިވާން ފެށުމާއެކު މަސްވެރިންނާ ސަރުކާރު އެކުގައި ތިބުމަށް ބޭނުންކުރި ބޭހުގެ ފޮނިނަތީޖާ ފުރަތަމަ ފެންނަން ފަށާނީ އެދުވަހުން ކަމުގައި ރައީސް ވިދާޅުވިއެވެ.
މި ސަރުކާރުގެ ސިޔާސަތަކަށްވީ، މަސް ގަތުމަށްފަހު ދޭންޖެހޭ ފައިސާ ދެވޭނެ އިންތިޒާމު ނިޒާމީ ގޮތެއްގައި ހަމަޖެއްސުން ކަމަށާއި, ގިނަވެގެން އެއް ހަފްތާގެ ތެރޭގައި މަސްވެރިންނަށް ފައިސާދީ ޚަލާޞް ކުރުން ކަމުގައެވެ. މަސްވެރިންނަށް ފައިސާ ނުދީ، އެފައިސާ ވެސް ވަކި އެކައުންޓަކަށް ޖަމާކޮށްގެން، އޭގެ މަންފާ ހޯދުމުގެ ސިޔާސަތު މިސަރުކާރުގައި ނުގެންގުޅޭ ކަމުގައި ރައީސް ވިދާޅުވިއެވެ. އޭގެ ނަތީޖާ މިހާރުވެސް ފެންނަމުންދާކަން އެމަނިކުފާނު ފާހަގަކުރެއްވިއެވެ.
ރައްޔިތުންގެ ލޯލާރިއަކަށް ވެސް އެމަނިކުފާނު ޚިޔާނާތްތެރިއެއް ނުވާނެ ކަމަށާއި, ވެރިކަމުގެ މަސްއޫލިއްޔަތާ ޒިންމާގެ ބޮޑުކަމާ މަތިވެރިކަން، ދައްޗާ ތުރާލާ އުނދަގުލުގެ ތެރޭގައިވެސް ހަނދާނުން ކެހިގެން ނުދާނެ ކަމަށް ވިދާޅުވިއެވެ.
ރައީސް ވިދާޅުވީ, މަހުގެ އަގު ދިނުމާ އެއްވަރަށް ސަރުކާރުން އިސްކަންދޭ އަނެއް ކަމަކީ އަގަކަށް އަގެއް ދިނުމުގެ ބަދަލުގައި، ބާނާ މަހަށް ރަނގަޅު އަގެއް ހޯދައިދިނުން ކަމަށެެވެ. މަސްވެރިންނަށް އަވަހަށް ފައިސާ ދިނުމުގެ ނިޒާމް ހަމަޖެއްސުމަކީ، ވިޔަކޮށް ހިސާބު އަކުރުން ހޯދަން ޖެހުނު ޙައްލެއްކަމަށާއި, ފުރަތަމަ ޖެހުނީ މިފްކޯ ފެންމަތީގައި އޮންނާނެ ގޮތެއް ހޯއްދަވަން ކަމަށް ވިދާޅުވިއެވެ.
ދުނިޔޭގެ ބާޒާރުގައި ހުންނަ މަހުގެ އަގަށް ބަލައި، މިފްކޯގެ ގެއްލުން ކުޑަކޮށް ދެމެހެއްޓެނިވި ގޮތެއްގައި އެކުންފުނި ހިންގޭނެ މަގެއް ހޯއްދެވުމަށް ކުރެއްވި މަސައްކަތުގެ އެންމެ މުހިންމު ފިޔަވަޅު އަޅައިދިނީ ރާއްޖޭގެ މަސްވެރިންކަން އެމަނިކުފާނު ފާހަގަކުރެއްވިއެވެ. އެއީ މިފްކޯއަށް ގަންނަ މަހުގެ އަގަށް، މިދިޔަ އަހަރު ގެނައި ވަގުތީ ބަދަލުގެ، ބުރަ އުފުއްލަވައިދެއްވީ މަސްވެރިން ކަމަށާއި, ހިތްހަމަ ނުޖެހުމާ، ނުތަނަވަސް ކަމާއެކުވެސް، ކުރުމުއްދަތަކަށް އެހިތި ބޭސް، މަސްވެރިން ބޭނުން ކުރެއްވުމުން ލިބޭ ދެމެހެއްޓެނިވި ޝިފާ މިހާރު ވަނީ އަތްލެވޭހާ ގާތުގައި ކަމަށް ވިދާޅުވިއެވެ.
ގާފަރުގައި ރަސްމީކޮށް މަސްވެރިންގެ ދުވަހުގެ ހަރަކާތްތައް ކުރިއަށްދާއިރު, ރާއްޖޭގެ އެކި ކަންކޮޅުތަކުގައިވެސް މަސްވެރިންގެ ދުވަސް އަންނަނީ ފާހަގަކުރަމުންނެވެ.
