ކުށުގެ ތުހުމަތުގައި ހައްޔަރުކުރާ މީހުންނާއި ހުކުމުގައި ތިބޭ ގައިދީން އެއްތަނެއްގައި ގެންގުޅެނީ ވަކިން ގެންގުޅޭނެ ޖާގަ ނެތުމުން ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.

އަދގެ ވާރކިންގ ގްރޫޕް އޮން އާބިޓްރަރީ ޑިޓެންޝަންގެ ހޯދުންތަކުގައި ޖަލުތަކުގެ ހާލަތު ހުރީ ގޯސްކޮށް ކަމަށް ބުނެފައިވާތީ، އެކަމާ ގުޅިގެން ކޮމިޝަނަރ އޮފް ޕްރިޒަންސް އަހުމަދު ވިދާޅުވީ، ޖަލުގެ ޖާގައިގެ ދަތިކަން އެބައޮތް ކަމަށާއި، އެކަން ހައްލު ކުރުމަށް މިހާރުވެސް މަސައްކަތްތަކެއް ކުރައްވާ ކަމަށެވެ. ކުށުގެ ތުހުމަތުގައި ހައްޔަރުކުރާ މީހުންނާއި ހުކުމުގައި ތިބޭ ގައިދީން ވަކިވަކިން ބެހެއްޓުމަށް ޚާއްސަ ތަންތަން ނެތް ކަމަށާއި، އޭގެ ސަބަބުން ހުރިހާ އެންމެންނަށް އެއް ހަަމައަކުން ކަންކަން ކުރުމަށް ޖެހިފައިވާ ކަމަށެވެ.

ޖަލުގައި ތިބޭ ގައިންދީންނަށް އަސާސީ ބައެއް ހައްގުތައް ނުލިބޭ ކަމަށް ވާރކިންގ ގްރޫޕުން ފާހަގަކޮށް ބުނެފައިވަނީ، ބޭސް ފަރުވާގެ ޚިދުމަތާއި، އެ މީހުންނަކީ ބަންދެއްގައި ތިބޭ މީހުންކަމުން ބޭނުންވާ ސައިކޯ ސޯޝަލް ސަޕޯޓްވެސް ޖަލުތަކުގައި ލިބެން ނެތް ކަމަށެވެ. ސީޕީ އަހުމަދު ވިދާޅުވީ، ސިއްޙީ ޚިދުމަތް ދިނުމަށް ޚާއްސަ ކްލިނިކެއް ގާއިމްކުރެވި، އެ ކްލިނިކުން ގައިދީންނަށް ބޭސް ފަރުވާގެ ޚިދުމަތްވެސް ދޭން ފަށާފައިވާ ކަމަށެވެ. އަދި އެތަނުން ލިބޭ ޚިދުމަތްތައް އިތުރު ކުރުމަށްވެސް މަސައްކަތްތަކެއް ކުރެވޭ ކަމަށެވެ.

އެ ގޮޅިއެއްގައި ގިނަ އަދަދެއްގެ ގައިދީން ތިބޭ ކަމަށާއި، އެއީ ސިއްޙީ ގޮތުންވެސް ރަނގަޅު ކަމެއް ނޫންކަން ވާރކިންގ ގްރޫޕުން ފާހަގަކޮށްފައިވާއިރު، ސީޕީ ވިދާޅުވީ ޖަލުގެ ޖާގަ އިތުރު ކުރުމަށް މިހާރު ކުރަމުން އަންނަ މަސައްކަތުގެ ދަށުން މަންޑޭލާ ރޫލްސްއަށް ފެތޭ ގޮތަށް ޖަލަށް 50 ޖާގަ އިތުރު ކޮށްފައިވާ ކަމަށެވެ. އެއީ 100 ގައިދީންގެ ޖާގައެވެ.

މަންޑޭލާ ރޫލްސް ބުނާ ގޮތުން އިންސާނީ ކަރާމާތް ހިފެހެއްޓުމާއި، ތަފާތުނުކުރުމާއި، ޖަލުގައި ބަންދުކުރުމުގެ އަސާސް ބިނާވަނީ ހަމައެކަނި މުޖުތަމަޢުއާ އެކަހެރިކުރުމާއި އޭގެ ބޭރުން އެހެން އަނިޔާއެއް ނުލިބުމުގެ މައްޗަށް ކަން ކަށަވަރުކުރުމަށް ބާރު އަޅަން ޖެހެއެވެ. އާންމު ސާފު ތާހިރުކަން ކަށަވަރުކުރުމާއި، ގައިދީއަކު ލަދު ގަންނަންޖެހޭ ފަދަ ހާލަތުތައް ކުރިމަތި ނުކުރުވުމަކީ މަންޑޭލާ ރޫލްސްގެ އަސާސެވެ. ވާރކިންގ ގްރޫޕުންވެސް ވަނީ އެ ގޮތަށް ޖަލުތައް ބައްޓަން ކުރަންޖެހޭ ކަމަށް ބުނެފައެވެ.

ސީޕީ އަހުމަދު ވިދާޅުވީ، މިކަމަކީ ޒަމާނުއްސުރެ އޮންނަ ބޮޑު މައްސަލައަކަށްވާއި، ހައްލު ކުރުމަށް ދުވަސް ނަގާނެ ކަމަށެވެ. އެހެންނަމަވެސް ވާރކިންގ ގްރޫޕްގެ ހުށަހެޅުންތަށް ބަލައިގަނެ ވީހާވެސް އަވަހަކަށް މައްސަލަތައް ހައްލު ކުރުމަށް މަސައްކަތް ކުރައްވާ ކަމަށެވެ.

ވާރކިންގ ގްރޫޕުގެ ތިން މެމްބަރުން ނޮވެމްބަރު މަހުގެ 29ން ޑިސެމްބަރު މަހުގެ 9ވަނަ ދުވަހަށް ރާއްޖޭގެ ސަރުކާރުގެ އެދިވަޑިގަތުމަށް ރާއްޖެ ވަޑައިގެން ކުރި މި ތަހުގީގުގެ ރިޕޯޓު އަންނަ އަހަރުގެ ސެޕްޓެމްބަރު މަހުގައި އދގެ ހިއުމަން ރައިޓްސް ކައުންސިލަށް ހުށަހަޅާނެއެވެ.