ޗެލްސީއަށް ގްރޫޕުގެ ދެވަނަ، ފަހު މެޗުން ޔުނައިޓެޑް އެއްވަރު

ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ޗެލްސީ އާއި މެންޗެސްޓާ ޔުނައިޓެޑް ކުޅުނު ފަހު މެޗުތަކުން މޮޅެއް ނުލިބި ނިންމާލަން ޖެހިއްޖެއެވެ.

ރަށުން ބޭރުގައި ބުދަ ދުވަހުގެރޭ ކުޅުނު މެޗުން ޗެލްސީ ވަނީ ޒެނިތާ 3-3 ގެ ނަތީޖާއަކުން އެއްވަރުވެފައެވެ.

މި މެޗު ފަށައިގެން ދެވަނަ މިނެޓުގައި ޓިމޯ ވާނާ ޗެލްސީއަށް ލީޑު ނަގައިދިން ނަމަވެސް، ފުރަތަމަ ހާފު ނިމުމުގެ ކުރިން ކްލައުޑީނިއޯ އާއި ސަރްދާރް އަޒްމޫން ކާމިޔާބުކުރި ލަނޑުތަކުން ޒެނިތުން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އަދި ދެވަނަ ހާފު ފަށައިގެން ރޮމެލޫ ލުކާކޫ އާއި ވާނާގެ ލަނޑުތަކުން ޗެލްސީން އަލުން ލީޑު ނެގި ނަމަވެސް، މެޗުގެ އިތުރު ވަގުތުގައި މަގޯމެޑް އޮޒްޑޯއޭވް ވަނީ ޒެނިތަށް ނަތީޖާ އެއްވަރުކޮށްދީފައެވެ.

މި ނަތީޖާއާއެކު ޗެލްސީއަށް ލިބުނީ ގްރޫޕް އެޗުގެ ދެވަނައެވެ. އެ ޓީމަށް 13 ޕޮއިންޓް ލިބުނުއިރު، އެއްވަނަ ހޯދި ޔުވެންޓަސްއަށް ވަނީ 15 ޕޮއިންޓް ލިބިފައެވެ. ގްރޫޕް ސްތޭޖުގެ ފަހު މެޗުގައި ބުދަ ދުވަހުގެރޭ ޔުވެންޓަސް ވަނީ މަލްމޯ އަތުން 1-0 ގެ ނަތީޖާއަކުން މޮޅުވެފައެވެ. މި ގްރޫޕުގެ ތިންވަނައިގައި އޮތް ޒެނިތަށް ފަސް ޕޮއިންޓް ލިބުނުއިރު، ފުލުގައި އޮތް މަލްމޯއަށް ލިބިފައިވަނީ އެންމެ ޕޮއިންޓެކެވެ.

މީގެ އިތުރުން ޗެމްޕިއަންސް ލީގުގެ ގްރޫޕް އެފްގެ އެއްވަނަ ހޯދާފައިވަނީ ޔުނައިޓެޑް ވަނީ ބުދަ ދުވަހުގެރޭ ކުޅުނު މެޗުން ޔަންގް ބޯއީސްއާ 1-1 ގެ ނަތީޖާއަކުން އެއްވަރުވެފައެވެ.

އަމިއްލަ ދަނޑުގައި ކުޅުނު މެޗުގެ ނުވަވަނަ މިނެޓުގައި މޭސަން ގްރީންވުޑް ވަނީ ޔުނައިޓެޑަށް ލީޑު ނަގައިދީފައެވެ. އެކަމަކު ފުރަތަމަ ހާފު ނިމުމުގެ ކުރިން ޔަންގް ބޯއީސްއަށް ނަތީޖާ އެއްވަރުކޮށްދިނީ ފަބިއަން ރެއިޑާއެވެ. މި މެޗުން ޔުނައިޓެޑް އެއްވަރުވިއިރު، މިއީ އައު ކޯޗު ރަލްފް ރަންގްނިކުގެ އިރުޝާދުގެ ދަށުން ޗެމްޕިއަަންސް ލީގުގައި އެ ޓީމުން ކުޅުނު ފުރަތަމަ މެޗެވެ.

މި ނަތީޖާއާއެކު ގްރޫޕް އެފްގެ އެއްވަނައިގައި ޔުނައިޓެޑް އޮތީ 11 ޕޮއިންޓާއެކުއެވެ. ދެވަނައިގައި އޮތް ވިޔަރެއާލަށް ހަތް ޕޮއިންޓް ލިބުނުއިރު، ތިންވަނައިގައި އޮތް އެޓަލާންޓާއަށް ލިބިފައިވަނީ ހަ ޕޮއިންޓެވެ. އަދި ފުލުގައި ނިންމާލި ޔަންގް ބޯއީސްއަށް ލިބިފައިވަނީ ފަސް ޕޮއިންޓެވެ.