ވޮލީ އެކްސެލެންސް ޕްރޮގްރާމުން ކުރިއެރުން ފެނޭ: ރަނޭ

ދާދި ފަހުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ފެށި ވޮލީ އެކްސެލެންސް ޕްރޮގްރާމުން ކުރިއެރުން ފެންނަ ކަމަށް އެ އެސޯސިއޭޝަނުގެ ރައީސް މުޙައްމަދު ރަނޭޝް (ރަނޭ) ވިދާޅުވެއްޖެއެވެ.

ބޮޑު ޕްލޭނަކާއެކު ވީއޭއެމުން ޒުވާން ގައުމީ ވޮލީބޯޅަ ޓީމު އެކުލަވާލާފައިވަނީ ވޮލީ އެކްސެލެންސް ޕްރޮގްރާމުގެ ދަށުން އޮކްޓޯބަރު މަހުގެ ތެރޭގައެވެ. މި ޕްރޮގްރާމަކީ ސީނިއާ ގައުމީ ޓީމަށް ކުދިން ނެގުމަށާއި، ޒުވާން ކުޅުންތެރިންގެ ހުނަރު އިތުރުކުރުމަށް އަދި ކުޅިވަރުގެ ޑިސިޕްލިން ހިފެހެއްޓުމުގެ ބޭނުމުގައި އެކުލަވާލި ޕްލޭނެކެވެ.

"ރާއްޖެ.އެމްވީ" އަށް ދެއްވި ޚާއްސަ އިންޓަވިއުއެއްގައި ވީއޭއެމްގެ ރައީސް ރަނޭ ވިދާޅުވީ އެ އެސޯސިއޭޝަނުގެ ރައީސްގެ މަގާމާ ހަވާލުވިއިރު އެންމެ ބޮޑަށް ފާހަގަވިކަމަކީ ޒުވާން ކުޅުންތެރިންނަށް ސީނިއާ ޓީމަށް އަރާނެ ޕްލެޓްފޯމެއް ގާއިމުވެފައި ނެތްތަން ކަމަށާއި، އެހެންކަމުން އެންމެ ފުރަތަމަވެސް ކުރެވުނު ކަމަކީ ޒުވާން ކުޅުންތެރިންނަށް ފުރުސަތުދޭނެ ގޮތްތަކެއް ހޯދުން ކަމަށެވެ.

އަދި ވޮލީ އެކްސެލެންސް ޕްރޮގްރާމް ފަށައިގެން މިވީ އަދި ދެ މަސް ކަމަށާއި، މި މުއްދަތުގައި ނަތީޖާ ގޯސް ނޫން ކަމަށްވެސް ވިދާޅުވިއެވެ. އެގޮތުން މިދިޔަ ދެ މަސް ދުވެހުގެ ތެރޭގައި ގައުމީ ސީނިއާ ޓީމުގައި އެކްސެލެންސް ޕްރޮގްރާމުން ތަމްރީނުވި ތިން ކުޅުންތެރިން ހިމެނިފައިވާނެ ކަމަށް ރަނޭ ވަނީ ވިދާޅުވެފައެވެ.

ރަނޭ ވިދާޅުވީ ވީއޭއެމުން ފެށި މި މަސައްކަތަކީ ރަނގަޅު ބިންގަލެއްކަން މިހާރު ވޮލީ ނޫން ކުޅިވަރުތަކުންވެސް ދެކޭ ކަމަށާއި، އެއީ ވީއޭއެމަށް ލިބުނު ބޮޑު ހިތްހަމަޖެހުމެއް ކަމަށެވެ. އަދި ކުރިއަށް އޮތް ސެންޓްރަލް ޒޯން މުބާރާތަށް ނުކުންނައިރު 23 އަހަރުން ދަށުގެ ދެ ކުޅުންތެރިން ގައުމީ ސީނިއާ ޓީމަށް ކުޅޭނެ ކަމަށް ރަނޭ ވަނި ވިދާޅުވެފައެވެ.

ބަންގްލަދޭޝްގައި މި މަހު ފަހުކޮޅު ފަށަން ހަމަޖެހިފައިވާ ސެންޓްރަލް ޒޯން ވޮލީބޯޅަ މުބާރާތަށް ގައުމީ ޓީމުގެ 15 ކުޅުންތެރިންގެ ސްކޮޑެއް މިހާރު އެކުލަވާލާފައިވާއިރު، އެ ސްކޮޑުގައި ޒުވާން ގައުމީ ޓީމުގެ ތިން ކުޅުންތެރިން ހިމެނެއެވެ. އެ ތިން ކުޅުންތެރިންނަކީ އުމުރުން 17 އަހަރުގެ މާއިޝް އަޙްމަދާއި، އުމުރުން 19 އަހަރުގެ އަޙްމަދު ނާފިއު އަދި އުމުރުން 20 އަހަރުގެ ޝާމިލް މުޙައްމަދެވެ. މި ތިން ކުޅުންތެރިންނަކީވެސް ގައުމީ ސްކޮޑުގައި މުޅިން އަލަށް ހިމެނުނު ތިން ކުޅުންތެރިންނެވެ.

އެކަމަކު މުބާރާތަށް ގައުމީ ޓީމުން ފުރާނީ 15 ކުޅުންތެރިންގެ ސްކޮޑު 12 ކުޅުންތެރިންނަށް މަދު ކުރުމަށްފަހުގައެވެ. އެކަމަކު އެ ސްކޮޑުގައިވެސް 23 އަހަރުން ދަށުގެ ދެ ކުޅުންތެރިއަކު ހިމަނަން ވަނީ ނިންމާފައެވެ.