ފަންނުވެރިންނަށް އެކިއެކި ފްލެޓްފޯމްތަކުން އިތުރު ފުރުސަތުތައް ދަނީ ހޯދައިދެމުން: މިނިސްޓަރު ޔުމްނާ

ދިވެހި ފަންނުވެރިންނަށް އެކިއެކި ފްލެޓްފޯމްތަކުން އިތުރު ފުރުސަތުތައް ހޯދައިދިނުމަށް ގިނަ މަސައްކަތްތަކެއް ކުރެވެމުންދާކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް, ޔުމްނާ މައުމޫނު ވިދާޅުވެއްޖެއެވެ.

އާދިއްތަ ދުވަހުގެ ހަވީރު "އަންވެއިލިންގ ވިޝަންސް 2021" ހުޅުވުމުގެ ރަސްމިއްޔާތުގައި މިނިސްޓަރު ޔުމްނާ ވިދާޅުވީ، މިނިސްޓްރީގެ އިތުރުން ނެޝަނަލް ސެންޓަރ ފޮރ ދި އާޓްސް (އެންސީއޭ)އިން މަސައްކަތް ކުރަމުންދަނީ ފަންނުވެރިން ކުރިއެރުވުމަށް މަސައްކަތްތައް ކުރަމުން ކަމަށެވެ. އެގޮތުން އެކިއެކި ފްލެޓްފޯމްތަކުން ފުރުސަތުތައް ހޯދުމަށް މަސައްކަތް ކުރަމުންދާކަން މިނިސްޓަރު ޔުމްނާ ވިދާޅުވިއެވެ.

ފަންނީ އުފެއްދުންތައް ޕްރޮމޯޓްކޮށް، އެއިން ވިޔަފާރި ކުރެވޭނެ މަގުތައް ހޯދުމަށް އިކޮނޮމިކް މިނިސްޓްރީއާއެކު ވަރަށް ފުޅާކޮށް މަސައްކަތްތަކެއް ކުރެއްވިކަން ފާހަގަކުރައްވައި މިނިސްޓަރު ޔުމްނާ ވިދާޅުވީ، 2019 ވަނަ އަހަރު ކާމިޔާބު މައުރަޒުތަކެއް ބޭއްވުނު ކަމަށެވެ. ނަމަވެސް ކޮވިޑް-19އާއެކު 2020 ވަނަ އަހަރު މައުރަޒުތައް ނުބޭއްވި ގިނަ ގޮންޖެހުންތަކާ ފަންނުވެރިންނަށް ކުރިމަތިލާން ޖެހުނު ކަމަށެވެ.

ނެޝަނަލް އާޓް ގެލެރީގެ ''ވަރޗުއަލް ގެލެރީ''އަށް އިޝާރާތް ކުރައްވައި މިނިސްޓަރު ޔުމްނާ ވިދާޅުވީ، ވަރޗުއަލް ގެލަރީއެއް ހެދުމުގެ މުހިންމުކަމާއި އެ ޚިޔާލު ލިބިގެންދިޔައީ ކޮވިޑް-19އާއެކު ފަންނުންވެރިން އޮންލައިން ފްލެޓްފޯމްތަކުގައި ކުރި މަސައްކަތްތަކުގެ ސަބަބުން ކަމަށެވެ. މި ގެލަރީއާއަކީ ފަންނުވެރިންގެ މަސައްކަތަށް ލިބުނު އިތުރު ބާރެއް ކަމަށް މިނިސްޓަރު ޔުމްނާ ވިދާޅުވިއެވެ. އަދި ވިދާޅުވީ އެ ގެލަރީން މުޅި ދުނިޔެއަށް ފަންނުވެރިންގެ މަސައްކަތްތައް ބަލާލެވޭނެ ކަމަށެވެ.