އަމާޒަކީ ކުޅުދުއްފުށީ ޕޯޓަށް އަންނަ ކޮންމެ ބޯޓަކަށްވެސް ވީހާވެސް އަވަސް، ރަނގަޅު ޚިދުމަތެއް ފޯރުކޮށްދިނުން - އެމްޕީއެލްގެ ސީއީއޯ

ކުޅުދުއްފުށީ ޕޯޓުގެ އެންމެ ބޮޑު އަމާޒަކީ، އެތަނުން ޚިދުމަތް ހޯދާ ހުރިހާ ބޯޓުތަކަކަށްވެސް ވީހާވެސް އަވަސް، އަދި ރަނގަޅު ޚިދުމަތެއް ދިނުންކަމުގައި މޯލްޑިވްސް ޕޯޓްސް ލިމިޓެޑްގެ ސީއީއޯ ޝާހިދު އަލީ ވިދާޅުވެއްޖެއެވެ.

ކުޅުދުއްފުށީ ޕޯޓަށް 16 އަހަރު ފުރުން ފާހަގަކުރުމަށް ހޮނިހިރު ދުވަހުގެ ރޭ ބޭއްވި ރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ، ކުޅުދުއްފުށީ ޕޯޓުން ދެމުންގެންދާ ޚިދުމަތްތައް ރަނގަޅުކުރުމަށް އެމްޕީއެލްގެ ކެޕޭސިޓީގައި ހުރި ހުރިހާ މަސައްކަތެއްކުރާނެ ކަމަށެވެ.

ޝާހިދު ވިދާޅުވީ ސަރުކާރުގެ ސިޔާސަތުގެ ތެރެއިން، ކުޅުދުއްފުށީ ޕޯޓަށް އިމްޕޯޓްކުރެވޭ މުދަލުގެ ތެރެއިން 50 އިންސައްތަ މުދަލުގެ ޑިއުޓީ މާފުކުރެވޭގޮތަށް ހަމަޖެހިފައިވާކަމަށާއި، އޭގެ ސަބަބުން އެކަށީގެންވާ މުދާ މިހާރު މިސަރަހައްދަށް ޑައިރެކްޓްކޮށް އައިސް، ކަސްޓަމްސްއިން ކްލިއަރ ކުރެވިގެންދާ ކަމަށެވެ. އަދި އެހެންވުމުގެ ސަބަބުން ސަރަހައްދުގެ ވިޔަފާރިތަކަށް ފައިދާ ލިބިގެންދާ ކަމަށްވެސް އޭނާ ވިދާޅުވި އެވެ.

ޕޯޓަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ ބަނދަރު ކުޑަވުމުގެ މައްސަލަކަން ފާހަގަކުރައްވަމުން އޭނާ ވިދާޅުވީ، ސަރުކާރުގެ ސިޔާސަތާ އެއްގޮތަށް ޕޯޓް ތަރައްގީކުރުމުގެ މަސައްކަތް ފެށިގެން ކުރިއަށްދާ ކަމަށެވެ. އެގޮތުން ބޮޑެތި ބޯޓުފަހަރަށް ބަނދަރުކުރެވޭނެ ގޮތަކަށް ޕޯޓްގެ ޑިޒައިން ބަދަލުކޮށް އެ މަސައްކަތްކުރުމަށް އެމްޓީސީސީއާ ހަވާކޮށްފައިވާކަމަށް ވިދާޅުވި އެވެ.

ޝާހިދު ވިދާޅުވީ މިމަސައްކަތް ވަރަށް ބާރަށް ކުރިއަށް ދާކަމަށާއި، ޕްރޮޖެކްޓް ފަރުމާކުރެވި ޕްރޮޖެކްޓް ނިމިގެންދާއިރު އޭގެ ސަބަބުން އަނެއްކާވެސް މި ސަރަހައްދަށް އިގުތިސާދީ ކުރިއެރުން ލިބޭނެ ގޮތަކަށް ބައްޓަންވެގެން ދާނެކަމަށް ޔަގީންކުރައްވާކަމަށެވެ.

މި މަސައްކަތުގެ އަމަލީ މަސައްކަތް މިއަހަރު ނިމުމުގެ ކުރިން ފެށިގެންދާނެކަމުގެ ވަރަށް ބޮޑު އުންމީދު އެބައޮތްކަމަށްވެސް ޝާހިދުގެ ވާހަކާގައި ފާހަގަކުރެއްވި އެވެ.

މި ރަސްމިއްޔާތުގައި ބަނދަރުގައި ގިނަ ދުވަހުގެ ޚިދުމަތް ކުރެއްވި މުވައްޒަފުންގެ އަގުވަޒަންކޮށް، ހަނދާނީ ފިލަޔާއި ސެޓްފިކެޓް ހަވާލުކޮށްފައިވެއެވެ.