ސްރީލަންކަން އެއަރލައިންސްގެ ސީދާ ދަތުރުތައް އަލުން އައްޑޫއަށް ފަށައިފި

ސްރީލަންކަން އެއަރލައިންސުން އައްޑޫ ސިޓީގެ ގަމަށް ކުރަމުން އައި ސީދާ ދަތުރުތައް އަލުން ފަށައިފިއެވެ.

މި ދަތުރުތައް އަލުން ފެށުމުގެ ގޮތުން ސްރީލަންކަން އެއަރލައިންސުން ގަން އިންޓަރނޭޝަނަލް އެއަރޕޯޓުގައި ބޭއްވި ޚާއްސަ ރަސްމިއްޔާތުގައި، ޖެއްސި ބޯޓުން ދަތުރުކުރި ގިނަ އަދަދެއްގެ ފަތުރުވެރިންނަށް، އައްޑޫސިޓީ ކައުންސިލާއި ސްރީލަންކަން އެއަރލައިންސްގެ އިސްވެރިންނާއި އަދި އޭސް އޭވިއޭޝަނުގެ ފަރާތުން ވަނީ ހޫނު މަރުހަބާއެއް ކިޔާފައެވެ.

ކޮންމެ ހަފުތާއެއްގެ ހޮނިހިރު ދުވަހު އައްޑޫއަށް ދަތުރު ހަމަޖެހިފައި ވާއިރު، ގަމާއި ކޮލަމްބޯއާ ދެމެދު ދިވެއްސެއްގެ ދެކޮޅު ޓިކެޓްގެ އަގަކީ 271 ޑޮލަރެވެ.  

2016ން ފެށިގެން އައްޑޫސިޓީ ގަމާއި ކޮލަމްބޯއާ ދެމެދު ކުރަމުން އައި ދަތުރުތައް މިދިޔަ އަހަރު ހުއްޓާލާފައިވަނީ ހަމައެކަނި އައްޑޫއަށް ދަތުރުކޮށްގެން ގެއްލުންވާތީ ކަމަށް ބުނެއެވެ. އޭސް އޭވިއޭޝަން މޯލްޑިވްސްގެ މެނޭޖިން ޑިރެކްޓަރު މުހައްމަދު ފިރާގު ކުރިން ވިދާޅުވެފައިވަނީ އައްޑޫއަށް އެކަނި އަމާޒްކޮށްގެން ދަތުރުތައް ނުބޭއްވޭނެ ކަމަށާއި، އައްޑޫ އާއި ހުވަދު އަތޮޅާ ދެމެދު ޑޮމެސްޓިކް ފްލައިޓްތަކުން ގުޅުވާލެވިއްޖެ ނަމަ އަލުން ދަތުރު ފެށިދާނެ ކަމަށެވެ.

މިގޮތަށް ހަމަޖެހިގެން މިދިޔައީ އައްޑޫއާއި ދެކުނުގެ އެހެން ރަށްތައް ގުޅާލުމަށްޓަކައި ޑޮމެސްޓިކް ފްލައިޓް އެޅުމާގުޅޭ ގޮތުން އައްޑޫގެ ވިޔަފާރިވެރިންނާއި ކަމާގުޅޭ ފަރާތްތަކުން ސަރުކާރާއެކު މަޝްވަރާކުރަމުން އަންނަތާ ގިނަ ދުވަސްތަކަކަށް ފަހުއެވެ. މިކަން މިގޮތަށް ހަމަޖެހިގެން ދިއުމަކީ ދެކުނުގެ ފަތުރުވެރިކަމަށާއި ވިޔަފާރިތަކަށް ހެޔޮ އަސަރެއް ކުރާނެކަމެއް ކަމަށް ގިނަ ބަޔަކު ގަބޫލު ކުރެއެވެ.