މެންޗެސްޓާ ސިޓީއަށް ކުޅެމުން އަންނަ ސްޕެއިނުގެ ޒުވާން ފޯވާޑް ފެރާން ޓޮރޭސް ހޯދަން ބާސެލޯނާއިން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.
މީގެ ކުރިން ވެލެންސިއާއަށްވެސް ކުޅުނު އުމުރުން 21 އަހަރުގެ ޓޮރޭސް ސިޓީއަށް ބަދަލުވީ މިދިޔަ އަހަރުގެ އޯގަސްޓް މަހު 23 މިލިޔަން ޔޫރޯގެ ފީއަކަށެވެ. އެ ފަހަރު އޭނާ ވަނީ ސިޓީއާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ހޫނު މޫސުމުގައެވެ.
ރިޕޯޓުތައް ބުނާ ގޮތުން ޓޮރޭސް ބާސާގެ އައު ކޯޗު ޒަވީ ހެނާންޑޭޒް ފާރަލަމުން އަންނަ ކުޅުންތެރިއެކެވެ. އެއާއެކު ޓޮރޭސްގެ ޓްރާންސްފާއާ ގުޅޭ ގޮތުން މިދިޔަ ހުކުރު ދުވަހު ސިޓީ އާއި ބާސާއިން މަޝްވަރާކޮށްފައިވާ ކަމަށާއި، އަދި ސިޓީން ޓޮރޭސް ވިއްކާނީ 40 މިލިޔަން ޔޫރީގެ ފީއަކަށް ކަމަށް "އީއެސްޕީއެން" އިން ވަނީ ރިޕޯޓުކޮށްފައެވެ.
ސްޕެއިނުގެ މީޑިއާ ރިޕޯޓުތައް ބުނާ ގޮތުން ބާސާގެ ފޯވާޑް ލައިން އިތުރަށް ވަރުގަދަކުރުމަށް ޓޮރޭސްގެ އިތުރުން ސިޓީއަށް ކުޅެމުން އަންނަ އިންގްލެންޑުގެ ފޯވާޑް ރަހީމް ސްޓާލިން ގެނައުމަށްވެސް ޒަވީ ބޭނުންވެއެވެ. އެހެންކަމުން ކުރިއަށް އޮތް ޖެނުއަރީ ޓްރާންސްފާގައި ޓޮރޭސް ނުވަތަ ސްޓާލިން ގަތުމަށް ބާސާއިން ބިޑުކުރާނެ ކަމަށްވެސް ވަނީ ރިޕޯޓުކޮށްފައެވެ.
ބާސާއިން ފޯވާޑެއް ހޯދުމަށް މަސައްކަތްކުރަމުން އަންނައިރު، މިދިޔަ ހޫނު މޫސުމުގެ ޓްރާންސްފާގައި އެ ޓީމުން ވަނީ މީގެ ކުރިން ސިޓީއަށް ކުޅުނު އާޖެންޓީނާގެ ތަޖުރިބާކާރު ފޯވާޑް ސާޖިއޯ އަގުއޭރޯ ގެނެސްފައެވެ. އެކަމަކު ދާދި ފަހުން ހިތުގެ މައްސަލަތަކެއް ފާހަގަވެގެން މި ވަގުތު ކުޅުމާ ދުރުގައި ހުރި އަގުއޭރޯ ހަދަމުން އަންނަ ޓެސްޓުތަކުގެ ނަތީޖާ ގޯސްކަމުގައިވާނަމަ، އޭނާ ފުޓްބޯޅަ ކުޅުން ހުއްޓާލަން ޖެހިދާނެ ކަމަށް ރިޕޯޓުތައް ވަނީ ބުނެފައެވެ.
ބާސާއިން ޓޮރޭސް ހޯދުމަށް މަސައްކަތްކުރަމުން އަންނައިރު، ސްޕެއިންގެ ގައުމީ ޓީމާއެކު މި އަހަރުގެ ޔޫރޯ ފުޓްބޯޅަ މުބާރާތުގައިވެސް ކުޅެފައިވާ ޓޮރޭސްއަކީ ވެލެންސިއާގެ ޔޫތު އެކަޑަމީގެ އުފެއްދުމެކެވެ. އަދި އޭނާ ވަނީ ވެލެންސިއާއާއެކު ސްޕެނިޝް ކަޕް ކާމިޔާބުކޮށްފައެވެ. އޭގެ ފަހުން ސިޓީއަށް ބަދަލުވެ އެ ޓީމަށް ކުޅެދިން 43 މެޗުގައި 16 ލަނޑު ޓޮރޭސް ކާމިޔާބުކޮށްފައިވާއިރު، އޭނާ ވަނީ ސިޓީއާއެކު މިދިޔަ ސީޒަނުގެ އިނގިރޭސި ޕްރިމިއާ ލީގު އަދި އިނގިރޭސި ލީގު ކަޕް ކާމިޔާބުކޮށްފައެވެ.
